പൂനെ : നാട്ടിൽ വൻതുക തട്ടിപ്പ് നടത്തിയ കേസില് പ്രതിയായ ഇന്ത്യൻ യുവതിയെ യുഎഇയില് നിന്ന് ഇന്റർപോളിന്റെ സഹായത്തോടെ സിബിഐ വിദഗ്ദ്ധമായി ഇന്ത്യയിലെത്തിച്ചു. സാമ്പത്തിക തട്ടിപ്പ് നടത്തി വിദേശത്തേക്ക് മുങ്ങിയ പ്രതികള്ക്ക് പൂട്ടിടുന്നതിന്റെ ഭാഗമായാണ് ഈ നടപടിയും. ആഭ്യന്തര-വിദേശകാര്യ മന്ത്രാലയങ്ങളുടെ ശക്തമായ ഇടപെടലോടെ ഈ മാസം മൂന്നിനാണ് വിശാഖ റാത്തോഡ് എന്ന പ്രതിയെ പിടികൂടി നാട്ടിലെത്തിച്ചത്.
എന്നാല് ഈ നടപടിയെക്കുറിച്ച് യുഎഇ അധികൃതർ ഔദ്യോഗികമായി ഇതുവരെ പ്രസ്താവനകളൊന്നും പുറത്തിറക്കിയിട്ടില്ല. സാധാരണക്കാരായ നിരവധി ആളുകളിൽ നിന്നും വിവിധ പദ്ധതികളില് നിക്ഷേപിക്കാമെന്ന് പറഞ്ഞ് വിശ്വസിപ്പിച്ചാണ് വിശാഖ വൻതുകകൾ തട്ടിയെടുത്തത്. വിശ്വാസവഞ്ചന കുറ്റത്തിന് പുറമെ അനധികൃതമായി ഫണ്ട് കൈകാര്യം ചെയ്തതിനും പ്രതിയുടെ പേരില് കേസുകളുണ്ട്.
ഈ തട്ടിപ്പുകള്ക്കായി ഒന്നിലേറെ ബാങ്ക് അക്കൗണ്ടുകള് പ്രതി ഉപയോഗിച്ചിരുന്നതായും അന്വേഷണത്തില് വ്യക്തമായിട്ടുണ്ട്. തുടർന്ന് നടത്തിയ രഹസ്യ നീക്കങ്ങള്ക്കൊടുവിലാണ് ഇന്റർപോളിന്റെയും കേന്ദ്ര ഏജൻസികളുടെയും സഹായത്തോടെ ഇവരെ കുടുക്കിയത്. വിശാഖയെ യുഎഇയില് നിന്ന് പിടികൂടിയ ശേഷം മഹാരാഷ്ട്ര പൊലീസാണ് പൂനെയിലേക്ക് എത്തിച്ചത്.
