ഡൽഹി: ഡൽഹി ഹോസ്റ്റല് കെട്ടിടം തകർന്ന് വീണതില് മലയാളികള് ഉണ്ടോ എന്ന കാര്യം സംശയമെന്ന് സ്ഥലത്തെ മലയാളി വിദ്യാർഥികള്.
ഹോസ്റ്റല് കെട്ടിടം ശോചനീയാവസ്ഥയില് ആയിരുന്നു എന്നും നിർമ്മാണ പ്രവൃത്തികള് നടക്കുന്നതിനിടെ കെട്ടിടം തകർന്നുവീണതാകാം എന്ന് മലയാളി വിദ്യാർഥി പറയുന്നു. സംഭവം നടക്കുന്ന സമയത്ത് 40 ലധികം വിദ്യാർത്ഥികള് ഉണ്ടായിരിക്കാം എന്നും സ്ഥലത്തിന് സമീപം താമസിക്കുന്ന മലയാളി വിദ്യാർഥികള് പറഞ്ഞു.
തെക്കുപടിഞ്ഞാറൻ ഡൽഹിയിലെ സത്യനികേതന് സമീപമുള്ള 'ഹോട്ടല് ഡെയ്സ്' എന്ന അഞ്ചു നില ബോയ്സ് ഹോസ്റ്റല് കെട്ടിടം തകർന്നു വീണാണ് വൻ അപകടം ഉണ്ടായത്. ഉച്ചക്ക് ഒന്നരയോടെയുണ്ടായ അപകടത്തില് വിദ്യാർഥികള് അടക്കം മുപ്പതോളം പേർ ഹോസ്റ്റലില് ഉണ്ടായിരുന്നുവെന്നാണ് സൂചന. അപകടത്തില് ഗുരുതരമായി പരിക്കേറ്റ 3 പേരെ എയിംസ് (AIIMS) ആശുപത്രിയില് പ്രവേശിപ്പിച്ചു. കെട്ടിടത്തിനുള്ളില് ഇനി എത്രപേർ കുടുങ്ങിക്കിടക്കുന്നുണ്ടെന്ന കൃത്യമായ വിവരം ലഭ്യമായിട്ടില്ലെന്ന് ഡൽഹി പൊലീസ് വ്യക്തമാക്കി. സ്ഥലത്ത് രക്ഷാപ്രവർത്തനം കൃത്യമായി നടക്കുന്നുണ്ടെന്ന് മുഖ്യമന്ത്രി രേഖ ഗുപ്തയും അറിയിച്ചു. രക്ഷാ പ്രവർത്തനം ഊർജിതമായി നടക്കുകയാണെന്നും മുഖ്യമന്ത്രി അറിയിച്ചു.
