പെരുവ: മുളക്കുളം ഗ്രാമപ്പഞ്ചായത്തിലും സമീപപ്രദേശങ്ങളിലും വാട്ടർ അതോറിറ്റിയുടെ കുടിവെള്ള പൈപ്പുകൾ പതിവായി പൊട്ടി വെള്ളം പാഴാകുന്നതായി പരാതി.
തലയോലപ്പറമ്പ്- പെരുവ റോഡിൽ പഞ്ചായത്തിന്റെ മുഴയുമ്മൂടുള്ള പൊതുശ്മശാനത്തിനു സമീപം പൈപ്പ് പൊട്ടി വെള്ളം പാഴാകാൻ തുടങ്ങിയിട്ട് മൂന്ന് ദിവസമായി. പഞ്ചായത്ത് പരിധിയിൽ ഒരിടത്തെങ്കിലും ദിവസവും പൈപ്പുപൊട്ടുന്ന സ്ഥിതിയാണുള്ളത്. പൊട്ടിയ പൈപ്പുകൾ ദിവസങ്ങളോളം കഴിഞ്ഞാണ് നന്നാക്കുന്നത്.
പ്രധാന റോഡുകളുടെ വശത്ത് മൺകൂനകൾക്ക് മുകളിൽ കാട്ടുചെടികൾ വളർന്നു നിൽക്കുന്നത് പൈപ്പ് തകർന്ന സ്ഥലങ്ങളാണെന്നും നാട്ടുകാർ ചൂണ്ടിക്കാട്ടുന്നു.
പൈപ്പുകളുടെ കാലപ്പഴക്കമാണ് പ്രധാന കാരണം. 1983-ൽ സ്ഥാപിച്ച പൈപ്പുകളാണ് ഇപ്പോഴുള്ളത്. സ്ഥലം എം.എൽ.എ. അഡ്വ. മോൻസ് ജോസഫ് നിലവിൽ വകുപ്പുമന്ത്രിയായതിനാൽ ഈ പ്രശ്നത്തിന് പരിഹാരമുണ്ടാകുമെന്നാണ് നാട്ടുകാരുടെ പ്രതീക്ഷ.
