തിരുവനന്തപുരം: എക്സൈസ് വകുപ്പില്‍ അടി മുതല്‍ മുടി വരെ പിടിമുറുക്കിയതോടെ മന്ത്രി എം ലിജുവിനെ തളയ്ക്കാന്‍ തന്ത്രങ്ങള്‍ ഒരുക്കുകയാണ് സംസ്ഥാനത്തെ ബാര്‍ ലോബി.
മുന്‍പ് കോഴ ആരോപണം ഉയര്‍ത്തി മന്ത്രിയെ രാജി വയ്പിച്ച വിരുതന്മാരാണ് ബാര്‍ ഉടമകള്‍.
യുഡിഎഫ് അധികാരത്തില്‍ എത്താതിരിക്കാന്‍ പതിനെട്ടടവും പയറ്റിയ ബാര്‍ ലോബി ഇപ്പോള്‍ മദ്യ മാഫിയകള്‍ക്ക് ഒരു തരത്തിലും പിടികൊടുക്കാത്ത ഒരാള്‍ മന്ത്രിയായി കൂടി എത്തിയതോടെ കടുത്ത സമ്മര്‍ദ്ദത്തിലാണ്.
ബാര്‍ മുതലാളിമാര്‍ക്കും എക്സൈസ് ഉദ്യോഗസ്ഥ സംഘത്തിനും ഒരു വിധത്തിലും ഒരു വിധത്തിലും വഴങ്ങാത്ത ലിജുവിനെ ഏത് വിധേനയും പുകച്ചു ചാടിക്കാനാണ് മദ്യലോബിയുടെ നീക്കം.അഴിമതിയോ മറ്റ് താല്‍പര്യങ്ങളോ ഇല്ലെന്നതാണ് ലിജുവിന്‍റെ ന്യൂനതയായി ബാര്‍ ഉടമകള്‍ കാണുന്നത്.
കഴിഞ്ഞ ദിവസം ഉദ്യോഗസ്ഥര്‍ വഴി ഏതാനും ബാറുകള്‍ക്ക് ഇവര്‍ നേരിട്ട് ലൈസന്‍സ് തരപ്പെടുത്തിയത് കൈയ്യോടെ പൊക്കിയത് ലിജു ഇടപെട്ടാണ്.
ഉദ്യോഗസ്ഥ തലത്തില്‍ നിന്നുതന്നെ മന്ത്രിക്ക് വേണ്ടപ്പെട്ടവരാണ് വിവരം ചോര്‍ത്തിയതെന്നാണ് ഇവര്‍ക്ക് സംശയം. സംഭവം അറിഞ്ഞ് ഞൊടിയിടകൊണ്ട് ഡെപ്യൂട്ടി കമ്മീഷണറെ തെറുപ്പിച്ച മന്ത്രി കര്‍ശന ഇടപെടലാണ് നടത്തിയത്.
മന്ത്രിമാര്‍ക്ക് ലൈസന്‍സ് അനുവദിക്കാനുള്ള അധികാരം ഡെപ്യൂട്ടി കമ്മീഷണര്‍മാര്‍ക്ക് നല്‍കിയ മുന്‍ സര്‍ക്കാരിന്‍റെ നടപടിക്കെതിരെ പുതിയ മദ്യനയത്തില്‍ തിരുത്തല്‍ വരുത്താന്‍ തീരുമാനിച്ച മന്ത്രി ലിജു അതിനു മുന്നോടിയായി സര്‍ക്കാര്‍ അറിയാതെ ഒരു ഡെപ്യൂട്ടി കമ്മീഷണര്‍മാരും ഈ അധികാരം ഉപയോഗിക്കാന്‍ പാടില്ലെന്ന് നേരത്തെ തന്നെ കര്‍ശന നിര്‍ദേശം നല്‍കിയിരുന്നു.
എന്നാല്‍ ബാര്‍ ലോബി പിന്നിലുണ്ടെന്ന ധൈര്യത്തിലാണ് ഡെപ്യൂട്ടി കമ്മീഷണര്‍മാര്‍ മന്ത്രി അറിയാതെ ഈ നീക്കം നടത്തിയത്.
