കോട്ടയം: ബാങ്ക് ജീവനക്കാരുടെ പണിമുടക്കിൻ്റെ പേരിൽ ആരാധനയ്ക്കും വിശ്രമത്തിനുമുള്ള ഞായറാഴ്ച പ്രവൃത്തിദിനമാക്കാനുള്ള കേന്ദ്ര സർക്കാർ തീരുമാനം തികച്ചും ദുരുദ്ദേശ്യപരവും പ്രതിഷേധാർഹവുമാണെന്ന് കേരള യൂത്ത് ഫ്രണ്ട് (എം) സംസ്ഥാന പ്രസിഡൻ്റ് സിറിയക് ചാഴികാടൻ പ്രസ്താവനയിൽ പറഞ്ഞു.
ഈ നീക്കത്തിൽ പ്രതിഷേധിച്ച് നാളെ (ഞായറാഴ്ച) സംസ്ഥാനത്തെ മുഴുവൻ നിയോജകമണ്ഡലം കേന്ദ്രങ്ങളിലും പ്രധാന ബാങ്കുകൾക്ക് മുന്നിൽ പ്രതിഷേധ സമരം സംഘടിപ്പിക്കുമെന്നും ജീവനക്കാർക്ക് ഐക്യദാർഢ്യം പ്രഖ്യാപിക്കുമെന്നും അദ്ദേഹം അറിയിച്ചു.
തൊഴിൽ നിയമങ്ങളോടും വിശ്വാസി സമൂഹത്തോടുമുള്ള കേന്ദ്ര സർക്കാരിൻ്റെ നിഷേധാത്മക സമീപനമാണ് ഞായറാഴ്ച ബാങ്കുകൾ തുറന്നു പ്രവർത്തിപ്പിക്കാനുള്ള ഉത്തരവിലൂടെ വ്യക്തമാകുന്നത്.
ഉപഭോക്താക്കൾക്കുണ്ടാകുന്ന ബുദ്ധിമുട്ടാണ് യഥാർത്ഥ പരിഗണനയെങ്കിൽ ശനിയാഴ്ച പ്രവൃത്തിദിനമാക്കുകയായിരുന്നു ചെയ്യേണ്ടിയിരുന്നത്. അതുചെയ്യാതെ ഞായറാഴ്ച തന്നെ ബാങ്ക് പ്രവർത്തിപ്പിക്കാൻ ഉത്തരവിറക്കിയതിന് പിന്നിൽ ഗൂഢലക്ഷ്യങ്ങളുണ്ട്.
മറ്റു ദിവസങ്ങളിൽ നാൽപ്പതു മിനിറ്റ് വീതം അധികം ജോലിചെയ്യാമെന്ന വ്യവസ്ഥയോടെയാണ് എട്ടു ലക്ഷത്തോളം വരുന്ന ബാങ്ക് ജീവനക്കാരുടെ സംയുക്ത സമിതി ആഴ്ചയിൽ അഞ്ച് പ്രവൃത്തിദിനങ്ങൾ വേണമെന്ന് ആവശ്യപ്പെട്ടത്.
എല്ലാ ശനിയാഴ്ചകളും അവധിയാക്കാമെന്ന് 2024-ലെ വേതനക്കരാറിലൂടെ നൽകിയ ഉറപ്പ് രണ്ടു വർഷമായി കേന്ദ്ര ധനമന്ത്രാലയം ഒളിച്ചുകളി നടത്തി നീട്ടിക്കൊണ്ടുപോവുകയാണ്.
ഈ അനീതിക്കെതിരെ പണിമുടക്കാൻ നിർബന്ധിതരായ ജീവനക്കാരെ കേൾക്കുന്നതിന് പകരം, ഞായറാഴ്ച ജോലി ചെയ്യിപ്പിക്കാൻ തുനിയുന്നത് അവരോടുള്ള വെല്ലുവിളിയാണ്.
ബാങ്കിംഗ് മേഖലയിലെ ജീവനക്കാരെ മതാടിസ്ഥാനത്തിൽ ഭിന്നിപ്പിക്കാനുള്ള അപകടകരമായ നീക്കമാണ് കേന്ദ്ര സർക്കാരിൻ്റെ ഭാഗത്തുനിന്ന് ഉണ്ടാകുന്നത്. ഇത് ഒരു മതനിരപേക്ഷ സർക്കാരിന് ഒരിക്കലും ഭൂഷണമല്ല.
ജീവനക്കാരുടെ ന്യായമായ അവകാശങ്ങൾ സംരക്ഷിക്കപ്പെടണമെന്നും അടിച്ചമർത്തൽ നടപടികൾ കേന്ദ്ര സർക്കാർ അവസാനിപ്പിക്കണമെന്നും സിറിയക് ചാഴികാടൻ ആവശ്യപ്പെട്ടു.
