കോട്ടയം: സിഐടിയു സംസ്ഥാന നേതൃത്വത്തിലേക്ക് എം.വി. ജയരാജനെ പ്രതിഷ്ഠിച്ച്‌ സ്വന്തം സ്വാധീനം ഉറപ്പിക്കാനുള്ള പ്രതിപക്ഷ നേതാവ് പിണറായി വിജയന്റെ നീക്കങ്ങള്‍ക്ക് കനത്ത പ്രഹരമേല്‍പ്പിച്ച്‌ എളമരം കരീമിന്റെ മാസ്റ്റര്‍ സ്‌ട്രോക്ക്.
പാര്‍ട്ടിയിലും അണികള്‍ക്കിടയിലും 'പിണറായിസത്തിന്റെ' അപ്രമാദിത്തത്തിന് വഴങ്ങേണ്ടതില്ലെന്ന വ്യക്തമായ സന്ദേശം നല്‍കി, സംഘടനയുടെ ഭരണം സ്വന്തം പക്ഷത്തുള്ള കെ.കെ. ജയചന്ദ്രന്റെ കൈകളില്‍ സുരക്ഷിതമാക്കാന്‍ എളമരം കരീം വിഭാഗത്തിനായി.
സംസ്ഥാന ജനറല്‍ സെക്രട്ടറി സ്ഥാനത്തേക്ക് തന്റെ വിശ്വസ്തനായ എം.വി. ജയരാജനെ എത്തിക്കാനായിരുന്നു കണ്ണൂര്‍ കേന്ദ്രീകരിച്ച്‌ പിണറായി വിജയനും സംഘവും അവസാന നിമിഷം വരെ കരുക്കള്‍ നീക്കിയത്. എന്നാല്‍, പരമ്പരാഗത തൊഴിലാളി സംഘടനയുടെ നിയന്ത്രണം പൂര്‍ണ്ണമായും പിണറായി ഗ്രൂപ്പിന് അടിയറവ് വെക്കാനാവില്ലെന്ന കടുത്ത നിലപാടിലാണ് കരീം ഉറച്ചുനിന്നത്.
സ്ഥാനമൊഴിയുന്ന ജനറല്‍ സെക്രട്ടറി എളമരം കരീം നടത്തിയ അതിസമര്‍ത്ഥമായ കരുനീക്കങ്ങള്‍ക്കൊടുവില്‍ ഫ്രാക്ഷന്‍ യോഗത്തില്‍ കെ.കെ. ജയചന്ദ്രന്റെ പേരിന് അംഗീകാരം ലഭിക്കുകയായിരുന്നു. കെ.കെ. ജയചന്ദ്രനെ പുതിയ ജനറല്‍ സെക്രട്ടറിയായും വി. ശിവന്‍കുട്ടിയെ ട്രഷററായും തിരഞ്ഞെടുക്കാന്‍ ധാരണയായി. നിലവിലെ സംസ്ഥാന പ്രസിഡന്റ് ടി.പി. രാമകൃഷ്ണന്‍ സ്ഥാനത്ത് തുടരും.
സിഐടിയു കോട്ടയത്ത് തുടക്കം കുറിച്ച 16-ാം സംസ്ഥാന സമ്മേളനത്തിന്റെ ഫ്രാക്ഷന്‍ യോഗത്തിലാണ് പിണറായി വിജയന്റെ പ്ലാനുകളെ അട്ടിമറിച്ചുള്ള ഈ അന്തിമ തീരുമാനമുണ്ടായത്. സംഘടനയിലെ പാര്‍ട്ടി മേധാവിത്വത്തിനെതിരെയുള്ള തൊഴിലാളി വികാരത്തിന് കൂടിയാണ് കരീം ഇവിടെ തണലൊരുക്കിയത്.
കോട്ടയം തിരുനക്കര മൈതാനത്ത് സംഘാടക സമിതി ചെയര്‍മാന്‍ പി.ആര്‍. രഘുനാഥ് പതാക ഉയര്‍ത്തിയതോടെ ആരംഭിച്ച സമ്മേളനത്തില്‍, ഔദ്യോഗികമായി തപന്‍ സെന്‍ പ്രതിനിധി സമ്മേളനം ഉദ്ഘാടനം ചെയ്യുന്നതിന് മുന്‍പ് തന്നെ നേതൃതലത്തില്‍ കനത്ത രാഷ്ട്രീയ പോരുകള്‍ക്കാണ് കളമൊരുങ്ങിയത്.
നേതൃത്വത്തിലെ പിണറായിസത്തെ ചെറുത്തുതോല്‍പ്പിച്ചതിന് പിന്നാലെ, സര്‍ക്കാരിന്റെ അവഗണനയ്‌ക്കെതിരെ കടുത്ത വിമര്‍ശന ശരങ്ങളടങ്ങിയ സംഘടനാ റിപ്പോര്‍ട്ടും സമ്മേളനത്തില്‍ പുറത്തുവന്നു. സംസ്ഥാനത്തെ മഹാഭൂരിപക്ഷം വരുന്ന തൊഴിലാളികളെ പരിഗണിക്കാതിരുന്ന പിണറായി സര്‍ക്കാരിന്റെ പ്രവൃത്തികളാണ് അടുത്തിടെ നടന്ന തിരഞ്ഞെടുപ്പ് തിരിച്ചടിക്ക് ഇടയാക്കിയതെന്ന കുറ്റപ്പെടുത്തലോടെയാണ് കരീം റിപ്പോര്‍ട്ട് സമര്‍പ്പിച്ചിരിക്കുന്നത്.
