.കോട്ടയം: സി.ഐ.ടി.യുവിന്റെ 16-ാം സംസ്ഥാന സമ്മേളനത്തിനു കോട്ടയത്ത് പതാക ഉയര്‍ന്നു. സംഘാടകസമിതി ചെയര്‍മാന്‍ ടി.ആര്‍. രഘുനാഥന്‍ പതാക ഉയര്‍ത്തി.
തൊഴിലാളിപ്രസ്‌ഥാനത്തെ കെട്ടിപ്പടുക്കാന്‍ മുന്നില്‍നിന്നു നയിച്ച പ്രമുഖ നേതാക്കളുടെ സ്‌മൃതിമണ്ഡപങ്ങളില്‍നിന്നാണു പതാക-കൊടിമര-കപ്പി-കയര്‍ ജാഥകള്‍ ഇന്നലെ ഉച്ചയോടെ പുറപ്പെട്ടത്‌. കോട്ടയം കലക്‌ടറേറ്റ്‌ പരിസരത്ത്‌ സംഗമിച്ച ജാഥകള്‍ വൈകിട്ട്‌ അഞ്ചോടെ തിരുനക്കര മൈതാനത്തെത്തി. തുടര്‍ന്നായിരുന്നു പതാക ഉയര്‍ത്തല്‍.
പ്രതിനിധി സമ്മേളനം നടക്കുന്ന മാമ്മന്‍ മാപ്പിള ഹാളില്‍ സ്‌ഥാപിക്കാനുള്ള ദീപശിഖ വഹിച്ചുള്ള ജാഥ ഇന്നു രാവിലെ 7.30ന്‌ നീണ്ടൂര്‍ രക്‌തസാക്ഷി മണ്ഡപത്തില്‍ നിന്നെത്തി. സിപി.എം. സംസ്ഥാന സെക്രട്ടേറിയറ്റംഗം വി.എന്‍. വാസവന്‍ ഉദ്‌ഘാടനം ചെയ്തു. രാവിലെ 9.15ന്‌ ദീപശിഖ സമ്മേളന നഗറില്‍ സ്‌ഥാപിച്ചു. 9.30ന്‌ സംസ്ഥാന പ്രസിഡന്റ്‌ ടി.പി. രാമകൃഷ്‌ണന്‍ പതാക ഉയര്‍ത്തി.പ്രതിനിധി സമ്മേളനം അഖിലേന്ത്യ വൈസ്‌ പ്രസിഡന്റ്‌ തപന്‍ സെന്‍ ഉദ്‌ഘാടനം ചെയ്യും.
ജനറല്‍ സെക്രട്ടറി എളമരം കരീം പ്രവര്‍ത്തന റിപ്പോര്‍ട്ട്‌ അവതരിപ്പിക്കും. 1149 യൂണിയനുകളെ പ്രതിനിധീകരിച്ച്‌ 625 പ്രതിനിധികള്‍ പങ്കെടുക്കും. ഒന്‍പതിനു വൈകിട്ടു നാലിനു ലക്ഷം തൊഴിലാളികള്‍ അണിനിരക്കുന്ന റാലി. പൊതുസമ്മേളനം നെഹ്‌റു സ്‌റ്റേഡിയത്തില്‍ പ്രതിപക്ഷ നേതാവ്‌ പിണറായി വിജയന്‍ ഉദ്‌ഘാടനം ചെയ്യും.