ഇതേ തുടര്‍ന്നാണ് മാധ്യമ വാര്‍ത്തകളില്‍ മന്ത്രിക്കെതിരെ വ്യാപകമായ വിമര്‍ശനങ്ങളുമായി പ്രതിപക്ഷം ഉള്‍പ്പെടെ രംഗത്തിറങ്ങിയത്.
മന്ത്രി അറിയാതെ മൂന്ന് ബാറുകള്‍ക്ക് ലൈസൻസ് ലഭിച്ചതില്‍ എക്സൈസ് മന്ത്രി എം. ലിജുവിനെതിരായ ആരോപണങ്ങള്‍ അടിസ്ഥാനമില്ലാത്തതും വസ്തുതകള്‍ക്ക് നിരക്കാത്തതുമാണെന്ന് ഇതോടെ ബോധ്യമായി.
നിലവിലെ നിയമപ്രകാരം സ്റ്റാർ ക്ളാസിഫിക്കേഷനുണ്ടെങ്കില്‍ അപേക്ഷകർക്ക് ലൈസൻസ് നല്‍കിയേ തീരൂ. അതാണ് നിയമം. ഇത് കേന്ദ്ര നിയമത്തിന്‍റെ ചുവടുപിടിച്ചുള്ളതാണ്. അല്ലെങ്കില്‍ ചട്ടഭേദഗതി വരുത്തണം.
നവംബർ പകുതിയോടെ പുതിയ മദ്യനയം പ്രഖ്യാപിക്കാനുള്ള നടപടികള്‍ പുരോഗമിക്കുകയാണ്. ലൈസൻസ് ഫീസില്‍ വ്യത്യാസം വരുത്താമെന്നല്ലാതെ പുതിയ ലൈസൻസുകള്‍ നല്‍കില്ലെന്ന തീരുമാനത്തിലേക്കൊന്നും എത്താനാവില്ല.
വിദേശമദ്യ ചട്ടമനുസരിച്ച്‌ ബാർ ഹോട്ടല്‍ ലൈസൻസ് പുതുക്കണമെങ്കില്‍ കേന്ദ്ര ടൂറിസം മന്ത്രാലയത്തിന്റെ സ്റ്രാർ ക്ലാസിഫിക്കേഷൻ സർട്ടിഫിക്കറ്റ് നിർബന്ധമാണ്.
കേന്ദ്രടൂറിസം മന്ത്രാലയത്തിന്റെ പോർട്ടലിലാണ് അപേക്ഷിക്കേണ്ടത്. കേന്ദ്ര ടൂറിസം മന്ത്രാലയ പ്രതിനിധികളും സംസ്ഥാന ടൂറിസം അധികൃതരും അടങ്ങുന്ന സംഘം പരിശോധന നടത്തി ക്ലാസിഫിക്കേഷൻ പുതുക്കി നല്‍കും.
കാലാവധി തീരുന്നതിന് മുമ്പ് അപേക്ഷ നല്‍കിയില്ലെങ്കില്‍ പുതിയ അപേക്ഷയായി മാത്രമേ കേന്ദ്രം പരിഗണിക്കുകയുള്ളൂ.
സംസ്ഥാന സർക്കാരിന്റെ മദ്യനയം വരുംവരെ പുതിയ ബാർലൈസൻസുകള്‍ അനുവദക്കേണ്ടതില്ലെന്ന് എക്സൈസിന് മന്ത്രി കർശന നിർദ്ദേശം നല്‍കിയിട്ടുണ്ടെങ്കിലും പുതിയ ലൈസൻസ് നല്‍കില്ലെന്നത് കേന്ദ്രനിയമപ്രകാരം അസാദ്ധ്യമായ കാര്യമാണ്.
