ചെന്നൈ : ചെന്നൈ മെട്രോ റെയിൽ ലിമിറ്റഡും ഡ്രൈവറില്ലാ ട്രെയിനുകൾ അവതരിപ്പിക്കുന്നു. 2027 പകുതിയോടെ ഓപ്പറേറ്റർമാരില്ലാത്ത മെട്രോ ട്രെയിൻ സർവീസ് ആരംഭിക്കും. ഇതിന്റെ പരീക്ഷണയോട്ടങ്ങൾ നടന്നുവരികയാണ്. ആദ്യഘട്ടത്തിൽ ഓട്ടോമാറ്റിക് ട്രെയിൻ ഓപ്പറേഷൻ സംവിധാനത്തിലാകും ട്രെയിൻ സർവീസ് ആരംഭിക്കുക. ഈ ഘട്ടത്തിൽ സുരക്ഷ ഉറപ്പാക്കാനായി രണ്ട് ഓപ്പറേറ്റർമാർ ട്രെയിനിലുണ്ടാകും. 2027 മധ്യത്തോടെ പൂർണമായും ഓപ്പറേറ്റർമാർ ഇല്ലാതെ ട്രെയിൻ സർവീസുകൾ ആരംഭിക്കാനാണ് പദ്ധതി.
നിലവിൽ ഓപ്പറേറ്റർമാരില്ലാത്ത ട്രെയിൻ സർവീസുകളുടെ പരീക്ഷണയോട്ടങ്ങൾ നടന്നുവരികയാണ്. ഏകദേശം 120 വ്യത്യസ്ത സുരക്ഷാ സാഹചര്യങ്ങളാണ് ഈ പരീക്ഷണയോട്ടങ്ങളിൽ പരിശോധിക്കുന്നത്. ഡ്രൈവറില്ലാ ട്രെയിൻ സർവീസ് ആരംഭിക്കുമ്പോൾ ആദ്യഘട്ടത്തിൽ 15 ട്രെയിനുകളാകും സർവീസിനായി ഉണ്ടാവുക. പത്തുമിനിറ്റ് ഇടവേളകളിൽ ഈ ട്രെയിനുകൾ സർവീസ് നടത്തും.
വടപളനിക്കും പൂനാമല്ലി ബൈപ്പാസിനും ഇടയിൽ 40 രൂപയാകും പരമാവധി ടിക്കറ്റ് നിരക്ക്. മൂന്ന് കോച്ചുകളുള്ള ഒരു ട്രെയിനിൽ പരമാവധി 900 യാത്രക്കാർക്ക് സഞ്ചരിക്കാം. മണിക്കൂറിൽ 80 കിലോമീറ്ററാകും പരമാവധി വേഗത. എന്നാൽ, ശരാശരി 32 കിലോമീറ്റർ വേഗതയിലായിരിക്കും സർവീസ് നടത്തുകയെന്നും റിപ്പോർട്ടുകളിൽ പറയുന്നു. ഇന്ത്യയിൽ ഡൽഹിയിൽ മാത്രമാണ് നിലവിൽ ഡ്രൈവറില്ലാ മെട്രോ ട്രെയിൻ സർവീസുള്ളത്.
