മുബൈ: ട്രെയിൻ യാത്രക്കാർക്കായി കർശന നിർദേശവുമായി സെൻട്രല്‍ റെയില്‍വേ.
ഒക്ടോബർ മാസം മുഴുവൻ നീണ്ടുനില്‍ക്കുന്ന പ്രത്യേക ടിക്കറ്റ് പരിശോധനാ ക്യാമ്പയിന് റെയില്‍വേ തുടക്കമിട്ടു.
2026 ഒക്ടോബർ 1 മുതല്‍ 31 വരെയാണ് രാജ്യവ്യാപകമായി പ്രത്യേക പരിശോധന നടക്കുന്നത്. ടിക്കറ്റുകളുടെ സാധുത, യാത്രാ ഇളവുകള്‍, റിസർവേഷൻ ക്വാട്ടകള്‍, റെയില്‍വേ പാസുകള്‍ എന്നിവയാണ് പ്രധാനമായും പരിശോധിക്കുക.
യാത്രക്കാർ ശ്രദ്ധിക്കേണ്ട പ്രധാന കാര്യങ്ങള്‍
ഒരേ ടിക്കറ്റില്‍ ഒന്നിലധികം പേർ യാത്ര ചെയ്യുകയാണെങ്കില്‍, സംഘത്തിലുള്ള ആരെങ്കിലും ഒരാളെങ്കിലും നിർബന്ധമായും ഒറിജിനല്‍ തിരിച്ചറിയല്‍ രേഖ കയ്യില്‍ കരുതണം. രേഖകള്‍ ഹാജരാക്കാൻ കഴിഞ്ഞില്ലെങ്കില്‍ മുഴുവൻ യാത്രക്കാരെയും ടിക്കറ്റില്ലാത്തവരായി കണക്കാക്കി നടപടിയെടുക്കും.
യാത്രാനിരക്കില്‍ ഇളവ് ലഭിക്കുന്നവരും പ്രത്യേക ക്വാട്ടയില്‍ ടിക്കറ്റ് എടുത്തവരും അതിനുള്ള അർഹത തെളിയിക്കുന്ന ഒറിജിനല്‍ രേഖകള്‍ യാത്രയില്‍ ഉടനീളം സൂക്ഷിക്കണം.
ഇ-പാസ് അല്ലെങ്കില്‍ പാസഞ്ചർ ഓർഡർ ടിക്കറ്റ് ഉപയോഗിച്ച്‌ യാത്ര ചെയ്യുന്ന റെയില്‍വേ ജീവനക്കാരും കുടുംബാംഗങ്ങളും ഒറിജിനല്‍ തിരിച്ചറിയല്‍ രേഖ കരുതണം. യാത്രയ്ക്ക് മുൻപ് ഇ-പാസ് ഔദ്യോഗിക യാത്രാ അധികാരപത്രമാക്കി മാറ്റിയിരിക്കണം.
ടിക്കറ്റില്ലാതെയോ അനധികൃതമായോ യാത്ര ചെയ്യുന്നവർക്കുള്ള കുറഞ്ഞ പിഴ 250 രൂപയില്‍ നിന്ന് 500 രൂപയായി ഉയർത്തി. യാത്രാനിരക്കിന് പുറമേയാണ് ഈ തുക ഈടാക്കുന്നത്.
റിസർവ് ചെയ്ത ടിക്കറ്റുകള്‍ക്ക് പുറമെ അണ്‍റിസർവ്ഡ് ടിക്കറ്റുകളും ശക്തമായി പരിശോധിക്കും. ടിക്കറ്റുകളില്‍ സംശയം തോന്നിയാല്‍ 'ടിക്കറ്റ് എക്സാമിനർ ആപ്പ്' ഉപയോഗിച്ച്‌ ഉദ്യോഗസ്ഥർ വിവരങ്ങള്‍ പരിശോധിക്കും.
റിസർവേഷൻ ദുരുപയോഗം, യാത്രാ ഇളവുകളുടെ അനധികൃത ഉപയോഗം എന്നിവ തടയുകയാണ് ഒരു മാസം നീളുന്ന ഈ പ്രത്യേക പരിശോധനാ ക്യാമ്പയിന്റെ ലക്ഷ്യമെന്ന് റെയില്‍വേ അധികൃതർ വ്യക്തമാക്കി. യാത്രക്കാർ ഫോട്ടോകോപ്പികള്‍ക്ക് പകരം ഒറിജിനല്‍ തിരിച്ചറിയല്‍ രേഖകള്‍ കൈവശം വെക്കാനും പരിശോധനാ ഉദ്യോഗസ്ഥരുമായി സഹകരിക്കാനും അധികൃതർ അഭ്യർത്ഥിച്ചു.
