തിരുവനന്തപുരം: സംസ്ഥാനത്ത് പർച്ചവ്യാധി വ്യാപനം രൂക്ഷമായി തുടരുന്നു. ദിവസേന 7,000-ത്തിലധികം ആളുകളാണ് പനിയെ തുടർന്ന് മാത്രം ആശുപത്രികളില് ചികിത്സ തേടുന്നത്.
ഈ മാസം ഇതുവരെ മാത്രം 2,36,767 പേർ ചികിത്സ തേടിയതായി കണക്കുകള് വ്യക്തമാക്കുന്നു. മഴക്കാലം കഴിഞ്ഞിട്ടും പനിയുടെ കണക്കുകളില് കുറവ് വന്നിട്ടില്ലാത്തത് ആരോഗ്യമേഖലയ്ക്ക് കനത്ത വെല്ലുവിളിയാകുന്നുണ്ട്.
മഴക്കാലത്തിന്റെ തുടക്കത്തില് ആരംഭിച്ച പനി വ്യാപനം ഇപ്പോഴും അതേ തോതില് തുടരുകയാണ്. കഴിഞ്ഞ നാല് മാസത്തെ കണക്കുകള് പരിശോധിച്ചാല് പ്രതിദിനം ശരാശരി 8,000-ത്തോളം പേർ പനി ബാധിച്ച് ചികിത്സ തേടുന്നുണ്ട്.
ഏറ്റവും ഒടുവിലത്തെ കണക്കുകള് പ്രകാരം ഇന്നലെ മാത്രം സംസ്ഥാനത്ത് 8,141 പേർക്കാണ് പനി സ്ഥിരീകരിച്ചത്. ഇതില് മലപ്പുറം ജില്ലയിലാണ് പനി ബാധിതരുടെ എണ്ണം ഏറ്റവും കൂടുതല് ഉള്ളത്. അവിടെ മാത്രം പ്രതിദിന കണക്കുകള് 1,500-ന് മുകളിലാണ്.
