ഇടുക്കി: കല്ലാർ അണക്കെട്ടിന്റെ രണ്ടു ഷട്ടറുകൾ നാളെ ഉയർത്തും. റേഡിയൽ ഗേറ്റുകളുടെ വയർ റോപ്പ് മാറ്റി സ്ഥാപിക്കുന്ന പ്രവൃത്തികളും അനുബന്ധ അറ്റകുറ്റപ്പണികളും നടത്തുന്നതിന്റെ ഭാഗമായാണ് നടപടി.
നാളെ രാവിലെ 11 മുതൽ 24 വരെ അണക്കെട്ടിന്റെ ഷട്ടറുകൾ 5 സെന്റീമീറ്റർ വീതം ഉയർത്തി, പരമാവധി 5 ക്യമെക്സ് എന്ന നിയന്ത്രിത നിരക്കിൽ ജലം പുറത്തേക്ക് ഒഴുക്കും. നിലവിൽ 819.9 മീറ്ററാണ് അണക്കെട്ടിലെ ജലനിരപ്പ്.
വെള്ളം തുറന്നുവിടുന്നതിന് മുന്നോടിയായി അണക്കെട്ടിൽ സ്ഥാപിച്ചിട്ടുള്ള മുന്നറിയിപ്പ് സൈറൺ മുഴക്കും. പൊതുജനങ്ങൾ പരിഭ്രാന്തരാകേണ്ടതില്ലെങ്കിലും ഈ സമയങ്ങളിൽ അണക്കെട്ടിന്റെ താഴ്വശത്തുള്ള ജലപാതയിലോ പുഴയിലോ ഇറങ്ങാൻ പാടില്ല.
ചിന്നാർ, കല്ലാർ പുഴകളുടെ ഇരുകരകളിലും താമസിക്കുന്നവർ അതീവ ജാഗ്രത പാലിക്കണമെന്ന് ഇടുക്കി ജില്ലാ കളക്ടറും ജില്ലാ ദുരന്തനിവാരണ അതോറിട്ടി ചെയർപേഴ്സണുമായ ഡോ. ദിനേശൻ ചെറുവാട്ട് അറിയിച്ചു.
