ഡൽഹി: സംസ്ഥാനത്തെ ഐഎഎസ് ഉദ്യോഗസ്ഥരുടെ കൂട്ട സ്ഥലമാറ്റത്തില്‍ യുഡിഎഫ് സർക്കാരിനെതിരെ സിപിഐഎം സംസ്ഥാന സെക്രട്ടറി എംവി ഗോവിന്ദൻ.
വകുപ്പുതലത്തില്‍ ഉദ്യോഗസ്ഥരെ മാറ്റുന്നത് അഴിമതി നടത്താനാണെന്നും വകുപ്പ് മന്ത്രി അറിയാതെ ബാർ ലൈസൻസ് അനുവദിച്ചുവെന്നത് വിചിത്രമായ സംഭവമാണെന്നും എം.വി. ഗോവിന്ദൻ ഡല്‍ഹിയില്‍ മാധ്യമങ്ങളോട് പ്രതികരിച്ചു.
സിവില്‍ സർവീസ് ബോർഡ് ചേരാതെയുള്ള സ്ഥലംമാറ്റത്തിനെതിരെ ഐഎഎസ് ഉദ്യോഗസ്ഥർ തന്നെ രംഗത്തെത്തിയിരുന്നുവെന്ന് എം.വി. ഗോവിന്ദൻ പറഞ്ഞു. ബാർ ലൈസൻസ് അനുവദിച്ചപ്പോള്‍ ഉദ്യോഗസ്ഥർ അതിനെ അംഗീകരിക്കുകയും വിവാദമായതോടെ ഉത്തരവാദിത്തത്തില്‍നിന്ന് ഒഴിഞ്ഞുമാറുകയും ചെയ്യുന്ന സമീപനമാണ് സ്വീകരിക്കുന്നതെന്നും അദ്ദേഹം വിമർശിച്ചു. ഇത് ഇരട്ടത്താപ്പാണെന്നും ഉദ്യോഗസ്ഥരെ കൂട്ടത്തോടെ സ്ഥലംമാറ്റുന്നത് അഴിമതി നടത്താൻ സൗകര്യമുള്ളവരെ വകുപ്പുകളില്‍ നിയമിക്കാനാണെന്നും സിപിഐഎം സംസ്ഥാന സെക്രട്ടറി ആരോപിച്ചു.
കാലടി സംസ്കൃത സർവകലാശാലയിലെ വിദ്യാർഥികളുടെ സസ്പെൻഷൻ പിൻവലിക്കാൻ മാപ്പ് എഴുതി നല്‍കണമെന്ന വിസിയുടെ നിലപാടിനെതിരെയും എം.വി. ഗോവിന്ദൻ പ്രതികരിച്ചു. മാപ്പ് പറയുന്ന രീതി ആർഎസ്‌എസുകാരുടേതാണെന്നും അത് കേരളത്തിലെ വിദ്യാർഥി സമൂഹത്തോട് നടപ്പാക്കാനാകില്ലെന്നും അദ്ദേഹം പറഞ്ഞു. കോടതിയില്‍നിന്ന് പ്രതികൂല നടപടിയുണ്ടായാല്‍ ശക്തമായ പ്രതിഷേധം ഉയർത്തുമെന്നും വ്യക്തമാക്കി.
