കോഴിക്കോട്: ബേപ്പൂർ ഹാർബറില്‍ ബോട്ടിന്റെ സ്റ്റോർറൂമില്‍ നിന്നുള്ള വിഷവാതകം ശ്വസിച്ച്‌ തൊഴിലാളി മരിച്ച സംഭവത്തില്‍ മനുഷ്യാവകാശ കമ്മീഷൻ സ്വമേധയാ കേസെടുത്തു.
ഫിഷറീസ് ഡയറക്ടറും ജില്ലാ കളക്ടറും സമഗ്രമായി പരിശോധിച്ച്‌ ഒരാഴ്ചക്കകം റിപ്പോർട്ട് സമർപ്പിക്കണമെന്ന് കമ്മീഷൻ ആവശ്യപ്പെട്ടു.
പശ്ചിമബംഗാളിലെ പർഗാന സ്വദേശി ദിലീപ് സുർ (53) വിഷവാതകം ശ്വസിച്ച്‌ മരിച്ചത്. ഒപ്പമുണ്ടായിരുന്ന തൊഴിലാളി സച്ചിൻ ദാസ് (25) ഗുരുതരാവസ്ഥയില്‍ സ്വകാര്യ ആശുപത്രിയില്‍ ചികിത്സയിലാണ്.
ചീഞ്ഞ മത്സ്യത്തില്‍ നിന്നുയർന്ന വിഷവാതകം ശ്വസിച്ചാണ് മരണം സംഭവിച്ചതെന്ന് പറയുന്നു.
മത്സ്യബന്ധന ബോട്ടുകളിലെ അനധികൃത വള മത്സ്യ ശേഖരമുളള ടാങ്കിലേക്ക് മത്സ്യത്തൊഴിലാളികളെ ഇറക്കുന്നത് ആശങ്കയുണ്ടാക്കുന്നതാണെന്നും പരാതിയുണ്ട്.
ജീവൻ പണയം വെച്ചാണ് മത്സ്യബോട്ടുകളിലെ ഉള്ളറകളില്‍ ഇവർ പണിയെടുക്കുന്നത്. ഇതിനുള്ളിലെ അമോണിയ കലർന്ന വിഷവാതകമാണ് അപകടങ്ങള്‍ക്ക് കാരണമാകുന്നത്.
ബേപ്പൂർ ഹാർബറില്‍ ഒരു മാസം മുമ്പ് ഇതേ സാഹചര്യത്തില്‍ രണ്ടുപേർ മരിച്ചതായി പരാതി ഉയർന്നിട്ടുണ്ട്. ഒരു ദിവസം ആയിരക്കണക്കിന് രൂപ ഓഫർ നല്‍കിയാണ് അനധികൃതമായി തൊഴിലാളികളെ ഇറക്കുന്നതെന്നും പരാതിയുണ്ട്.
ഇക്കാര്യങ്ങങ്ങള്‍ ജില്ലാ കളക്ടറും ഫിഷറീസ് ഡയറക്ടറും അടിയന്തരമായി പരിശോധിക്കണമെന്നും കമ്മീഷൻ ആവശ്യപ്പെട്ടു.
