ഡല്‍ഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പരാതിയില്‍ അന്വേഷണം ആരംഭിച്ച്‌ വിജിലൻസ് സംഘം.
പരാതിക്കാരനായ സാജനില്‍ നിന്ന് ഉടൻ മൊഴി രേഖപ്പെടുത്തും. രേഖകളുടെ പരിശോധനയും വൈകാതെ ആരംഭിക്കും.
കൃത്യമായ തെളിവ് ലഭിച്ചാല്‍ ഗ്യാനേഷ് കുമാറിനെ പ്രതി ചേർക്കാനാണ് അന്വേഷണ സംഘത്തിന്റെ തീരുമാനം. ഗ്യാനേഷ് കുമാർ രണ്ട് കോടി രൂപ കൈക്കൂലിയായി ആവശ്യപ്പെട്ടെന്ന് ലീസീ ബീൻ തന്നോട് പറഞ്ഞെന്നായിരുന്നു സാജൻ വെളിപ്പെടുത്തിയിരുന്നത്.
സാജന്റെ പരാതി പ്രാഥമിക തെളിവായി കണക്കാക്കാം എന്നായിരുന്നു വിജിലൻസിന് ലഭിച്ച നിയമോപദേശം.
ഗ്യാനേഷ് കുമാർ പൊതുമരാമത്ത് വകുപ്പ് സെക്രട്ടറിയായിരുന്ന കാലത്താണ് കെഎസ്ടിപി പദ്ധതിയുമായി ബന്ധപ്പെട്ട വിവാദം ഉണ്ടായത്.
പദ്ധതിയുടെ കരാർ ഏറ്റെടുത്തിരുന്ന പതി-ബെല്‍ കമ്പനിയുടെ ചീഫ് പ്രോജക്‌ട് മാനേജറായിരുന്നു മലേഷ്യൻ എൻജിനീയറായ ലീ സീ ബീൻ. കമ്പനിയുടെ ബില്ലുകള്‍ അനുവദിക്കുന്നതുമായി ബന്ധപ്പെട്ട് രണ്ട് കോടി രൂപ കൈക്കൂലി ആവശ്യപ്പെട്ടെന്നായിരുന്നു ആരോപണം.
കൈക്കൂലി നല്‍കാൻ കമ്പനി തയ്യാറാകാതിരുന്നതോടെ ബില്ലുകള്‍ തടഞ്ഞുവെച്ചതായി ലീ സീ ബീൻ തന്നോട് പറഞ്ഞിരുന്നുവെന്നാണ് സാജൻ വ്യക്തമാക്കുന്നത്.
പിന്നീട് ലീ സീ ബീൻ മലേഷ്യയില്‍ ആത്മഹത്യ ചെയ്തു. മരണവുമായി ബന്ധപ്പെട്ട സാഹചര്യങ്ങളും കൈക്കൂലി ആരോപണങ്ങളും വിശദമായി അന്വേഷിക്കണമെന്നാണ് സാജന്റെ ആവശ്യം.
പദ്ധതിയുമായി നേരിട്ട് ബന്ധമുണ്ടായിരുന്ന കരാറുകാരനെന്ന നിലയില്‍ സാജന്റെ മൊഴിയും കൈവശമുള്ള രേഖകളും അന്വേഷണത്തില്‍ നിർണായകമാകുമെന്നാണ് വിലയിരുത്തല്‍.
