എരുമേലി: സംസ്ഥാനത്തെ പൊലിസ് സ്റ്റേഷനുകള് കേസുകളില് പിടിച്ചിട്ട വാഹനങ്ങളുടെ ശവപ്പറമ്പുകളാകരുത് എന്ന ലക്ഷ്യത്തോടെ സർക്കാർ തുടങ്ങിയ സ്പേസ് പദ്ധതി എരുമേലി പൊലിസ് സ്റ്റേഷനില് വിജയിച്ചില്ല.
പിടിച്ചിട്ട വാഹനങ്ങള് നിരവധിയാണ്. ലേലം ചെയ്ത് ഇവ നീക്കിയിട്ടില്ല. തുരുമ്പെടുത്ത് ജീർണിച്ച് പഴകി ദ്രവിച്ച വാഹനങ്ങള് ഏറെയാണ്. ഇതൊക്കെ ആക്രി വിലയിലാണെങ്കില് വില്ക്കാൻ പറ്റുമെന്നിരിക്കേ നടപടി ഇല്ലെന്നാണ് ആക്ഷേപം.
അതേസമയം വിവിധ കേസുകളിലായി പിടിച്ചിട്ടിരിക്കുന്ന വാഹനങ്ങളുടെ നീക്കം ചെയ്യല് നടപടികള് തുടങ്ങിയെന്ന് പൊലിസ് പറയുന്നു. എന്നാല്, മാസങ്ങളായിട്ടും വാഹനങ്ങള് നീക്കം ചെയ്യാൻ സാധിച്ചിട്ടില്ല.
ശബരിമല തീർഥാടനവുമായി ബന്ധപ്പെട്ട പ്രധാന ഇടത്താവളമായതിനാല് എരുമേലിയില് തീർഥാടന കാലത്തുണ്ടാകുന്ന ഗതാഗത നിയമലംഘനങ്ങള്, അപകടങ്ങള് എന്നിവയില്പ്പെട്ട് ഒട്ടേറെ വാഹനങ്ങള് പിടിച്ചെടുക്കേണ്ടി വരുന്നുണ്ട്. അബ്കാരി - ലഹരി കേസുകളുടെ ഭാഗമായി അനധികൃത മദ്യക്കടത്ത്, ലഹരിവസ്തുക്കളുടെ കടത്ത് എന്നിവയ്ക്ക് ഉപയോഗിച്ച വാഹനങ്ങളുമുണ്ട്.
കോട്ടയം ജില്ലാ പൊലിസ് ചീഫിന്റെ നിർദേശപ്രകാരം എരുമേലി ഉള്പ്പെടെയുള്ള സ്റ്റേഷനുകളിലെ കേസുകളില്പ്പെടാത്തതും അവകാശികളില്ലാത്തതുമായ വാഹനങ്ങളുടെ കൃത്യമായ ലിസ്റ്റ് തയാറാക്കിയിട്ടുണ്ടന്ന് പൊലിസ് ഉദ്യോഗസ്ഥർ പറയുന്നു. കേന്ദ്ര പൊതുമേഖലാ സ്ഥാപനമായ എംഎസ്ടിസിയുടെ ഇ-ലേലം പോർട്ടല് വഴിയാണ് ലേല നടപടികള് സ്വീകരിക്കുന്നതെങ്കിലും വാഹനങ്ങള് എരുമേലി സ്റ്റേഷൻ പരിസരത്ത് തുടരുന്ന സ്ഥിതിയാണ് നിലവിലുള്ളതെന്നാണ് ആക്ഷേപം.
