കണ്ണൂര്‍: കണ്ണൂര്‍ മാതമംഗലത്ത് എരമം സ്വദേശിനിയായ 32 കാരി മേഘ എലിവിഷം കഴിച്ച്‌ ജീവനൊടുക്കിയ സംഭവത്തില്‍ ദുരൂഹത.
വിദേശത്തായിരുന്ന ഭര്‍ത്താവ് ബിനീഷ് വീട് വാങ്ങുന്നതിനായി പലതവണകളായി അയച്ചുനല്‍കിയതും സ്വന്തം സമ്പാദ്യവും ചേര്‍ത്ത് 40 ലക്ഷത്തോളം രൂപയുടെ നഷ്ടം സംഭവിച്ചതിനെത്തുടര്‍ന്നാണ് യുവതി അത്യാഹിതത്തിലേക്ക് നീങ്ങിയതെന്നാണ് പൊലീസിന്റെ പ്രാഥമിക നിഗമനം. ഈ മാസം എട്ടാം തീയതി വിഷം കഴിച്ച മേഘ പരിയാരം മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെയാണ് മരണത്തിന് കീഴടങ്ങിയത്.
സംഭവവുമായി ബന്ധപ്പെട്ട് പോലീസ് നടത്തുന്ന അന്വേഷണം പ്രധാനമായും കേന്ദ്രീകരിച്ചിരിക്കുന്നത് മേഘയുടെ കൈവശമുണ്ടായിരുന്ന ഭീമമായ തുക എങ്ങോട്ട് പോയി എന്ന ചോദ്യത്തിലാണ്. വിദേശത്തുനിന്ന് ബിനീഷ് പണം അയക്കുമ്പോഴെല്ലാം അത് സുരക്ഷിതമായി കൈവശമുണ്ടാകുമെന്നും പുതിയ വീട് വാങ്ങുമ്പോള്‍ ഈ തുക ഉപയോഗിക്കാമെന്നുമാണ് അദ്ദേഹം കരുതിയിരുന്നത്. എന്നാല്‍ അടുത്തിടെ വീട് വാങ്ങുന്നതുമായി ബന്ധപ്പെട്ട് പണം ആവശ്യപ്പെട്ടപ്പോഴാണ് 40 ലക്ഷം രൂപയും ചെലവായിപ്പോയി എന്ന ഞെട്ടിക്കുന്ന വിവരം മേഘ ഭര്‍ത്താവിനോട് പറയുന്നത്.
ഈ തുക എങ്ങനെയാണ് ചെലവഴിച്ചതെന്നോ എവിടേക്കാണ് കൈമാറിയതെന്നോ ഉള്ള കാര്യങ്ങളില്‍ യാതൊരുവിധ വ്യക്തതയും നല്‍കാന്‍ മേഘയ്ക്ക് കഴിഞ്ഞിരുന്നില്ല. ഭര്‍ത്താവിന്റെ ചോദ്യങ്ങള്‍ക്ക് മുന്നില്‍ ഉത്തരമില്ലാതെ മാനസികമായി തകര്‍ന്ന നിലയിലായിരുന്ന മേഘ പെട്ടെന്ന് ഈ കടുത്ത തീരുമാനത്തിലേക്ക് എത്തുകയായിരുന്നു എന്നാണ് കരുതപ്പെടുന്നത്. ഇത്രയും വലിയ തുക ഏതെങ്കിലും തരത്തിലുള്ള സാമ്പത്തിക തട്ടിപ്പുകള്‍ക്കോ നിക്ഷേപങ്ങളോ ഇരയായി നഷ്ടപ്പെട്ടതാണോ, അതോ മറ്റെന്തെങ്കിലും വ്യക്തിപരമായ കാരണങ്ങളാണോ ഇതിന് പിന്നിലെന്ന കാര്യങ്ങളെക്കുറിച്ച്‌ പോലീസ് കുടുംബാംഗങ്ങളുടെയും ബന്ധുക്കളുടെയും മൊഴിയെടുക്കുന്നുണ്ട്
യുവതിയുടെ മരണത്തിന് പിന്നിലെ യഥാര്‍ത്ഥ കാരണം കണ്ടെത്തുക എന്ന ലക്ഷ്യത്തോടെ പോലീസ് മേഘയുടെ ബാങ്ക് അക്കൗണ്ട് ഇടപാടുകളും മൊബൈല്‍ ഫോണ്‍ കോളുകളും മറ്റ് ഡിജിറ്റല്‍ രേഖകളും വിശദമായി പരിശോധിച്ചു വരികയാണ്. ഓണ്‍ലൈന്‍ തട്ടിപ്പുകള്‍ക്കോ ഓണ്‍ലൈന്‍ വാതുവെപ്പ് ശൃംഖലകള്‍ക്കോ യുവതി ഇരയായിട്ടുണ്ടോയെന്ന സംശയവും അന്വേഷണ സംഘം പരിശോധിക്കുന്നുണ്ട്. സമഗ്രമായ അന്വേഷണത്തിലൂടെ മാത്രമേ യഥാര്‍ത്ഥ സത്യം പുറത്തുവരികയുള്ളൂ.
