അങ്കമാലി: അങ്കമാലി ആര് ടി ഓഫീസിനു കീഴില് വെഹിക്കിള് ഇന്സ്പക്ടറുടെ വ്യാജ സീലും ഒപ്പും ഉണ്ടാക്കി ടൂറിസ്റ്റ് ബസുകള്ക്ക് വ്യാജപെര്മിറ്റ് നല്കിയതായി ആരോപണം. സംഭവത്തില് അന്വേഷണം പ്രാദേശിക ഡിവൈഎഫ്ഐ നേതാവിലേക്ക് നീളുന്നതായി സൂചന.
രാജഗിരി കോളേജിലെ വിദ്യാര്ത്ഥികളുടെ പഠനയാത്രയ്ക്കായി ഏര്പ്പെടുത്തിയ ബസ്സുകളില് ഒന്നിനാണ് വകുപ്പിന്റെ വ്യാജ സുരക്ഷാ പരിശോധനാ റിപ്പോര്ട്ട് ഉണ്ടാക്കി നല്കിയത്.
സ്കൂള്, കോളേജ് വിദ്യാര്ത്ഥികളുടെ പഠനയാത്രകള്ക്ക് പോകുന്ന വാഹനങ്ങള്ക്ക് എംവിഡി ഉദ്യോഗസ്ഥരുടെ സുരക്ഷാ പരിശോധനയും അനുമതി പത്രവും നിര്ബന്ധമാക്കിയിരുന്നു. ലൈറ്റുകളും മറ്റ് നിയമലംഘനങ്ങളും ഉള്ള ബസുകള്ക്ക് സാധാരണയായി അനുമതി നല്കാറില്ല.
കഴിഞ്ഞ ശനിയാഴ്ച രാജഗിരി കോളേജില് നിന്നും പോകേണ്ടിയിരുന്ന പഠനയാത്രയുടെ തലേദിവസമാണ് തട്ടിപ്പ് സംബന്ധിച്ച് വിവരം ലഭിച്ചതെന്ന് മോട്ടോര് വെഹിക്കിള് ഇന്സ്പക്ടര് റോഷന് പ്രകാശ് പറഞ്ഞു.
മുന്പും സമാന രീതിയില് വാഹനം ട്രിപ്പ് പോയി വന്നതിന് ശേഷം പരാതികള് ഉയര്ന്നിരുന്നു. ഈ പശ്ചാത്തലത്തില്, കോളേജ് അധികാരികള്ക്ക് റോഷന് വ്യാജ രേഖയെക്കുറിച്ച് മുന്നറിയിപ്പ് നല്കുകയും യാത്ര റദ്ദാക്കുകയുമായിരുന്നു. കോളേജിലെ ഏഴ് ബസ്സുകളില് ഒന്നിനാണ് വ്യാജ രേഖ ചമച്ച് പെര്മിറ്റ് കരസ്ഥമാക്കിയത്.
മുന്പ് റോഷന് നല്കിയ ഔദ്യോഗിക പരിശോധനാ റിപ്പോര്ട്ടുകളുടെ ഫോര്മാറ്റും ഡിപ്പാര്ട്ട്മെന്റിന്റെ ഔദ്യോഗിക ലെറ്റര്ഹെഡും സ്കാന് ചെയ്ത് എഡിറ്റ് ചെയ്താണ് വ്യാജ രേഖ നിര്മ്മിച്ചതെന്ന് കരുതപ്പെടുന്നു. അങ്കമാലിയിലെ ഒരു പ്രിന്റിംഗ് സ്ഥാപനത്തില് വെച്ചാണ് ഇത് പ്രിന്റ് എടുത്തതെന്നാണ് പ്രാഥമിക സൂചന.
പോലീസിലും മോട്ടോര് വാഹന വകുപ്പിലെ ഉയര്ന്ന ഉദ്യോഗസ്ഥര്ക്കും (DTC) എ വി ഐ പരാതി നല്കിയതിന്റെ അടിസ്ഥാനത്തില് കേസ് രജിസ്റ്റര് ചെയ്തിട്ടുണ്ട്.
