കൊല്ലം: നിർമ്മാണം നടക്കുന്ന വീടുകളില്‍ നിന്ന് ഇലക്‌ട്രിക് സാധനങ്ങളും വയറുകളും മോഷ്ടിക്കുന്ന സഹോദരന്മാർ പിടിയില്‍.
ആലുംമൂട് എല്ലുകുഴി വയലില്‍ അനീഷർ ഷാ (28), അക്ബർ ഷാ (30) എന്നിവരാണ് കുണ്ടറ പോലീസിന്‍റെ പിടിയിലായത്.
ഈ മാസം 10ന് കരിക്കോട് മേക്കോണില്‍ ഹാരിഷ് കമാലുദ്ദീന്‍റെ നിർമ്മാണം പുരോഗമിക്കുന്ന വീട്ടിലായിരുന്നു ഒടുവിലത്തെ കവർച്ച. 5.5 ലക്ഷം രൂപയുടെ വയറിംഗ് സാധനങ്ങളാണ് സംഘം മോഷ്ടിച്ചത്.
വയറുകളും സ്വിച്ചുകളും കൂടാതെ വയറിങ്ങിനായി പൈപ്പുകളില്‍ ഇട്ടിരുന്ന കേബിളുകളും മോഷ്ടിച്ച പ്രതികള്‍, നിർമ്മാണ ഉപകരണങ്ങളായ കട്ടറും രണ്ട് ഡ്രില്ലറുകളും കൂടി കവർന്നു.
അന്വേഷണത്തിലാണ് കൂടുതല്‍ ഇടങ്ങളില്‍ നിന്ന് വയറിങ് സാമഗ്രികള്‍ മോഷ്ടിച്ചത് ഇവരാണെന്ന് പോലീസ് മനസ്സിലാക്കിയത്.
കൂടാതെ കുണ്ടറയിലും പരിസരപ്രദേശങ്ങളിലുമുള്ള പണി നടക്കുന്ന വീടുകളില്‍ നിന്ന് ഇലക്‌ട്രിക് സാമഗ്രികള്‍ മോഷണം പോകുന്നതായി പരാതികളും ഉണ്ടായിരുന്നു. ഇതിന്‍റെ അടിസ്ഥാനത്തില്‍ പോലീസ് നടത്തിയ വിശദമായ അന്വേഷണത്തിലാണ് പ്രതികള്‍ പിടിയിലായത്.
പ്രദേശത്തെ സമാനമായ മറ്റ് മോഷണക്കേസുകളിലും ഇവർക്ക് പങ്കുള്ളതായാണ് പോലീസ് സംശയിക്കുന്നത്. ഇത് സംബന്ധിച്ച്‌ പോലീസ് പരിശോധിച്ചു വരികയാണ്. കോടതിയില്‍ ഹാജരാക്കിയ പ്രതികളെ റിമാൻഡ് ചെയ്തു.
