ചെങ്ങന്നൂർ: ശബരിമലയുടെ പ്രവേശന കവാടമായ ചെങ്ങന്നൂർ പൊലീസ് സ്റ്റേഷൻ അടിസ്ഥാന സൗകര്യങ്ങളുടെ അപര്യാപ്തതയും രൂക്ഷമായ ജീവനക്കാരുടെ ക്ഷാമവും മൂലം കടുത്ത പ്രതിസന്ധിയില്‍.
മൂന്നര ഏക്കറോളം വരുന്ന ഭൂമിയില്‍ പ്രവർത്തിക്കുന്ന പൊലീസ് സ്റ്റേഷനും ഡിവൈഎസ്പി ഓഫീസും നിർമിച്ച്‌ ഒരു പതിറ്റാണ്ട് പിന്നിടുമ്പോഴും ശോചനീയാവസ്ഥയിലാണ്. മണ്ഡലകാല തീർഥാടനത്തിന് ഇനി ദിവസങ്ങള്‍ മാത്രം ബാക്കിനില്‍ക്കെ, പ്രധാന തീർഥാടന താവളമായ ചെങ്ങന്നൂരിലെ പൊലീസ് സ്റ്റേഷന്റെ ഈ ദുരവസ്ഥ ക്രമസമാധാനപാലനത്തിന് വലിയ വെല്ലുവിളിയാകുമെന്ന ആശങ്കയിലാണ് നാട്ടുകാർ.
106 വാർഡുകള്‍ ഉള്‍പ്പെടുന്ന വിശാലമായ പ്രദേശമാണ് ചെങ്ങന്നൂർ പൊലീസ് സ്റ്റേഷന്റെ പരിധിയില്‍ വരുന്നത്. സുഗമമായ പ്രവർത്തനത്തിന് 120 തസ്തികകളുള്ള ഇവിടെ കുറഞ്ഞത് 106 ഉദ്യോഗസ്ഥരെങ്കിലും വേണം.
എന്നാല്‍ നിലവില്‍ 46 പേർ മാത്രമാണുള്ളത്. ഇത് കുറ്റകൃത്യങ്ങള്‍ തടയുന്നതിനും പരാതികളില്‍ യഥാസമയം നടപടിയെടുക്കുന്നതിനും വലിയ തടസം സൃഷ്ടിക്കുന്നു. നഗരത്തില്‍ നിന്നും മാറി സ്ഥിതിചെയ്യുന്ന സ്റ്റേഷന് ചുറ്റുമതില്‍ പോലുമില്ല. അപകടങ്ങളില്‍പ്പെടുന്നതും കേസുകളില്‍ പിടിച്ചെടുക്കുന്നതുമായ വാഹനങ്ങള്‍ സുരക്ഷിതമായി സൂക്ഷിക്കാൻ കഴിയാത്ത സ്ഥിതിയാണിപ്പോള്‍.
കൃത്യമായ സംരക്ഷണമില്ലാത്തതിനാല്‍ സ്റ്റേഷൻ പരിസരം കാടുപിടിച്ചുകിടക്കുകയാണ്. കേസിലുള്‍പ്പെട്ട വാഹനങ്ങള്‍ സൂക്ഷിക്കുന്ന ഈ പ്രദേശം ഇപ്പോള്‍ ഇഴജന്തുക്കളുടെ ആവാസകേന്ദ്രമായി മാറി.
പരിസരം വൃത്തിയാക്കാൻ പോലും അധികൃതരുടെ ഭാഗത്തുനിന്നും നടപടികളുണ്ടാകുന്നില്ലെന്ന് ശക്തമായ ആക്ഷേപമുണ്ട്.
സ്റ്റേഷനില്‍ ആവശ്യത്തിന് കമ്പ്യൂട്ടറുകളോ അനുബന്ധ സാമഗ്രികളോ ഇല്ല. ഔദ്യോഗിക ആവശ്യങ്ങള്‍ക്കായി ഉദ്യോഗസ്ഥർ സ്വന്തം കൈയില്‍ നിന്ന് പണം മുടക്കി സാധനങ്ങള്‍ വാങ്ങേണ്ട ഗതികേടിലാണ്.
ജീവനക്കാരുടെ കുറവ് പരിഹരിക്കാനും ചുറ്റുമതില്‍ നിർമിച്ച്‌ സുരക്ഷ ഉറപ്പാക്കാനും ഭൗതിക സാഹചര്യങ്ങള്‍ ലഭ്യമാക്കാനും അടിയന്തരമായി ഇടപെടണമെന്ന് ആവശ്യപ്പെട്ട് നാട്ടുകാർ ആഭ്യന്തരമന്ത്രി രമേശ് ചെന്നിത്തലയ്ക്ക് പരാതി നല്‍കി.