പുതിയ ബാർ ലൈസൻസിനായി 40അപേക്ഷകള്‍ നിലവില്‍ ഫയലിലുണ്ട്.നിലവിലുള്ള ചട്ടപ്രകാരം ഇവയ്ക്ക് എന്നെന്നേക്കുമായി ലൈസൻസ് നല്‍കാതിരിക്കാനാവില്ല.
2011ല്‍ അധികാരത്തിലെത്തിയ ഉമ്മൻചാണ്ടി സർക്കാരാണ് നിലവാരമില്ലെന്ന പേരില്‍ 418 ബാറുകള്‍ പൂട്ടിയത്.പിന്നീട് 2014ല്‍ അന്നത്തെ കെപിസിസി പ്രസിഡന്റ് വി.എം.സുധീരനുമായുള്ള തർക്കത്തെ തുടർന്ന് 312 ബാറുകള്‍ കൂടി പൂട്ടി.
ഇതിനെതിരെ ബാറുടമകള്‍ കോടതിയെ സമീപിക്കുകയും ചെയ്തു. എന്നാല്‍ പിന്നീട് പൂട്ടിയ ബാറുകളില്‍ താത്പര്യമുള്ളവർക്ക് ബിയർ, വൈൻ പാർലർ അനുവദിക്കാനും യുഡിഎഫ് തീരുമാനിച്ചു.
2016ല്‍ എല്‍ഡിഎഫ് സർക്കാർ അധികാരത്തിലെത്തിയ ശേഷമാണ് വീണ്ടും ബാറുകള്‍ തുറന്നത്. ഇതിനാവശ്യമായ നിയമഭേദഗതിയും കൊണ്ടുവന്നു.
അതിൻപ്രകാരം 2014 മാർച്ച്‌ 31 വരെ ബാർ ലൈസൻസ് (എഫ് എല്‍ 3) ഉണ്ടായിരുന്ന ഹോട്ടലുകള്‍ക്ക് കേന്ദ്ര ടൂറിസം വകുപ്പിന്റെ ത്രീ സ്റ്റാർ മുതല്‍ മുകളിലേക്കുള്ള ക്ലാസിഫക്കേഷൻ ലഭിക്കുന്ന മുറയ്ക്ക് അപേക്ഷിച്ചാല്‍ ബാർ ലൈസൻസ് നല്‍കാമെന്നും വ്യവസ്ഥ ചെയ്തു. ഈ ചട്ടം ഇപ്പോഴും നിലവിലുണ്ട്.
ചട്ടപ്രകാരം മുൻപ് ബാർ ലൈസൻസ് ഉണ്ടായിരുന്നവരും പിന്നീട് ബിയർ, വൈൻ ലൈസൻസലേക്ക് മാറിയവരുമായ ലൈസൻസികള്‍ക്ക് സ്റ്റാർ ക്ലാസിഫക്കേഷൻ ലഭിച്ചാല്‍ ബാർ ലൈസൻസ് അനുവദിക്കാൻ എക്സൈസ് ഡെപ്യൂട്ടി കമ്മീഷണർമാർക്ക് അധികാരമുണ്ട്.
ഇപ്പോഴത്തെ മൂന്ന് ലൈസൻസുകളും അനുവദിച്ചത് ഇതിന്റെ അടിസ്ഥാനത്തിലാണ്.
വിരമിച്ച പല എക്സൈസ് ഉദ്യോഗസ്ഥരും ഇത്തരത്തിലുള്ള കാര്യങ്ങളില്‍ ഇടപെടുന്നുമെന്നും അവരുടെ ലോബിയില്‍പ്പെട്ടവർ അനധികൃതമായി സ്വത്തുക്കള്‍ സമ്പാദിച്ചെന്നുമുള്ള വിവരങ്ങളും സർക്കാരിനുണ്ട്.
പിണറായി സർക്കാരിന്റെ കാലത്തെ നടപടികള്‍ യു.ഡി.എഫ് ഭരണത്തിലെത്തിയിട്ടും ഉദ്യോഗസ്ഥർ തുടരുന്നതാണ് കുഴപ്പങ്ങള്‍ക്ക് ഇടയാക്കിയത്.
