തിരുവനന്തപുരം: നഷ്ടത്തിലോടുന്ന പൊതുമേഖല സ്ഥാപനമായ കണ്സ്യൂമണ് ഫെഡിലെ ഭരണാനുകൂല സംഘടന നേതാവിന് ഇരട്ട ശമ്പളം കിട്ടാൻ വിചിത്ര ഉത്തരവ്.
തിരുവനന്തപുരം അസി. മാനേജറും കോണ്ഗ്രസ് സംഘടന ജനറല് സെക്രട്ടറിയുമായ ജെ ഫ്രെഡിക്കുവേണ്ടിയാണ് വിചിത്ര ഉത്തരവ്. കണ്സ്യൂമർ ഫെഡില് പകല് സമയത്തെ ജോലിക്ക് പിന്നാലെ വൈകീട്ട് അഞ്ചു മുതല് മദ്യഷോപ്പിലും ദിവസ വേതനത്തിലും ഫെഡ്രിയെ നിയമിച്ചു.
കോണ്ഗ്രസ് സംഘടനാ നേതാവും ഡിഡിസി അംഗവുമായ ജെ ഫ്രെഡി കണ്സ്യൂമർ ഫെഡിൻ്റെ തിരുവനന്തപുരം അസി.മാനേജറാണ്. സ്റ്റാച്യുവിലുള്ള കണ്സ്യൂമർഫെഡിൻ്റെ മദ്യശാലയില് ഒരു ജീവനക്കാരൻ്റെ കുറവ കാരണം ഉപഭോക്താക്കള് ആകെ ബുദ്ധിമുട്ടുന്നുവെന്ന പരാതിയിലാണ് തുടക്കം.
സ്റ്റോർ മാനേജർ കണ്സ്യൂമർഫെഡ് എംഡിക്ക് കത്ത് നല്കിയതിന് പിന്നാലെ ഫ്രെഡി ഒരു നിവേദനം നല്കി. ഏതെങ്കിലും മദ്യശാലയില് ദിവസക്കൂലിക്ക് ജോലി വേണം. വൈകാതെ എംഡിയുടെ ഉത്തരവിറങ്ങി.
അഞ്ചു മണിക്ക് ശേഷം ഫ്രെഡിക്ക് മദ്യശാലയില് ജോലി ചെയ്യാം. 9 മണിവരെയുള്ള ജോലിക്ക് 425 രൂപ പ്രതിദിനം നല്കും.
60,000ത്തിനും 70,000ത്തിനും ഇടയില് ശമ്പളം വാങ്ങുന്ന അസി.മാനേജറിനാണ് നാലു മണിക്കൂർ ജോലിക്കായുള്ള ദിവസകൂലി കൂടി ലഭിക്കുന്നത്.
ജീവനക്കാരുടെ കുറവുണ്ടെങ്കില് ദിവസക്കൂലിക്കോ എംപ്ലോയിമെൻ്റ് വഴിയോ ഒരാളെ സ്ഥാപനത്തിന് നിയമിക്കാവുന്നതാണ്. ഒരാള്ക്കൂടി അത് വരുമാനമുണ്ടാക്കും.
പക്ഷെ സംഘടന നേതാവിന് പോക്കറ്റ് വീർപ്പിക്കാൻ വഴിവിട്ട നീക്കമാണ് നടന്നതെന്ന് വ്യക്തം. 3000 രൂപ വിറ്റുവരവും 1500 രൂപ സഞ്ചിത നഷ്ടവുമുള്ള സ്ഥാപനവുമാണ് കണ്സ്യൂമർ ഫെഡ്. പിൻവാതില് നിയമനങ്ങളും അഴിമതിയും എക്കാലവും കണ്സ്യൂമണ് ഫെഡിന് മുകളില് കരിനിഴലായി ഉണ്ട്.
അതേ സമയം എല്ഡിഎഫ് സർക്കാറിന്റെ കാലത്ത് ഇടത് സംഘടനാനേതാക്കള്ക്ക് സമാന രീതിയില് നിയമനം നല്കിയിട്ടുണ്ടെന്നും അസ്വാഭാവികത ഇല്ലെന്നുമാണ് ഫ്രെഡിയുടെ വിശദീകരണം






