എരുമേലി: എരുമേലിയിലെ കൊറിയർ ഓഫീസിൽ പാഴ്സലായി എത്തിയ ലക്ഷങ്ങൾ വിലമതിക്കുന്ന 310 കുപ്പി ലഹരിമരുന്ന് പോലീസ് പിടിച്ചെടുത്തു. നിരോധിത ലഹരിമരുന്നുകളുടെ ഗണത്തിൽപ്പെടുന്ന മെഫെന്റർമിൻ സൾഫേറ്റ് ഇൻജക്ഷനാണ് പിടിച്ചെടുത്തത്.

രഹസ്യവിവരത്തെ തുടർന്ന് ജില്ലാ പോലീസ് മേധാവിയുടെ ഡാൻസാഫ് (DANSAF - District Anti-Narcotic Special Action Force) സംഘം നടത്തിയ മിന്നൽ പരിശോധനയിലാണ് ലഹരിശേഖരം കണ്ടെത്തിയത്.
റോഡ് മാർഗമുള്ള പരിശോധനകൾ ശക്തമായതോടെ പോലീസിന്റെ കണ്ണുവെട്ടിച്ച് കൊറിയർ സർവീസുകൾ വഴി ലഹരിവസ്തുക്കൾ എത്തിക്കാനുള്ള മാഫിയയുടെ നീക്കമാണിതെന്നാണ് പോലീസിന്റെ പ്രാഥമിക നിഗമനം.
തീർത്ഥാടനകാലത്തെ തിരക്ക് മുതലെടുത്ത് വിതരണം ചെയ്യാനായി എത്തിച്ചതാണോ എന്നതടക്കമുള്ള കാര്യങ്ങൾ പോലീസ് അന്വേഷിച്ചുവരികയാണ്. പാഴ്സൽ അയച്ചവരെയും കൈപ്പറ്റാനെത്തേണ്ടവരെയും കേന്ദ്രീകരിച്ച് അന്വേഷണം ഊർജിതമാക്കി.
കണ്ടെടുത്ത 310 ബോട്ടിൽ മെഫെന്റർമിൻ സൾഫേറ്റ് ഇൻജക്ഷൻ തുടർനടപടികൾക്കായി കോട്ടയം ഡ്രഗ് കൺട്രോൾ ബോർഡിന് കൈമാറി.