ഉദ്യോഗസ്ഥ തലത്തില്‍ ബാർ ലൈസൻസ് അനുവദിച്ചതില്‍ അസ്വഭാവികതയുണ്ടെന്ന് മന്ത്രി ലിജു വ്യക്തമാക്കിയിരുന്നു. സംസ്ഥാനത്ത് നിലവില്‍ സ്റ്റാർ ക്ലാസിഫിക്കേഷൻ കിട്ടിയ 40 ഹോട്ടലുകള്‍ ബാർ ലൈസൻസിന് വേണ്ടിയുള്ള അപേക്ഷകള്‍ നല്‍കിയിട്ടുണ്ട്.
എന്നാല്‍, ചട്ടം അനുകൂലമാണെങ്കിലും മദ്യനയം അടിസ്ഥാനമാക്കി മാത്രമേ പുതിയ ബാർ ലൈസൻസുകള്‍ അനുവദിക്കാൻ കഴിയൂ എന്ന് ഹൈക്കോടതിയില്‍ യുഡിഎഫ് സർക്കാർ അറിയിച്ചിരുന്നു. ഇത് ഹൈക്കോടതി അംഗീകരിച്ചിരുന്നു.
നവംബർ 30 വരെ ഇതിന് സമയം അനുവദിച്ചിട്ടുണ്ട്. അതിനകം മദ്യനയം കൊണ്ടുവരും. അബ്കാരി നിയമപ്രകാരം ഒരു ബാർ പത്തുമാസം അടഞ്ഞുകിടന്നാല്‍ ലൈസൻസ് റദ്ദാക്കപ്പെടും.
പിന്നീട് കിട്ടണമെന്നുണ്ടെങ്കില്‍ പുതിയ ലൈസൻസിന് അപേക്ഷിക്കണം.ഇവിടെ 12 വർഷമായി ബിയർ- വൈൻ പാർലറുകളായി പ്രവർത്തിച്ചിരുന്നവയ്ക്കാണ് 24 മണിക്കൂറിനുള്ളില്‍ ലൈസൻസ് ലഭിച്ചത്.
ഇതില്‍ അസ്വാഭാവികതയുണ്ടെന്നാണ് സർക്കാരിന്റെ വിലയിരുത്തല്‍. പിണറായി സർക്കാർ ഇക്കാര്യത്തില്‍ പല വഴിവിട്ട നടപടികളും സ്വീകരിച്ചിരുന്നു. സ്റ്റാർ പദവിക്കുള്ള അപേക്ഷ മാത്രം മാനദണ്ഡമാക്കി പിണറായി സർക്കാർ ബാർ ലൈസൻസ് നല്‍കിയത് അബ്കാരി ചട്ടങ്ങളുടെയും സുപ്രീം കോടതി വിധികളുടെയും ലംഘനമായിരുന്നു.
കേന്ദ്ര ടൂറിസം മന്ത്രാലയത്തിന്റെ സാധുതയുള്ള സ്റ്റാർ സർട്ടിഫിക്കറ്റ് ഇല്ലാതെ സംസ്ഥാനത്തെ 147 ഓളം ഹോട്ടലുകള്‍ക്ക് എല്‍ഡിഎഫ് സർക്കാർ ബാർ ലൈസൻസ് അനുവദിച്ചിരുന്നു.
ആവശ്യമായ മാനദണ്ഡങ്ങളും ഭൗതിക സാഹചര്യങ്ങളും ഉറപ്പുവരുത്താതെയാണ് സ്റ്റാർ പദവിക്കായി അപേക്ഷ നല്‍കിയത്.
തുടർന്ന് കേന്ദ്ര മന്ത്രാലയം നടത്തുന്ന പരിശോധനാ നടപടികള്‍ പൂർത്തിയാക്കാൻ അനുവദിക്കാതെ വൈകിപ്പിച്ചത് ഹോട്ടലുടമകള്‍ തന്നെയാണെന്നും കേന്ദ്രം ഹൈക്കോടതിയെ അറിയിച്ചിരുന്നു