തൊഴിലാളികളുടെ ന്യായമായ ആനുകൂല്യങ്ങളും ക്ഷേമനിധി വിഹിതവും നല്‍കാന്‍ സര്‍ക്കാര്‍ തയാറായില്ലെന്ന് റിപ്പോര്‍ട്ട് തുറന്നടിക്കുന്നു. ജനസംഖ്യയുടെ 60 ശതമാനത്തോളം വരുന്ന തൊഴില്‍ മേഖലയെ നിഷ്‌കരുണം തള്ളിക്കളഞ്ഞ സര്‍ക്കാര്‍ നടപടിയെ സിഐടിയു നിരന്തരം എതിര്‍ത്തതാണെന്നും റിപ്പോര്‍ട്ടില്‍ സൂചിപ്പിക്കുന്നു.
പെന്‍ഷനുകളില്‍ ശ്രദ്ധ കാണിച്ച ഭരണാധികാരികള്‍ തൊഴിലാളികളുടെ ക്ഷേമ ഫണ്ടുകളില്‍ അനാസ്ഥ കാട്ടി. നിരന്തരം സമരങ്ങള്‍ സംഘടിപ്പിച്ചിട്ടും തൊഴിലാളി വര്‍ഗത്തിന്റെ പരാതികള്‍ കേള്‍ക്കാന്‍ മുഖ്യമന്ത്രിയോ സര്‍ക്കാരോ തയാറായില്ലെന്ന് റിപ്പോര്‍ട്ട് ശക്തമായി കുറ്റപ്പെടുത്തുന്നു.
സിപിഎമ്മില്‍ മറ്റ് പോഷക സംഘടനകളായ എസ്‌എഫ്‌ഐക്കും ഡിവൈഎഫ്‌ഐക്കും ലഭിക്കുന്ന പരിഗണനയോ പ്രാധാന്യമോ സിഐടിയുവിന് ലഭിക്കുന്നില്ലെന്ന കടുത്ത അസംതൃപ്തിയും സമ്മേളനവേദിയില്‍ പുകയുകയാണ്. ഒരു തൊഴിലാളി വര്‍ഗ പാര്‍ട്ടിയില്‍ ഏറ്റവും അടിസ്ഥാനപരമായ സംഘടന അനുഭവിക്കുന്ന ഈ അവഗണന പാര്‍ട്ടിക്ക് തന്നെ തിരിച്ചടിയാവുകയാണ്.
തിരഞ്ഞെടുപ്പ് പരാജയം ചര്‍ച്ച ചെയ്ത പാര്‍ട്ടി ഘടകങ്ങള്‍ അണികളുടെ നിഷ്‌ക്രിയത്വത്തെപ്പറ്റി മൃദുവായ ഭാഷയില്‍ പ്രതികരിച്ചപ്പോള്‍, സിഐടിയു അത് പരസ്യമായി അക്കമിട്ട് നിരത്തുകയാണ്. പാര്‍ട്ടിയുടെ ഭൂരിഭാഗം പോഷക ശക്തിയായ തൊഴിലാളികള്‍ നിരാശരും അസംതൃപ്തരുമായതാണ് അടിത്തറ ഇളകാന്‍ കാരണമെന്ന് കരീം വ്യക്തമാക്കുന്നു.
സിപിഎമ്മിന് ആകെ 5.75 ലക്ഷം അംഗങ്ങളുള്ളപ്പോള്‍ സിഐടിയുവിന് 32.86 ലക്ഷം അംഗങ്ങളാണുള്ളത്. ഈ കൂറ്റന്‍ ജനകീയ അടിത്തറയെ തള്ളിപ്പറഞ്ഞ് മുന്നോട്ട് പോയ പിണറായി സര്‍ക്കാരിന്റെ രീതികള്‍ പാര്‍ട്ടിയെ ജനങ്ങളില്‍ നിന്ന് അകറ്റിയെന്നാണ് റിപ്പോര്‍ട്ടിലെ പ്രധാന വിലയിരുത്തല്‍.
ഒന്‍പതിന് നടക്കുന്ന ബഹുജന റാലിയോടെയും പൊതുസമ്മേളനത്തോടെയും സംസ്ഥാന സമ്മേളനം സമാപിക്കും. സമ്മേളന ഉദ്ഘാടകനായി എത്തുന്നത് പ്രതിപക്ഷ നേതാവ് പിണറായി വിജയനാണെങ്കിലും, തൊഴിലാളി നേതാക്കളും അണികളും അദ്ദേഹത്തിന് മുന്നില്‍ ഉയര്‍ത്താന്‍ പോകുന്ന ചോദ്യങ്ങള്‍ ചെറുതായിരിക്കില്ല.
എം.വി. ജയരാജനെ സെക്രട്ടറി സ്ഥാനത്ത് എത്തിക്കാനുള്ള മോഹം പൊളിയുകയും, ഒപ്പം സര്‍ക്കാരിനെതിരെയുള്ള തൊഴില്‍ രോഷം റിപ്പോര്‍ട്ടായി കയ്യില്‍ കിട്ടുകയും ചെയ്തതോടെ സിഐടിയു കോട്ടയം സമ്മേളനം പിണറായി വിജയന് വഴങ്ങാത്ത പുതിയൊരു രാഷ്ട്രീയ അധ്യായത്തിനാണ് തുടക്കമിട്ടിരിക്കുന്നത്
