തിരുവനന്തപുരം: കിളിമാനൂരില് സഹോദരനുമൊത്തു വീട്ടുമുറ്റത്ത് കളിച്ചുകൊണ്ടിരിക്കെ ആറാം ക്ലാസ് വിദ്യാർഥിയുടെ കൈവിരല് തെരുവുനായ കടിച്ചെടുത്തു.
ഗുരുതരമായി പരുക്കേറ്റ ശരണിനെ (11) എസ്എടി ആശുപത്രിയില് പ്രവേശിപ്പിച്ചു. കടിച്ചെടുത്ത വിരലുമായി കടന്ന നായയ്ക്കായി പരിസരവാസികള് തിരച്ചില് നടത്തിയെങ്കിലും കണ്ടെത്താനായില്ല. കടിച്ചെടുത്ത വിരലും കണ്ടെത്താനായിട്ടില്ല.
പുളിമാത്ത് പഞ്ചായത്ത് പുല്ലയില് വാർഡ് കൊടുവഴന്നൂർ മൊട്ടലുവിള ചരുവിള വീട്ടില് രാജു- അഞ്ജു ദമ്പതികളുടെ മകനാണു ശരണ്. കൊടുവഴന്നൂർ ഗവ.എച്ച്എസ്എസിലെ വിദ്യാർഥിയാണ്. വീട്ടുമുറ്റത്തേക്ക് കുരച്ചുകൊണ്ട് ഓടിക്കയറിയ നായ ശരണിനെ ആക്രമിക്കുകയായിരുന്നു. നിലത്തുവീണ ശരണിന്റെ വലതുകയ്യിലെ മോതിരവിരലിന്റെ പകുതിഭാഗം നായ കടിച്ചെടുത്തു. ഓടിമാറിയതിനാല് ഇളയ സഹോദരൻ രക്ഷപ്പെട്ടു.
നിലവിളികേട്ട് വീട്ടുകാർ എത്തിയപ്പോഴേക്കും നായ ഓടിപ്പോയി. ശരണിന്റെ ഇടതുകാലിന്റെ തുടയിലും ആഴത്തില് മുറിവേറ്റിട്ടുണ്ട്. സമീപപ്രദേശത്തെ വളർത്തുമൃഗങ്ങളെയും നായ കടിച്ചതായി നാട്ടുകാർ പരാതിപ്പെട്ടു.
