കോട്ടയം: ജനിച്ച മണ്ണില്‍ ജീവിക്കാനും സഞ്ചാരസ്വാതന്ത്ര്യത്തിനുംവേണ്ടി നിരന്തരമായി പൊതുസമൂഹവും കർഷകരും തെരുവിലിറങ്ങേണ്ടി വരുന്ന അവസ്ഥ അത്യന്തം ഭയാനകമാണെന്ന് കത്തോലിക്ക കോണ്‍ഗ്രസ് ഗ്ലോബല്‍ സമിതി പ്രസിഡന്റ് പ്രഫ.രാജീവ് കൊച്ചു പറമ്പില്‍. ഇഎസ്‌എ വിഷയത്തിന് ശാശ്വതമായ പരിഹാരം കാണുക, ഇടുക്കി ജില്ലാ കളക്ടറുടെ സഞ്ചാരസ്വാതന്ത്ര്യം നിരോധിച്ചുള്ള വിവാദ ഉത്തരവ് പിൻവലിക്കുക തുടങ്ങിയ ആവശ്യങ്ങള്‍ ഉന്നയിച്ച്‌ കത്തോലിക്ക കോണ്‍ഗ്രസ് ചങ്ങനാശേരി അതിരൂപത സമിതി കോട്ടയം ഗാന്ധി സ്ക്വയറിന് സമീപം നടത്തിയ പ്രതിഷേധ സായാഹ്ന ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
വന്യമൃഗങ്ങളുടെ സ്വൈരവിഹാരത്തിന്റെ പേരില്‍ ജനങ്ങളുടെ സഞ്ചാരസ്വാതന്ത്ര്യം തന്നെ തടയുന്ന ഉത്തരവ് പുറത്തിറക്കിയതിലൂടെ ഇടുക്കി കളക്ടർ പൗരാവകാശങ്ങളുടെ നഗ്നമായ ലംഘനമാണ് നടത്തിയിരിക്കുന്നത്. ഈ ജനവിരുദ്ധ ഉത്തരവുകള്‍ പിൻവലിച്ചു ജനങ്ങളോട് മാപ്പു പറയാൻ കളക്ടർ തയ്യാറാവണമെന്നും അല്ലാത്തപക്ഷം ആ പദവിയില്‍നിന്നും അദ്ദേഹത്തെ നീക്കാൻ സംസ്ഥാന സർക്കാർ മുൻകൈയെടുക്കണമെന്നും അദ്ദേഹം കൂട്ടിച്ചേർത്തു
.അതിരൂപത പ്രസിഡന്റ് ബിജു സെബാസ്റ്റ്യൻ അധ്യക്ഷത വഹിച്ചു. ഡയറക്ടർ ഫാ.ഡോ. സാവിയോ മാനാട്ട് മുഖ്യപ്രഭാഷണം നടത്തി. അതിരൂപത ജനറല്‍ സെക്രട്ടറി ബിനു ഡൊമിനിക്, വൈസ് പ്രസിഡന്റ് ജോർജുകുട്ടി മുക്കത്ത്, രാജേഷ് ജോണ്‍, അഡ്വ. മനു ജെ. വരാപ്പള്ളി, ലിസി ജോസ്, ഭാരവാഹികളായ കുഞ്ഞ് കളപ്പുര, സെബാസ്റ്റ്യൻ വർഗീസ്, സെബാസ്റ്റ്യൻ പുല്ലാട്ടുകാല, കെ.എസ്. ആന്റണി,സൈബി അക്കര, സേവ്യർ തോമസ് കൊണ്ടോടി, ബേബിച്ചൻ മുകളേല്‍, ജോജൻ സെബാസ്റ്റ്യൻ, സിബി പാറപ്പ, കെ.സി. ജോർജ്, പീറ്റർ നാഗപറമ്പില്‍, ഷൈനമ്മ ജയിംസ്, ഷെയിൻ ജോസഫ്, കെ.ഡി. ചാക്കോ എന്നിവർ പ്രസംഗിച്ചു.
