ചങ്ങനാശ്ശേരി: ചങ്ങനാശ്ശേരി ഗവ. ഹൈസ്കൂളിന്റെ പിൻഭാഗത്തെ കാട് നീക്കുന്നില്ല. മൈതാനത്തിന് ചുറ്റുമുള്ള മതിൽ പൂർണമായും തകർന്നു.
മതിലില്ലാത്ത ഭാഗത്തുകൂടി സമൂഹവിരുദ്ധർ സ്കൂൾവളപ്പിൽ പ്രവേശിക്കുന്നതും അനാശാസ്യ പ്രവർത്തനങ്ങളിലേർപ്പെടുന്നതും പതിവാണ്. സ്കൂളിലെ പല ഉപകരണങ്ങളും നശിപ്പിക്കുന്നതിനെതിരേ സ്കൂൾ അധികൃതർ പരാതി നൽകിയിരുന്നു.
സ്കൂൾ മൈതാനം സംരക്ഷിക്കണമെന്നും സംരക്ഷണഭിത്തി നിർമിക്കണമെന്നും സ്കൂൾ വികസനസമിതി മുമ്പ് ആവശ്യപ്പെട്ടിരുന്നു. സ്കൂൾ വളപ്പിലെ കൂറ്റൻമരങ്ങൾ പുറകിലെ വഴികളിലൂടെയുള്ള യാത്രക്കാർക്ക് ഭീഷണിയാണ്. ഈ മരങ്ങളിലെ ചില്ലകൾ ഉണങ്ങി ഏതുനിമിഷവും താഴെ വീഴാം. ചങ്ങനാശ്ശേരി അതിവേഗ കോടതിസമുച്ചയത്തിന്റെ സമീപത്തെ റോഡുകൂടിയാണിത്.
