ന്യൂഡൽഹി: തെറ്റായ അവകാശവാദങ്ങളും നിരോധിക്കപ്പെട്ട ഉൽപ്പന്നങ്ങളും വിൽപ്പന നടത്തിയതുൾപ്പെടെയുള്ള നിയമലംഘനങ്ങൾ കണ്ടെത്തിയതിന്
പിന്നാലെ ആമസോൺ, സ്വിഗ്ഗി ഇൻസ്റ്റമാർട്ട്, ബിഗ്ബാസ്കറ്റ്, ഫ്ലിപ്കാർട്ട് ഇന്ത്യ, സെപ്റ്റോ എന്നീ പ്രമുഖ ഇ-കോമേഴ്സ് പ്ലാറ്റ്ഫോമുകൾക്കെതിരെ പിഴ ചുമത്തി എഫ്എസ്എസ്എഐ.
എഫ്എസ്എസ്എഐ ഔദ്യോഗിക സോഷ്യൽ മീഡിയ പ്ലാറ്റ്ഫോമിലൂടെയാണ് ഇക്കാര്യം അറിയിച്ചത്.
ഇത്തരം ഇ-കോമേഴ്സ് പ്ലാറ്റ്ഫോമുകൾക്കെതിരെ വ്യാപകമായി പരിശോധന നടന്നുവരികയാണെന്നും എഫ്എസ്എസ്എഐ അറിയിച്ചിട്ടുണ്ട്.
'ഹാപിലോ പ്രീമിയം ഡേറ്റ് ബൈറ്റ്സ്' എന്ന ലഘുഭക്ഷണത്തെക്കുറിച്ച് തെറ്റായ വിവരങ്ങളും
അവകാശവാദങ്ങളും ഉന്നയിച്ചതിനാണ് ഈ പ്ലാറ്റ്ഫോമുകൾക്കെതിരെ പ്രധാനമായും നടപടിയെടുത്തിരിക്കുന്നത്.
കൂടാതെ മിൽക്കി മിസ്റ്റ് കമ്പനിയുടെ ചില പാലുൽപ്പന്നങ്ങൾളെക്കുറിച്ചും (ഫ്രഷ് ലോ ഫാറ്റ് ക്രീം, ഫാം ഫ്രഷ് തൈര്,
ഗ്രീക്ക് യോഗർട്ട്) ഈ പ്ലാറ്റ്ഫോമുകൾ തെറ്റായ വിവരങ്ങളും അവകാശവാദങ്ങളുമാണ് നൽകിയതായും എഫ്എസ്എസ്എഐ കണ്ടെത്തിയിട്ടുണ്ട്.
നിരോധിക്കപ്പെട്ട ഭക്ഷ്യ വസ്തുവായ 'ഉമ്മത്തിന്റെ പഴങ്ങളും വിത്തുകളും' വിൽക്കുകയും പ്രദർശിപ്പിക്കുകയും
ചെയ്തതിനെതിരെ ഇതിനോടകം ഈ പ്ലാറ്റ്ഫോമുകൾക്ക് എഫ്എസ്എസ് ആക്ട് പ്രകാരം ഇതിനോടകം നടപടിയെടുത്തിട്ടുണ്ട്.
ഫുഡ് ബിസിനസ് ഓപ്പറേറ്റർമാർക്കും ഇ-കോമേഴ്സ് കമ്പനികൾക്കുമെതിരെയുള്ള പരിശോധനകളും നിയമനടപടികളും കഴിഞ്ഞ ആറുമാസമായി എഫ്എസ്എസ്എഐ കൂടുതൽ ശക്തമാക്കിയിരിക്കുകയാണ്.
