തിരുവനന്തപുരം: വലിയ തർക്കങ്ങള്‍ക്ക് വഴിവച്ച വൈദ്യുതി പർച്ചേസ് വിവാദം സമവായത്തിലേക്ക്.
ക്ലിഫ് ഹൗസിലെ ചർച്ചയില്‍ മഞ്ഞുരുകി.
മുഖ്യമന്ത്രി വി ഡി സതീശനും മന്ത്രിമാരായ സണ്ണി ജോസഫും രമേശ് ചെന്നിത്തലയും ചർച്ചയില്‍ പങ്കെടുത്തു.
കെഎസ്‌ഇബി എംഡിയുമായി പ്രത്യേകം ചർച്ച നടത്തിയത് അല്ലെന്നും ഉദ്യോഗസ്ഥരുടെ യോഗത്തിന് ശേഷം കണ്ടതാണെന്നും മുഖ്യമന്ത്രി വിശദീകരിച്ചു. നിലവില്‍ വൈദ്യുതി ക്ഷാമം ഇല്ലെന്നും രണ്ട് മാസത്തേക്ക് വൈദ്യുതി വാങ്ങേണ്ടതില്ലെന്നും ഉദ്യോഗസ്ഥർ അറിയിച്ചതായി മുഖ്യമന്ത്രി പറഞ്ഞു.
സണ്ണി ജോസഫ് ചർച്ചയില്‍ എതിർപ്പൊന്നും ഉയർത്തിയില്ല. ഭാവി മുന്നില്‍ കണ്ട് പുതിയ കരാർ സാധ്യത തേടാൻ ധാരണയായി. ചർച്ചയില്‍ രമേശ് ചെന്നിത്തലയും പങ്കെടുത്തു.
ബോർഡ് - കോർപറേഷൻ ചർച്ചക്കിടെ ആയിരുന്നു വൈദ്യുതി വിവാദത്തിലെ ചർച്ച. ജിഎൻഎ കരാർ പിന്മാറ്റം അറിഞ്ഞില്ലെന്ന സണ്ണി ജോസഫിന്‍റെ തുറന്നു പറച്ചില്‍ വിവാദമായിരുന്നു.
ജിഎൻഎയുമായുള്ള വൈദ്യുതി കരാർ റദ്ദാക്കിയതിലും ഹിമാചലില്‍ നിന്നുള്ള വൈദ്യുതി വാങ്ങല്‍ നീക്കത്തെ സംശയ നിഴലിലാക്കിയതിലുമാണ് വൈദ്യുതി മന്ത്രി സണ്ണി ജേസഫിന് അതൃപ്തിയുണ്ടായത്. ജിഎൻഎയില്‍ നിന്ന് തല്‍ക്കാലം വൈദ്യുതി വാങ്ങില്ലെന്ന് താൻ അറിഞ്ഞത് മാധ്യമങ്ങളിലൂടെയെന്ന് അദ്ദേഹം പറഞ്ഞത് വലിയ ചർച്ചയായിരുന്നു.
വൈദ്യുതി ബോർഡ് ചെയർമാനുമായും ഊർജ സെക്രട്ടറിയുമായും മുഖ്യമന്ത്രി സംസാരിച്ചു എന്നാണ് താൻ വാർത്തകളില്‍ നിന്നു മനസിലാക്കിയതെന്നും മന്ത്രി പറയുകയുണ്ടായി. മന്ത്രിയെ അവഗണിച്ച്‌ പവ‍ർ സെക്രട്ടറിയും വൈദ്യുതി ബോർഡ് ചെയ‍ർമാനും മുഖ്യമന്ത്രിയുമായി ചർച്ച ചെയ്ത് കാര്യങ്ങള്‍ തീരുമാനിച്ചതില്‍ മന്ത്രിക്കുള്ള കടുത്ത പ്രതിഷേധമാണ് മറനീക്കി പുറത്തുവന്നത്.
