മുറിഞ്ഞപുഴ : ബ്രിട്ടീഷ് ആധിപത്യത്തിനെതിരെ പടവെട്ടിയധീര ദേശാഭിമാനി ചെമ്പിൽ അനന്തപത്മനാഭൻ വലിയ അരയൻ്റെ സ്മരണയ്ക്കായി നടത്തിയ ദി റിവർ ക്യൂൻ അഞ്ചാമത് ചെമ്പിലരയൻ ജലോത്സവം നാടിൻ്റെ ആകെ ഉത്സവമായി. ഇന്നലെ ഉച്ചകഴിഞ്ഞ് സി ബി സി ക്യാപ്ടൻ കെ.ജെ.പോൾ ചുമ്മാരു പറമ്പിൽ പതാക ഉയർത്തിയതോടെ മൂവാറ്റുപുഴയാറിലെ ചെമ്പ് മുറിഞ്ഞപുഴയിലെ ഓളപ്പരപ്പിനെ പുളകമണിയിച്ച് ജലോത്സവം ആരംഭിച്ചു. മുവാറ്റുപുഴയാർ വേമ്പനാട്ടുകായലിൽ സംഗമിക്കുന്നതിന് മുമ്പായി രണ്ടായി മുറിയുന്ന ചെമ്പ് മുറിഞ്ഞപുഴയിലെ പഴയപാലത്തിന് അഭിമുഖമായാണ് ജലോത്സവം നടന്നത്. പുഴയുടെ ഇരു കരകളിലും നിറഞ്ഞ കരഘോഷത്തോടെ പ്രദേശവാസികളും വിവിധ സ്ഥലങ്ങളിൽ നിന്നെത്തിയ വളളം കളി പ്രേമികളും തുഴച്ചിൽകാരെ ആവശേ ഭരിതരാക്കിയപ്പോൾ ഇഞ്ചോടിഞ്ച് പൊരുതി വളളങ്ങൾ മുന്നേറി. വിദേശ വിനോദ സഞ്ചാരികളടക്കം നൂറുകണക്കിന് സഞ്ചാരികൾ എത്തുന്ന മുറിഞ്ഞപുഴയുടെ വിനോദ സഞ്ചാര വികസനത്തിന് വള്ളംകളിയും ആക്കം കൂട്ടിയിട്ടുണ്ട്.
ചെമ്പിലരയൻജലോത്സവത്തിൽ ഇരുട്ടുകുത്തി എ ഗ്രേഡ് വിഭാഗത്തിൽ ഗരുഡൻ ഒന്നാം സ്ഥാനം കരസ്ഥമാക്കി. താണിയൻ രണ്ടാം സ്ഥാനവും ഗോതുരുത്ത് പുത്രൻ മൂന്നാം സ്ഥാനവും നേടി. ഇരുട്ടുകുത്തി ബി വിഭാഗത്തിൽ മടപ്ലാതുരുത്ത് ഒന്നാം സ്ഥാനവും മയിൽപീലി രണ്ടാം സ്ഥാനവും വടക്കുംപുറം മൂന്നാം സ്ഥാനവും കരസ്ഥമാക്കി. ചെറുവള്ളങ്ങളുടെ മത്സരത്തിൽ ജുഗുനു, പടയാളി, തലക്കാട്ട് അമ്മ എന്നിവർ യഥാക്രമം ഒന്നും രണ്ടും മൂന്നും സ്ഥാനങ്ങൾ നേടി. ചെമ്പിലരയൻ ബോട്ട് ക്ലബ് പ്രസിഡൻ്റ് എസ്.ഡി.സുരേഷ് ബാബുവിൻ്റെ അധ്യക്ഷതയിൽ നടന്ന സമാപന സമ്മേളനത്തിൽ സിബിസി ചീഫ് കോ -ഓർഡിനേറ്റർ കുമ്മനം അഷറഫ്,ജില്ലാ പഞ്ചായത്ത് അംഗം എം.കെ.രാജേഷ്, കെ.ജെ.പോൾ ചുമ്മാരു പറമ്പിൽ, സിബിസി സെക്രട്ടറി കെ.കെ. രമേശൻ ,ട്രഷറർ കെ.എസ്.രത്നാകരൻ, ടി.എൻ.സിബി, എം.എ. അബ്‌ദുൾ ജലീൽ, പി.എ.രാജപ്പൻ,ബ്ലോക്ക് ഗ്രാമ പഞ്ചായത്ത് അംഗങ്ങൾ തുടങ്ങിയവർ പ്രസംഗിച്ചു.
