തിരുവനന്തപുരം: പാര്‍ട്ടി നേതാക്കള്‍ക്കും പ്രവര്‍ത്തകര്‍ക്കുമെതിരെ ഉയരുന്ന ലൈംഗിക പീഡന പരാതികള്‍ കൈകാര്യം ചെയ്യുന്നതില്‍ വലിയൊരു നയമാറ്റത്തിന് വഴിയൊരുക്കുകയാണ് സിപിഎം എന്ന് റിപ്പോര്‍ട്ട്.
പാര്‍ട്ടിയിലെ പീഡന പരാതികള്‍ അന്വേഷിക്കുന്നതിനായി ആഭ്യന്തര പരാതി പരിഹാര സമിതി (ഐസിസി) രൂപീകരിക്കാന്‍ കേന്ദ്ര കമ്മിറ്റി തീരുമാനമെടുത്തിരിക്കുകയാണ്.
നിലവില്‍ ഇത്തരം പരാതികള്‍ പാര്‍ട്ടി കമ്മിറ്റികള്‍ നേരിട്ട് ചര്‍ച്ച ചെയ്തു തീരുമാനമെടുക്കുന്ന രീതിയാണ് തുടര്‍ന്നു പോരുന്നത്. ഇതിന് പകരം നിയമപരമായ ഐസിസി സംവിധാനം കൊണ്ടുവരുന്നത് പാര്‍ട്ടി സംവിധാനത്തിനുള്ളില്‍ വലിയൊരു സുതാര്യതയ്ക്ക് വഴിതുറക്കും. കേന്ദ്ര കമ്മിറ്റിയുടെ നിര്‍ണായകമായ ഈ തീരുമാനം സംസ്ഥാന സമിതിയില്‍ റിപ്പോര്‍ട്ട് ചെയ്തിട്ടുണ്ട്. ഇനിമുതല്‍ ഓരോ പാര്‍ട്ടി ഘടകങ്ങളിലും നിര്‍ബന്ധമായും ഐസിസി സംവിധാനം നിലവില്‍ വരും. ഏറ്റവും ശ്രദ്ധേയമായ കാര്യം, ഈ സമിതി എടുക്കുന്ന അന്വേഷണ തീരുമാനങ്ങള്‍ അന്തിമമായിരിക്കും എന്നതാണ്.
പാര്‍ട്ടി കമ്മിറ്റികള്‍ക്ക് സമിതിയുടെ തീരുമാനങ്ങളില്‍ മാറ്റങ്ങള്‍ വരുത്താന്‍ യാതൊരു അധികാരവും ഉണ്ടായിരിക്കില്ല. പരാതിയില്‍ എന്തെങ്കിലും തരത്തിലുള്ള അപ്പീലുകള്‍ ഉണ്ടായാല്‍, തൊട്ടു മുകളിലുള്ള പാര്‍ട്ടി ഘടകത്തിലെ ഐസിസിയാകും ആ വിഷയം വീണ്ടും പരിശോധിക്കുക. ഇത് അനാവശ്യമായ ഇടപെടലുകള്‍ ഒഴിവാക്കാന്‍ സഹായിക്കും. സ്ത്രീ സുരക്ഷയിലും ലിംഗസമത്വത്തിലും മുന്‍പന്തിയില്‍ നില്‍ക്കുന്ന ഒരു രാഷ്ട്രീയ പ്രസ്ഥാനം എന്ന നിലയിലാണ് കേന്ദ്ര കമ്മിറ്റി ഇത്തരമൊരു സുപ്രധാന തീരുമാനത്തിലേക്ക് എത്തിയത്.
സമിതിയുടെ നിഷ്പക്ഷത ഉറപ്പാക്കാന്‍ പാര്‍ട്ടി നേതാക്കള്‍ മാത്രമല്ല ഇതില്‍ ഉണ്ടാകുക. അഭിഭാഷകര്‍ ഉള്‍പ്പെടെയുള്ള പുറത്തുനിന്നുള്ള നിയമ വിദഗ്ദ്ധരെയും ഐസിസിയുടെ ഭാഗമാക്കാന്‍ തീരുമാനിച്ചിട്ടുണ്ട്. സിപിഎം ജനറല്‍ സെക്രട്ടറി എംഎ ബേബിയാണ് ഈ വിപ്ലവകരമായ തീരുമാനത്തിന് പിന്നില്‍. പരാതികള്‍ പാര്‍ട്ടി തട്ടകത്തില്‍ത്തന്നെ ഒതുക്കി തീര്‍ക്കുന്നുവെന്ന ആരോപണങ്ങള്‍ക്ക് വിരാമമിടാന്‍ പുതിയ സംവിധാനത്തിലൂടെ സാധിക്കുമെന്നാണ് വിലയിരുത്തപ്പെടുന്നത്.
അതിനിടെ, വരുംവര്‍ഷത്തേക്കുള്ള രാഷ്ട്രീയ സംഘടനാ പ്രവര്‍ത്തനങ്ങള്‍ക്കായി പ്രത്യേക കലണ്ടര്‍ തയ്യാറാക്കാനും പാര്‍ട്ടി തീരുമാനം എടുത്തിട്ടുണ്ട്. തിരുവനന്തപുരത്ത് സമാപിക്കുന്ന സംസ്ഥാന സമിതി യോഗമാണ് ഭാവി പരിപാടികള്‍ ഉള്‍ക്കൊള്ളിച്ചുകൊണ്ടുള്ള ഈ കലണ്ടറിന് അന്തിമരൂപം നല്‍കുന്നത്. സെമിനാറുകളും യോഗങ്ങളും വഴി പാര്‍ട്ടി പ്രസ്ഥാനത്തെ കൂടുതല്‍ ശക്തിപ്പെടുത്തുകയാണ് ഇതിന്റെ ലക്ഷ്യം.
