ചെന്നൈ: തമിഴ്നാട്ടിലെ റാണിപ്പേട്ട് ജില്ലയില്‍നിന്ന് ഒരു മാസം മുമ്പ് കാണാതായ ഒരു വയസ്സുകാരിയെ ആന്ധ്രപ്രദേശില്‍നിന്ന് പൊലീസ് കണ്ടെത്തി.
സെപ്റ്റംബർ 23ന് കാണാതായ മഹേശ്വരിയെ പ്രത്യേക അന്വേഷണസംഘമാണ് രക്ഷപ്പെടുത്തിയത്. കുട്ടിയെ തട്ടിക്കൊണ്ടുപോയി മറ്റൊരു സ്ത്രീക്ക് കൈമാറിയെന്ന സംശയത്തില്‍ അഞ്ച് പേരെ അറസ്റ്റ് ചെയ്തു. കുട്ടിയെ വില്‍പ്പന നടത്തിയിട്ടുണ്ടോയെന്ന കാര്യത്തില്‍ അന്വേഷണം തുടരുകയാണ്.
റാണിപ്പേട്ടിലെ ലാലാപേട്ടിന് സമീപം സിപ്പ്‌കോട്ട് മേഖലയിലെ റോഡരികില്‍ മാതാപിതാക്കളായ ശേഖർ (46), പ്രേമ (23) എന്നിവർക്കൊപ്പം ഉറങ്ങുന്നതിനിടെയാണ് കുട്ടിയെ കാണാതായത്. നാടോടി ജീവിതം നയിക്കുന്ന ദമ്പതികള്‍ ഉപേക്ഷിക്കപ്പെട്ട കുപ്പികള്‍ ശേഖരിച്ചും ഭിക്ഷയെടുത്തുമാണ് ഉപജീവനം നടത്തുന്നത്. പൊലീസ് അന്വേഷണത്തില്‍ ലാലാപേട്ടിലെ ഭൂപതി (42), കൗസല്യ (40) എന്നിവർ കുട്ടിയെ തട്ടിക്കൊണ്ടുപോയി ആന്ധ്രപ്രദേശിലെ മല്ലേശ്വരി (44) എന്ന സ്ത്രീക്ക് കൈമാറിയെന്നാണ് കണ്ടെത്തല്‍. 24 വർഷം മുമ്പ് വിവാഹിതയായ മല്ലേശ്വരിക്ക് കുട്ടികളില്ലെന്നും ഭർത്താവ് ഏകദേശം 20 വർഷം മുമ്പ് ഉപേക്ഷിച്ചുപോയതായും റിപ്പോർട്ടുണ്ട്. മല്ലേശ്വരിയെ സഹായിക്കാനായിരിക്കാം ദമ്പതികള്‍ കുട്ടിയെ കൈമാറിയതെന്നാണ് അന്വേഷണസംഘത്തിന്റെ സംശയം. എന്നാല്‍ സംഭവത്തിന്റെ സാഹചര്യങ്ങളും ലക്ഷ്യവും ഇപ്പോഴും അന്വേഷണത്തിലാണ്.
പ്രത്യേക പൊലീസ് സംഘം ആന്ധ്രപ്രദേശിലെത്തിയാണ് കുട്ടിയെ കണ്ടെത്തി രക്ഷപ്പെടുത്തിയത്. എയർ കണ്ടീഷൻ ചെയ്ത മുറിയില്‍നിന്നാണ് കുട്ടിയെ കണ്ടെത്തിയതെന്ന് റിപ്പോർട്ടില്‍ പറയുന്നു. സന്തോഷ്, കുമാർ, ഭൂപതി, കൗസല്യ, മല്ലേശ്വരി എന്നിവരാണ് അറസ്റ്റിലായത്. കുട്ടിയെ കൈമാറാൻ പണം നല്‍കിയിട്ടുണ്ടോയെന്ന കാര്യം സ്ഥിരീകരിച്ചിട്ടില്ലെന്നും ഇക്കാര്യം അന്വേഷിച്ചുവരികയാണെന്നും മുതിർന്ന പൊലീസ് ഉദ്യോഗസ്ഥൻ പറഞ്ഞു.
