തിരുവനന്തപുരം: നെടുമങ്ങാട് ജില്ലാ ആശുപത്രിയില്‍ ജൂനിയര്‍ ഡോക്ടര്‍ക്കെതിരേ സീനിയര്‍ ഡോക്ടര്‍ ലൈംഗികാതിക്രമം നടത്തിയ സംഭവത്തില്‍ കടുത്ത നടപടിയുണ്ടാകുമെന്ന് ആരോഗ്യമന്ത്രി കെ. മുരളീധരന്‍.
സീനിയര്‍ ഡോക്ടര്‍ക്കെതിരേ ശക്തമായ നടപടിയുണ്ടാകുമെന്നും ഇക്കാര്യത്തില്‍ പരിശോധനകള്‍ നടക്കുകയാണെന്നും ആരോഗ്യമന്ത്രി പ്രതികരിച്ചു.
ഡോക്ടര്‍മാര്‍ക്കായുള്ള ആരോഗ്യവകുപ്പിന്റെ പ്രോട്ടോകോള്‍ തെറ്റിക്കുന്നവര്‍ക്ക് എതിരേ നടപടിയുണ്ടാകും. പോലീസിന്റെ എഫ്‌ഐആര്‍ പരിശോധിച്ച ശേഷമായിരിക്കും നടപടി.
വനിതാ ഡോക്ടര്‍മാര്‍ക്ക് സുരക്ഷിതമായ ജോലി സാഹചര്യം സൃഷ്ടിക്കേണ്ടത് ആരോഗ്യവകുപ്പിന്റെ ഉത്തരവാദിത്വമാണ്. അത് കര്‍ശനമായി നടപ്പാക്കുമെന്നും കെ. മുരളീധരന്‍ പ്രതികരിച്ചു.
ഈ ഡോക്ടറുടെ ട്രാക്ക് റെക്കോഡ് അത്ര നല്ലതല്ലെന്നും അക്കാര്യം പരിശോധിക്കുമെന്നും വ്യക്തമാക്കി. ജൂനിയര്‍ ഡോക്ടര്‍ പരാതി നല്‍കിയിട്ടും പോലീസ് നടപടിയെടുത്തില്ല എന്ന ആരോപണം പരിശോധിക്കേണ്ടത് ആഭ്യന്തരമന്ത്രാലയമാണെന്നും അക്കാര്യം അവര്‍ പരിശോധിക്കുമെന്നും കെ. മുരളീധരന്‍ വ്യക്തമാക്കി.
കഴിഞ്ഞ ദിവസമായിരുന്നു നെടുമങ്ങാട് ജില്ലാ ആശുപത്രിയില്‍ സീനിയര്‍ ഡോക്ടര്‍ ജനറല്‍ മെഡിസിനിലെ ബിനു ലൈംഗികാതിക്രമത്തിന് ശ്രമിച്ചെന്ന് പി.ജി. വിദ്യാര്‍ത്ഥിനിയായ ജൂനിയര്‍ ഡോക്ടര്‍ പരാതി നല്‍കിയത്.
