കൊച്ചി: ചേരാനല്ലൂരില്‍ 56കാരന്റെ ജീവനെടുത്ത വാഹനാപകടത്തില്‍ വാഹനം ഓടിച്ച 17കാരനായ പ്രതിക്ക് ജാമ്യം അനുവദിച്ച ഉത്തരവ് ചോദ്യം ചെയ്തുള്ള ഹർജി ഇന്ന് ഹൈക്കോടതി പരിഗണിക്കും.
കീഴ്കോടതി വിധി റദ്ദാക്കണമെന്നാണ് മരിച്ച ജയബാലകൃഷ്ണന്റെ കുടുംബത്തിന്റെ ആവശ്യം. കേസ് അട്ടിമറിക്കാൻ സാധ്യതയുണ്ടെന്നും പ്രതിയായ ജഡ്ജിക്കെതിരെ നടപടി വേണമെന്നുമാണ് ഹർജിയിലെ ആവശ്യം.
ജയബാലകൃഷ്ണന്റെ മക്കളായ ഭദ്രകീർത്തിയും ഭരത് ശങ്കറും നല്‍കിയ ക്രിമിനല്‍ റിവിഷൻ ഹർജിയാണ് ജസ്റ്റിസ് സി. ജയചന്ദ്രന്റെ ബെഞ്ച് പരിഗണിക്കുന്നത്. പ്രതിക്ക് ജാമ്യം അനുവദിച്ച ജുവനൈല്‍ ജസ്റ്റിസ് ബോർഡിന്റെ ഉത്തരവും ജാമ്യം ശരിവച്ച കുട്ടികളുടെ കോടതിയുടെ ഉത്തരവും റദ്ദാക്കണമെന്നാണ് ആവശ്യം.
ജാമ്യം നല്‍കിയത് നീതി നിർവഹണത്തെ ബാധിക്കുമെന്നും 17കാരൻ്റെ പിതാവ് സർവീസിലുള്ള ജുഡീഷ്യല്‍ ഓഫീസർ ആണെന്നും ഹർജിയില്‍ ചൂണ്ടിക്കാട്ടുന്നുണ്ട്.
ഒരാള്‍ക്ക് ജീവൻ നഷ്ടപ്പെട്ട കേസാണെന്നും പ്രതിക്ക് ജാമ്യം നല്‍കി വിട്ടത് നീതിന്യായ വ്യവസ്ഥയുടെ വിശ്വാസ്യതയെത്തന്നെ ചോദ്യം ചെയ്യുമെന്നും പ്രതിയെ ഒബ്സെർവഷൻ ഹോമില്‍ അയക്കണമെന്നും ചൂണ്ടിക്കാട്ടിയാണ് ഹൈക്കോടതിയെ സമീപിച്ചത്.
കേവലം അശ്രദ്ധ മൂലമല്ല അപകടമുണ്ടായതെന്നും മനുഷ്യജീവന് വിലകല്‍പ്പിക്കാത്ത മനോഭാവമാണ് പ്രതി കാട്ടിയതെന്നും ചൂണ്ടിക്കാട്ടുന്നു. കുട്ടിയുടെ പിതാവ് ഉന്നത സ്വാധീനമുള്ള ജൂഡിഷ്യല്‍ ഓഫീസറാണെന്നും ഇതുകൊണ്ട് തെളിവ് നശിപ്പിക്കപ്പെടുമെന്നും കോടതിയെ ഓർമിപ്പിച്ചു. അപകടമുണ്ടായതിന് ശേഷം പൊലീസിന് സംഭവിച്ച വീഴ്ചകളും ചൂണ്ടിക്കാട്ടുന്നു.
