കോട്ടയം: ശബരിമല പാതയിലെ അതീവ അപകടമേഖലയായ കണമല അട്ടിവളവില്‍ സ്ഥാപിച്ചിരുന്ന പുതിയ സിഗ്നല്‍ പോസ്റ്റ് കാറ്റത്ത് മറിഞ്ഞുവീണു.
പ്രതിഷേധവുമായി നാട്ടുകാർ. ഉദ്യോഗസ്ഥരുടെയും കരാറുകാരുടെയും അഴിമതിയും ഗുരുതരമായ അശ്രദ്ധയുമാണ് ഇതിന് കാരണമെന്നാണ് നാട്ടുകാരുടെ പ്രധാന ആരോപണം.
ശബരിമല തീർത്ഥാടനത്തിന് മുന്നോടിയായി നടത്തിയ സുരക്ഷാ ക്രമീകരണങ്ങളിലെ പോരായ്മകളാണ് ഈ സംഭവത്തിലൂടെ പുറത്തുവന്നിരിക്കുന്നത്.
കഴിഞ്ഞദിവസം വൈകുന്നേരം ചെറിയ തോതില്‍ വീശിയ കാറ്റിലാണ് റോഡരികില്‍ സ്ഥാപിച്ചിരുന്ന സിഗ്നല്‍ പോസ്റ്റ് നിലംപതിച്ചത്. വൻദുരന്തം ഒഴിവായത് ഭാഗ്യംകൊണ്ട് മാത്രമാണ്.
സാധാരണയായി റോഡില്‍ കുഴിയെടുത്ത്, പോസ്റ്റിന്റെ അടിഭാഗം ഉറപ്പിച്ച്‌ കോണ്‍ക്രീറ്റ് ചെയ്യുകയും നട്ടും ബോള്‍ട്ടും മുറുക്കിയുമാണ് ഇത്തരം സിഗ്നല്‍ പോസ്റ്റുകള്‍ സ്ഥാപിക്കുന്നത്.
എന്നാല്‍, ഇവിടെ നിലവിലുണ്ടായിരുന്ന കോണ്‍ക്രീറ്റ് ചെയ്ത് ഉറപ്പിച്ച പോസ്റ്റ് അറുത്തുമാറ്റി, പുതിയത് വെറുതെ സ്ഥാപിക്കുകയായിരുന്നു എന്നാണ് നാട്ടുകാർ പറയുന്നത്.
കൃത്യമായ ആഴത്തില്‍ കുഴിയെടുക്കാതെയോ, കോണ്‍ക്രീറ്റ് ചെയ്ത് ബലപ്പെടുത്താതെയോ, വെല്‍ഡിങ് ചെയ്യാതെയോ ആണ് പോസ്റ്റ് സ്ഥാപിച്ചതെന്ന് വ്യക്തമാണ്.
ഓരോ ശബരിമല സീസണിലും നിരവധി അപകടങ്ങള്‍ നടക്കുന്ന കണമല ഇറക്കത്തിലെ സുരക്ഷാപ്രവർത്തനങ്ങള്‍ അടിയന്തരമായി പൂർത്തിയാക്കണമെന്നും നാട്ടുകാർ പറയുന്നു.
