ഇടുക്കി: ഇടുക്കി ഡാം കേന്ദ്രമാക്കി പുതിയ ടൂറിസം കോറിഡോർ യാഥാർത്ഥ്യമാക്കുന്നതിനുള്ള സാദ്ധ്യത പഠനം നടത്താൻ സർക്കാർ.
സുരക്ഷാ വീഴ്ചയുണ്ടാവാത്ത രീതിയിൽ ഇടുക്കി ഡാം വിനോദസഞ്ചാരികൾക്കായി എല്ലാ ദിവസവും തുറന്നുകൊടുക്കാനാണ് ലക്ഷ്യമിടുന്നതെന്ന് മന്ത്രി സണ്ണി ജോസഫ് നിയമസഭയിൽ പറഞ്ഞു.
ഇടുക്കി ആർച്ച് ഡാമിന്റെ ടൂറിസം സാദ്ധ്യതകൾ പരമാവധി പ്രയോജനപ്പെടുത്തി പദ്ധതി ആവിഷ്‌കരിക്കണമെന്ന റോയ് കെ. പൗലോസ് എം.എൽ.എയുടെ ശ്രദ്ധക്ഷണിക്കലിനെത്തുടർന്നാണ് തീരുമാനം.
ഇടുക്കി ആർച്ച് ഡാമും പരിസരവും ഇന്റലിജൻസ് റിപ്പോർട്ട് പ്രകാരം അതീവ സുരക്ഷാ, തന്ത്രപ്രധാന മേഖലയായി പ്രഖ്യാപിച്ചിട്ടുള്ളതിനാൽ കർശന സുരക്ഷാ പ്രോട്ടോക്കോൾ പാലിച്ചായിരിക്കും സന്ദർശനം അനുവദിക്കുക.
.ഇതിനായി ഹൈഡൽ ടൂറിസം വകുപ്പും കെ.എസ്.ഇ.ബിയുമായി ചർച്ചകൾ നടത്തിയിട്ടുണ്ട്.
ഇടുക്കി, ചെറുതോണി, കുളമാവ് ഡാമുകൾ എല്ലാദിവസവും ടൂറിസ്റ്റുകൾക്കായി തുറന്നുകൊടുക്കുന്നത് പ്രദേശത്ത് കൂടുതൽ തൊഴിലവസരങ്ങൾ സൃഷ്ടിക്കാൻ സഹായകരമാകും.
. കുടുംബശ്രീ പ്രവർത്തകർക്കും തൊഴിലില്ലാത്തവർക്കും പുതിയ തൊഴിൽ സാദ്ധ്യതകൾ ഇതുവഴി ലഭ്യമാകും.
കല്യാണത്തണ്ട്, അഞ്ചുരുളി, ചെറുതോണി, കുളമാവ്, വാഴത്തോപ്പ് ഹിൽ വ്യൂ പാർക്ക്, അയ്യപ്പൻകോവിൽ, തൂക്കുപാലം തുടങ്ങിയ പ്രധാന വിനോദ സഞ്ചാര കേന്ദ്രങ്ങളെ ബന്ധിപ്പിച്ചുകൊണ്ടായിരിക്കും ഇടുക്കി ഡാം ടൂറിസം ഇടനാഴി രൂപീകരിക്കുക.
അഞ്ചുരുളിയിലെ പ്രശസ്തമായ ടണൽ, ജലപാത, ജലാശയ ദൃശ്യങ്ങൾ എന്നിവ ഉൾപ്പെടുത്തി സന്ദർശക സൗകര്യങ്ങൾ മെച്ചപ്പെടുത്താനും പദ്ധതിയിൽ ലക്ഷ്യമിടുന്നു.
പരിസ്ഥിതിയ്ക്കും പ്രകൃതിക്കും അനുയോജ്യമായ രീതിയിൽ കുടിവെള്ളം, പാർക്കിംഗ്, ശുചിമുറി, വിശ്രമമുറി തുടങ്ങിയ അടിസ്ഥാന സൗകര്യങ്ങൾ ഒരുക്കിക്കൊണ്ട് ഹൈറേഞ്ചിന്റെ വികസന സ്വപ്നങ്ങൾക്ക് വേഗത കൂട്ടുന്ന രീതിയിലാണ് ടൂറിസം കോറിഡോർ വിഭാവനം ചെയ്യുന്നത്.
