പാലക്കാട്: വാക്സിനെടുക്കാനെത്തിയ കുഞ്ഞുങ്ങള്‍ക്ക് കാലാവധി കഴിഞ്ഞ പാരസെറ്റമോള്‍ സിറപ്പ് നല്‍കിയ സംഭവത്തില്‍ പുതുക്കോട് പ്രാഥമികാരോഗ്യ കേന്ദ്രത്തിലെ രണ്ട് ജൂനിയർ പബ്ലിക് ഹെല്‍ത്ത് നഴ്‌സുമാർക്ക് സസ്‌പെൻഷൻ.
മരുന്ന് വിതരണത്തില്‍ വീഴ്ച വരുത്തിയെന്ന് കണ്ടെത്തിയതിനെ തുടർന്നാണ് നടപടി.
ഒരു വയസിന് മുമ്പുള്ള പ്രതിരോധ കുത്തിവെപ്പ് എടുക്കാനെത്തിയ കുഞ്ഞുങ്ങള്‍ക്കാണ് കാലാവധി കഴിഞ്ഞ് ഒരു മാസം പിന്നിട്ട പാരസെറ്റമോള്‍ സിറപ്പ് നല്‍കിയത്. കഴിഞ്ഞ ബുധനാഴ്ചയായിരുന്നു സംഭവം. മരുന്നിന്റെ കാലാവധി കഴിഞ്ഞ വിവരം ശ്രദ്ധയില്‍പ്പെട്ട രക്ഷിതാക്കള്‍ പരാതി ഉന്നയിച്ചതോടെയാണ് സംഭവം പുറത്തറിഞ്ഞത്.
പരാതിക്ക് പിന്നാലെ മരുന്ന് മാറ്റി നല്‍കിയതായും രക്ഷിതാക്കള്‍ ആരോപിച്ചിരുന്നു. സംഭവത്തില്‍ ഏഴോളം രക്ഷിതാക്കള്‍ കാലാവധി കഴിഞ്ഞ സിറപ്പ് ആരോഗ്യകേന്ദ്രത്തില്‍ തിരിച്ചേല്‍പ്പിച്ചതായാണ് കണ്ടെത്തല്‍.
മരുന്നിന്റെ കാലാവധി പരിശോധിക്കാതെ വിതരണം ചെയ്തതിലെ വീഴ്ചയാണ് രണ്ട് നഴ്‌സുമാർക്കെതിരായ നടപടിക്ക് കാരണമായത്.
