തൃശൂർ: ഗുരുവായൂരില് ഇനി അസമയത്ത് അലഞ്ഞുതിരിഞ്ഞാല് പോലീസിന്റെ പിടിവീഴും.
ക്ഷേത്രനഗരിയെ കുറ്റവിമുക്തമാക്കുക എന്ന ലക്ഷ്യത്തോടെ ടെമ്പിള് പോലീസ് സ്ട്രെയിഞ്ചർ പെട്രോള് ടീം രൂപീകരിച്ച് പ്രവർത്തനം ആരംഭിച്ചു.
സംസ്ഥാനത്തിന്റെ വിവിധ ഭാഗങ്ങളില് നിന്നായെത്തിയ ആയിരത്തോളം പേർ ഇവിടെ തെരുവില് കഴിയുന്നതായാണ് പോലീസിന്റെ കണക്ക്. അടുത്തിടെ ഗുരുവായൂരില് നടന്ന ചില പ്രധാന കുറ്റകൃത്യങ്ങളില് തെരുവില് കഴിയുന്നവർ ഉള്പ്പെട്ട സാഹചര്യത്തിലാണ് ഈ പ്രത്യേക നിരീക്ഷണം ശക്തമാക്കിയത്.
രാത്രി 10 മുതല് 12 വരെയാണ് പ്രധാന പരിശോധന നടക്കുക. തെരുവില് കഴിയുന്നവരുടെയും അപരിചിതരുടെയും പേരും മറ്റ് വിവരങ്ങളും ഫോട്ടോയും ശേഖരിച്ച് സൂക്ഷിക്കും. പരിശോധനയില് കണ്ടെത്തുന്നവരെ മൂന്ന് വിഭാഗങ്ങളായി തരംതിരിച്ചാണ് നടപടികള് സ്വീകരിക്കുന്നത്. കുറ്റകൃത്യങ്ങളില് ഏർപ്പെട്ടവർക്കെതിരെ നിയമനടപടി സ്വീകരിക്കും. വീട് വിട്ടിറങ്ങി തെരുവില് കഴിയുന്നവരെ കുടുംബങ്ങളിലേക്ക് തിരിച്ചയക്കാനുള്ള നടപടിയെടുക്കും. അവശരും സംരക്ഷണം ആവശ്യമുള്ളവരുമായവരെ സാമൂഹ്യക്ഷേമ വകുപ്പിന്റെ സഹകരണത്തോടെ പുനരധിവസിപ്പിക്കും.
ക്ഷേത്രനഗരിയെ കുറ്റവിമുക്തമാക്കലാണ് ഇതിലൂടെ ലക്ഷ്യമിടുന്നതെന്ന് ഗുരുവായൂർ എ.സി.പി. എം. സുരേന്ദ്രൻ പറഞ്ഞു. ദേവസ്വം സെക്യൂരിറ്റി ജീവനക്കാരെയും ജനമൈത്രി സമിതി പ്രതിനിധികളെയും ഉള്പ്പെടുത്തിയാണ് സംഘത്തിന്റെ പ്രവർത്തനം. പൊതുജനങ്ങളെ ഉള്പ്പെടുത്തി ഇത്തരത്തിലുള്ള പെട്രോളിംഗ് സംസ്ഥാനത്ത് തന്നെ ആദ്യമായാണെന്നാണ് പോലീസ് പറയുന്നത്. ക്ഷേത്രവളപ്പില് പോലീസിനൊപ്പം സെക്യൂരിറ്റി ജീവനക്കാരും പുറംപ്രദേശങ്ങളില് നാട്ടുകാരുടെ പ്രതിനിധികളും പരിശോധനയില് പങ്കാളികളാകും. ഒരു സംഘത്തില് എസ്.ഐ. ഉള്പ്പെടെ മൂന്ന് പോലീസുകാരും പൊതുജനങ്ങളുടെ രണ്ട് പ്രതിനിധികളുമാണ് ഉണ്ടാകുക. ടെമ്പിള് എസ്.എച്ച്.ഒ. കെ.ജി. ജയപ്രദിനാണ് ഈ ടീമിന്റെ മേല്നോട്ട ചുമതല.
