കോഴിക്കോട്: സിഎംആര്എല്-എക്സാലോജിക് സാമ്പത്തിക ഇടപാട് കേസില് അന്വേഷണം കൂടുതല് വീണ്ടും ശക്തമാക്കി എന്ഫോഴ്സ്മെന്റ് ഡയറക്ടറേറ്റ് (ഇഡി).
കേസിന്റെ രണ്ടാം ഘട്ട അന്വേഷണത്തിന്റെ ഭാഗമായി ഒരേസമയം നാലിടങ്ങളിലാണ് ഇഡി സംഘം മിന്നല് പരിശോധന നടത്തുന്നത്. പ്രധാനമായും കോഴിക്കോട് കേന്ദ്രീകരിച്ച് പുരോഗമിക്കുന്ന ഈ പരിശോധനകള് സിപിഎം നേതാവും മുന് മന്ത്രിയുമായ പി.എ. മുഹമ്മദ് റിയാസുമായി അടുപ്പമുള്ളവരിലേക്കും നീളുന്നതായാണ് പുറത്തുവരുന്ന വിവരങ്ങള്.
ഡിടിപിസിയുടെ മുന് ഡെസ്റ്റിനേഷന് മാനേജറും കോഴിക്കോട് കുണ്ടൂപറമ്പ് സ്വദേശിയുമായ നന്ദുലാല്, സിപിഎം ജില്ലാ സെക്രട്ടേറിയറ്റ് അംഗവും ജില്ലാ സ്പോര്ട്സ് കൗണ്സില് പ്രസിഡന്റുമായ നിഖില് എന്നിവരുടെ വീടുകളിലാണ് നിലവില് പരിശോധന പുരോഗമിക്കുന്നത്. ഇരുവരും പി.എ. മുഹമ്മദ് റിയാസിന്റെ അടുത്ത സുഹൃത്തുക്കളാണ്. മുന് മുഖ്യമന്ത്രി പിണറായി വിജയന്റെയും മുഹമ്മദ് റിയാസിന്റെയും വീടുകളില് മുന്പ് നടന്ന ഇഡി പരിശോധനകളില് നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് ഇപ്പോള് റിയാസുമായി ബന്ധമുള്ള കേന്ദ്രങ്ങളിലേക്കും അന്വേഷണം വ്യാപിപ്പിച്ചിരിക്കുന്നത്.
സിഎംആര്എല്ലില് നിന്ന് വീണ തൈക്കണ്ടിയുടെ കമ്പനിക്ക് ലഭിച്ചുവെന്ന് കരുതുന്ന 1.78 കോടി രൂപയുടെ ഇടപാടുകളാണ് കേസിലെ പ്രധാന അന്വേഷണ വിഷയം. ഈ തുക എവിടെ നിന്നൊക്കെ ലഭിച്ചു, പിന്നീട് ഇത് ആരിലേക്കൊക്കെ കൈമാറി, ഏതെല്ലാം ആവശ്യങ്ങള്ക്കായി ചെലവഴിച്ചു തുടങ്ങിയ കാര്യങ്ങളിലാണ് ഇഡി വ്യക്തത തേടുന്നത്. വീണയുടെ വീട്ടില് നടത്തിയ പരിശോധനയില് കണ്ടെടുത്ത ഡയറിയില് പണമിടപാടുകള് സംബന്ധിച്ച് ചില വിവരങ്ങള് ഉണ്ടായിരുന്നതായും, ഇതിന്റെ തുടര്ച്ചയായാണ് ഇപ്പോഴത്തെ പരിശോധനകളെന്നുമാണ് റിപ്പോര്ട്ടുകള്. എറണാകുളത്തെ ആപ്പ് കമ്പനിയായ 'സുലൂസ്', നന്ദുലാല്, നിഖില്, ഷൈജല്, ഫൈജാസ് തുടങ്ങിയവരുമായി ബന്ധപ്പെട്ട സാമ്പത്തിക ഇടപാടുകളും നിലവില് ഇഡിയുടെ അന്വേഷണ പരിധിയിലുണ്ട്.
കേസുമായി ബന്ധപ്പെട്ട് മുന് മുഖ്യമന്ത്രി പിണറായി വിജയന്റെ മകള് വീണയെ മുന്പ് രണ്ടുതവണ ഇഡി ചോദ്യം ചെയ്തിരുന്നു. കൂടാതെ സിഎംആര്എല്ലിലെ ഉന്നത ഉദ്യോഗസ്ഥരെയും മറ്റ് പ്രധാന വ്യക്തികളെയും ചോദ്യം ചെയ്തു. നിലവില് മുഹമ്മദ് റിയാസിനെതിരെയോ വാര്ത്തകളില് പരാമര്ശിക്കപ്പെടുന്ന വ്യക്തികള്ക്കെതിരെയോ കുറ്റങ്ങള് തെളിയിക്കപ്പെട്ടിട്ടില്ലെങ്കിലും, അന്വേഷണത്തിന്റെ ഭാഗമായി ഉയര്ന്നുവന്ന സംശയങ്ങളുടെയും വിവരങ്ങളുടെയും അടിസ്ഥാനത്തില് ചോദ്യം ചെയ്യലുകളും തെളിവെടുപ്പുകളും തുടരുകയാണ്. വരും മണിക്കൂറുകളില് കൂടുതല് വ്യക്തത കൈവരുമെന്നാണ് കരുതപ്പെടുന്നത്.
