ഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന് രാഷ്ട്രപതിക്ക് പോലും ലഭിക്കാത്ത തരത്തിലുള്ള അസാധാരണ സംരക്ഷണമാണ് കേന്ദ്രസർക്കാർ നല്‍കുന്നതെന്ന് സി ജെ പി കണ്‍വീനർ അഭിജിത് ദീപ്കെ.
സി ജെ പി, എസ് എഫ് ഐ, എ ഐ എസ് എഫ് എന്നീ സംഘടനകളുടെ സംയുക്ത വാർത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. ഗ്യാനേഷ് കുമാറിനെ സംരക്ഷിക്കാനായി പിണറായി വിജയൻ അടക്കമുള്ള മുൻ മുഖ്യമന്ത്രിമാരെ വരെ പൊലീസ് കസ്റ്റഡിയിലെടുക്കുന്ന സാഹചര്യം ഉണ്ടായെന്നും, എന്തിനാണ് ഇത്രയധികം സുരക്ഷയെന്ന് പ്രധാനമന്ത്രി മോദി വ്യക്തമാക്കണമെന്നും ദീപ്കെ ആവശ്യപ്പെട്ടു. തെരഞ്ഞെടുപ്പില്‍ മോദിയെ സഹായിച്ചതിന്റെ പ്രത്യുപകാരമാണോ ഈ സംരക്ഷണമെന്നും അദ്ദേഹം ചോദ്യം ചെയ്തു. രാജ്യത്ത് 'വണ്‍ നേഷൻ വണ്‍ ഇലക്ഷൻ' എന്നതിലുപരി 'വണ്‍ നേഷൻ വണ്‍ പാർട്ടി' എന്ന അജണ്ടയാണ് നടപ്പാക്കാൻ ശ്രമിക്കുന്നതെന്നും, ജനകീയ പ്രതിഷേധങ്ങളെ നരേന്ദ്ര മോദി ഭയപ്പെടുന്നുണ്ടെന്നും അദ്ദേഹം കൂട്ടിച്ചേർത്തു.
പോരാട്ടം തുടരണം
വാർത്താസമ്മേളനത്തിനിടയില്‍ ഐസ നേതാവ് നേഹ ബോറ സംസാരിക്കുന്നതിനിടെ റിപ്പബ്ലിക് ചാനലിലെ മാധ്യമപ്രവർത്തകൻ ബഹളം വെച്ചതിനെ തുടർന്ന് ചെറിയ തോതില്‍ സംഘർഷാവസ്ഥ ഉണ്ടായി. സർക്കാരിനും പൊലീസിനുമെതിരായ വിമർശനങ്ങളെ തടസ്സപ്പെടുത്താൻ മാധ്യമപ്രവർത്തകൻ ശ്രമിച്ചുവെന്നും, മറ്റ് മാധ്യമപ്രവർത്തകർ ഇതിനെതിരെ ശക്തമായി രംഗത്തുവന്നതോടെയാണ് രംഗം ശാന്തമായതെന്നും റിപ്പോർട്ടുകള്‍ വ്യക്തമാക്കുന്നു. തുടർന്ന് സംസാരിച്ച നേഹ ബോറ, പ്രതിഷേധിക്കുന്നവരെയും മാധ്യമപ്രവർത്തകരെയും മണിക്കൂറുകളോളം കസ്റ്റഡിയില്‍ വെക്കുകയും, കസ്റ്റഡിയിലെടുക്കുന്ന യുവതികള്‍ക്ക് നേരെ അതിക്രമങ്ങള്‍ അഴിച്ചുവിടുകയും ചെയ്യുന്ന പൊലീസ് നടപടിയെ ശക്തമായി അപലപിച്ചു. പ്രതിഷേധങ്ങളെ അടിച്ചമർത്താനാണ് സർക്കാർ ശ്രമിക്കുന്നതെന്നും എന്നാല്‍ ഇതില്‍ ഭയന്ന് പിന്നോട്ടില്ലെന്നും അവർ വ്യക്തമാക്കി. ജന്തർമന്തറില്‍ ദേശീയപതാക വീശിയതിനെ കുറ്റമാക്കിയ നടപടിയെയും നേതാക്കള്‍ ചോദ്യം ചെയ്തു.
ഇത് രാജ്യത്തിന്റെ രണ്ടാം സ്വാതന്ത്ര്യ സമരമാണെന്ന് എ ഐ എസ് എഫ് പ്രസിഡന്റ് വിരാജ് അഭിപ്രായപ്പെട്ടു. ബ്രിട്ടീഷ് ഭരണകാലത്തെ ഓർമ്മിപ്പിക്കുന്ന രീതിയിലാണ് നിലവിലെ ഭരണകൂടം പെരുമാറുന്നതെന്നും അദ്ദേഹം വിമർശിച്ചു. വോട്ടുകള്‍ ചോർത്തിയെടുത്ത ഗ്യാനേഷ് കുമാറിനെ സംരക്ഷിക്കുന്ന നിലപാടാണ് പോലീസിന്റെ ഭാഗത്തുനിന്നും ഉണ്ടാകുന്നത് എന്ന് എസ് എഫ് ഐ നേതാവ് ഐഷി ഘോഷ് ചൂണ്ടിക്കാട്ടി. പ്രതിഷേധക്കാരെയും മാധ്യമപ്രവർത്തകരെയും ഒരു രേഖയും അവശേഷിപ്പിക്കാത്ത വിധം വേട്ടയാടാനാണ് നീക്കമെന്നും, ഇതിനെതിരെ എല്ലാവരും ഒത്തൊരുമിച്ച്‌ പൊരുതണമെന്നും നേതാക്കള്‍ ആഹ്വാനം ചെയ്തു. ജന്തർമന്തറിലെ വിലക്കുകള്‍ക്ക് പുല്ലുവില കല്‍പ്പിച്ച്‌ നാളെ ദേശീയപതാകയുമായി വീണ്ടും വലിയ തോതില്‍ പ്രതിഷേധിക്കുമെന്ന് സി ജെ പി നേതാക്കള്‍ പ്രഖ്യാപിച്ചു. മോദിയുടെ കസേര തെറിപ്പിച്ച്‌ ഗ്യാനേഷിനെ ജയിലില്‍ അടയ്ക്കും വരെ പോരാട്ടം തുടരാനും ആഹ്വാനം ചെയ്തു.
