മുട്ട കഴിക്കാത്ത മലയാളികൾ ഉണ്ടാവില്ല.മുട്ട പുഴുങ്ങിയോ ഓംലെറ്റ് ആക്കിയോ കഴിക്കുന്നതിന് പകരം, പച്ചയ്ക്ക് കുടിക്കാന് ഇഷ്ടപ്പെടുന്ന ചിലരുണ്ട്. പ്രത്യേകിച്ച് ജിമ്മില് പോകുന്നവരും ഫിറ്റ്നസ് പ്രേമികളും. മുട്ട വേവിക്കുമ്പോള് അതിലെ പോഷകങ്ങള് നഷ്ടപ്പെടുമെന്നാണ് ഇവരുടെ ധാരണ. എന്നാല് പച്ചമുട്ട കഴിക്കുന്നത് ശരിക്കും നല്ലതാണോ?
വിറ്റാമിന് എ, ബി കോംപ്ലക്സ് (ബി 2, ബി 5, ബി 9, ബി 12), പ്രോട്ടീന്, സെലിനിയം, ആന്റിഓക്സിഡന്റുകള് തുടങ്ങിയ അവശ്യ പോഷകങ്ങളാല് സമ്പന്നമാണ് മുട്ട. കൂടാതെ, ശരീരത്തിന് ഹാനികരമല്ലാത്ത ഒമേഗ3 ഫാറ്റി ആസിഡുകള്, ഡിഎച്ച്എ തുടങ്ങിയ ആരോഗ്യകരമായ കൊഴുപ്പുകളും ഇതിലടങ്ങിയിട്ടുണ്ട്.
അതുകൊണ്ടുതന്നെ പ്രഭാതഭക്ഷണത്തില് മുട്ട ഉള്പ്പെടുത്താന് എല്ലാവരും താല്പര്യപ്പെടുന്നു.
പ്രോട്ടീന് ആഗിരണം പകുതി മാത്രം
പച്ചമുട്ടയില് കൂടുതല് പ്രോട്ടീന് ഉണ്ടെന്നത് ഒരു തെറ്റിദ്ധാരണ മാത്രമാണ്. പഠനങ്ങള് പ്രകാരം, പുഴുങ്ങിയ മുട്ടയിലെ പ്രോട്ടീന്റെ 90 ശതമാനവും മനുഷ്യശരീരത്തിന് എളുപ്പത്തില് ആഗിരണം ചെയ്യാന് കഴിയും. എന്നാല് പച്ചമുട്ടയിലെ പ്രോട്ടീന്റെ 50 ശതമാനം മാത്രമേ ശരീരത്തിന് പ്രയോജനപ്പെടുത്താനാവൂ. അതായത്, വേവിച്ച മുട്ട കഴിക്കുന്നതാണ് പേശി വളര്ച്ചയ്ക്ക് കൂടുതല് ഫലപ്രദം.
ഭക്ഷ്യവിഷബാധയ്ക്കുള്ള സാധ്യത
മുട്ട വേവിക്കാതെ കഴിക്കുന്നത് കടുത്ത ആരോഗ്യപ്രശ്നങ്ങള്ക്ക് കാരണമാകും. പച്ചമുട്ടയില് 'സാല്മൊണെല്ല' എന്ന അപകടകാരിയായ ബാക്ടീരിയ അടങ്ങിയിരിക്കാന് സാധ്യതയുണ്ട്. വെറുംവയറ്റില് പച്ചമുട്ട കഴിക്കുന്നത് വയറുവേദന, വയറിളക്കം, മലബന്ധം, ഗ്യാസ് തുടങ്ങിയ ദഹനസംബന്ധമായ ബുദ്ധിമുട്ടുകളിലേക്കും കടുത്ത ഭക്ഷ്യവിഷബാധയിലേക്കും നയിച്ചേക്കാം.
ബയോട്ടിന് കുറയാന് കാരണം
പച്ചമുട്ടയുടെ വെള്ളയിലുള്ള 'അവിഡിന്' (Avidin) എന്ന പ്രോട്ടീന് ശരീരത്തിലെ വിറ്റാമിന് ബി7 (ബയോട്ടിന്) ആഗിരണം ചെയ്യുന്നത് തടയുന്നു. ഇത് തുടര്ച്ചയായി കഴിക്കുന്നത് ശരീരത്തില് ബയോട്ടിന്റെ കുറവുണ്ടാക്കുകയും മുടികൊഴിച്ചില് പോലുള്ള പ്രശ്നങ്ങള്ക്ക് കാരണമാവുകയും ചെയ്യും. എന്നാല് മുട്ട നന്നായി വേവിക്കുമ്പോള് ഈ അവിഡിന് നശിച്ചുപോവുകയും ബയോട്ടിന് ശരീരത്തിന് കൃത്യമായി ലഭിക്കുകയും ചെയ്യും
