തിരുവനന്തപുരം: മദ്യപിച്ചും മയക്കുമരുന്നുകള്‍ ഉപയോഗിച്ചും വാഹനമോടിച്ച്‌ അപകട മരണങ്ങള്‍ ഉണ്ടാക്കുന്നവർക്കെതിരെ കർശന നടപടി സ്വീകരിക്കുന്നതിനായി പ്രത്യേക നിയമം കൊണ്ടുവരുന്ന കാര്യം നിയമവിദഗ്ധരുമായി ആലോചിക്കുകയാണെന്ന് ഗതാഗത മന്ത്രി സി.പി ജോണ്‍.
യാദൃശ്ചികമായി സംഭവിക്കുന്ന അപകടങ്ങള്‍ പോലെ അശ്രദ്ധ കൊണ്ടുണ്ടായ ചെറിയ കുറ്റമായി ഇത് പരിഗണിക്കില്ല. ലഹരിക്ക് അടിമപ്പെട്ട് ബോധപൂർവമെന്ന മട്ടില്‍ വാഹനമോടിച്ച്‌ ജീവഹാനിയുണ്ടാക്കുന്നവരുടെ വാഹനം കണ്ടുകെട്ടാനും ജയിലിലടയ്ക്കാനുമുള്ള നടപടികള്‍ കർശനമാക്കാൻ സർക്കാർ പ്രതിജ്ഞാബദ്ധമാണ്. ഇത് കൃത്യമായി പാലിക്കുമെന്ന് ഉറപ്പുനല്‍കുന്നതായും നിയമസഭയില്‍ സി.വി ശാന്തകുമാർ ഉന്നയിച്ച സബ്മിഷന് മറുപടിയായി മന്ത്രി വ്യക്തമാക്കി.
സംസ്ഥാനത്തെ വാഹനാപകടങ്ങള്‍ ഗണ്യമായി കുറയ്ക്കുന്നതിന്റെ ഭാഗമായി മുഖ്യമന്ത്രി ചെയർമാനും ഗതാഗത മന്ത്രി കോ ചെയർമാനുമായി റോഡ് സുരക്ഷാ മിഷൻ ആരംഭിക്കുകയാണെന്ന് മന്ത്രി അറിയിച്ചു. ഇതിനായി ആഭ്യന്തരം, പൊതുവിദ്യാഭ്യാസം, ഉന്നത വിദ്യാഭ്യാസം, ആരോഗ്യം, സാമൂഹിക നീതി, യുവജനക്ഷേമം, തദ്ദേശ സ്വയംഭരണം, പൊതുമരാമത്ത്, തൊഴില്‍, റവന്യൂ എന്നീ വകുപ്പുകളുടെ മന്ത്രിമാർ ചുമതല വഹിക്കുന്ന ഗവേണിങ് കൗണ്‍സില്‍ സംവിധാനം ഉടൻ നിലവില്‍ വരും. ഇതിന് കീഴില്‍ മിഷൻ ഡയറക്ടറേറ്റ് രൂപീകരിച്ച്‌ വിവിധ മിഷനുകള്‍ നടപ്പിലാക്കും. നിലവില്‍ 4000-ത്തോളം പേരാണ് വാഹനാപകടങ്ങളില്‍ മരിക്കുന്നത്. എല്ലാ അപകടങ്ങളും ഇല്ലാതാക്കുമെന്ന് അവകാശവാദമില്ലെങ്കിലും ഇത് വലിയ അളവില്‍ കുറയ്ക്കാൻ മിഷനിലൂടെ സാധിക്കുമെന്നും മന്ത്രി പറഞ്ഞു.
ശബരിമല സീസണ്‍ പ്രമാണിച്ച്‌ വിപുലമായ റോഡ് സുരക്ഷാ യോഗങ്ങള്‍ നടത്തുന്നുണ്ട്. കേന്ദ്ര ഉപരിതല ഗതാഗത മന്ത്രാലയത്തിന്റെ മാനദണ്ഡങ്ങള്‍ പാലിച്ച്‌ നാറ്റ്പാക് നടത്തിയ പഠനത്തില്‍ സംസ്ഥാനത്തെ വിവിധ റോഡുകളില്‍ ബ്ലാക് സ്പോട്ടുകള്‍ കണ്ടെത്തിയിട്ടുണ്ട്. അടൂർ എനാത്ത് മുതല്‍ പന്തളം വരെയുള്ള എം.സി റോഡ് ഭാഗത്ത് വർധിച്ചുവരുന്ന വാഹനാപകടങ്ങളെക്കുറിച്ചുള്ള ആശങ്ക സർക്കാർ വളരെ ഗൗരവത്തോടെയാണ് കാണുന്നത്. ഈ പ്രദേശത്ത് അപകട സാധ്യത വർധിപ്പിക്കുന്ന വളവുകള്‍, കാല്‍നട യാത്രക്കാരുടെ സുരക്ഷ ഉറപ്പാക്കുന്ന നടപ്പാതകളുടെ അഭാവം, അമിതവേഗത്തിന് സാധ്യതയുള്ള സ്ഥലങ്ങളില്‍ ലൈൻ മാർക്കിങ്ങിന്റെ അപര്യാപ്തത, ഓവർടേക്കിങ് ജങ്ഷനുകളിലെ അപര്യാപ്തമായ സൂചനാ സംവിധാനങ്ങള്‍, വളവുകള്‍ക്ക് അരികില്‍ ഭാരവാഹനങ്ങള്‍ പാർക്ക് ചെയ്യുന്നത് വഴി സൃഷ്ടിക്കപ്പെടുന്ന അപകട സാധ്യതകള്‍ എന്നിവയെല്ലാം വിശദമായി പഠിച്ചിട്ടുണ്ടെന്നും ഇതില്‍ അടിയന്തര ഇടപെടലുണ്ടാകുമെന്നും അദ്ദേഹം വ്യക്തമാക്കി. അപകട തീവ്രതയ്ക്ക് അനുസൃതമായി മുൻഗണനാ ക്രമത്തില്‍ റോഡ് സുരക്ഷാ ഫണ്ട് ഉപയോഗിച്ച്‌ എം.സി റോഡ് ഉള്‍പ്പെടെയുള്ള പാതകള്‍ ശാസ്ത്രീയമായി പരിഷ്കരിക്കുമെന്നും മന്ത്രി കൂട്ടിച്ചേർത്തു.
