പത്തനംതിട്ട: തട്ടിക്കൊണ്ടുപോകല്‍ ഭീതിയില്‍ പത്തനംതിട്ടയിലെ രക്ഷിതാക്കളും പെണ്‍കുട്ടികളും. കൊടുമണ്‍, പഴകുളം എന്നിവിടങ്ങളിലാണ് തട്ടിക്കൊണ്ടുപോകല്‍ പരാതി ലഭിച്ചത്.
വെള്ള നിറത്തിലുളള കാറിലെത്തിയ രണ്ടുപേർ തട്ടിക്കൊണ്ടുപോകാൻ ശ്രമിച്ചെന്നാണ് കുട്ടികള്‍ പറയുന്നത്.
പഴകുളത്ത് മദ്രസയില്‍ നിന്ന് വീട്ടിലേക്ക് മടങ്ങുകയായിരുന്ന കുട്ടികളെ കനാല്‍ റോഡിലെ വിജനമായ സ്ഥലത്തുവച്ച്‌ തട്ടിക്കൊണ്ടുപോകാൻ ശ്രമിക്കുകയായിരുന്നു എന്നാണ് മൊഴി. കുട്ടികളുടെ ബഹളംകേട്ട് സമീപവാസിയായ സ്ത്രീ എത്തുമ്പോഴേക്കും കാർ വേഗത്തില്‍ ഓടിച്ചുപോവുകയായിരുന്നു. ദൃശ്യങ്ങളില്‍ കണ്ട കാറിന് സമാനമായ കാർ ഇതിന് തൊട്ടടുത്തുളള ആദിക്കാട്ടുകുളങ്ങരയില്‍ കണ്ടെത്തിയിട്ടുണ്ടെന്നാണ് റിപ്പോർട്ട്. കാറിലുള്ളവരോട് പൊലീസ് കാര്യങ്ങള്‍ ചോദിച്ചറിയുന്നുണ്ട്. തട്ടിക്കൊണ്ടുപോകാനുള്ള ശ്രമമായിരുന്നോ രണ്ടിടത്തും നടന്നതെന്ന് ഉറപ്പിക്കാനാവില്ലെന്ന സൂചനയാണ് പൊലീസ് നല്‍കുന്നത്.
തിങ്കളാഴ്ച വൈകിട്ടായിരുന്നു സംഭവം. ഒമ്പത് വയസുള്ള രണ്ടു പെണ്‍കുട്ടികളെയാണ് കാറിലെത്തിയവർ തട്ടികൊണ്ടുപോകാൻ ശ്രമിച്ചതെന്നാണ് പരാതി.കുട്ടികള്‍ കാട് മൂടിയ സ്ഥലത്ത് എത്തിയപ്പോഴാണ് കാറ് കുട്ടികള്‍ക്ക് സമീപമെത്തിയത്. ബന്ധുക്കളാണെന്ന് പറഞ്ഞുകൊണ്ട് കാറില്‍ കയറാനാവശ്യപ്പെടുകയായിരുന്നു. ഉമ്മയെ അറിയാമെന്നും വീട്ടില്‍ കൊണ്ടുവിടാമെന്നുമാണ് ഇവർ പറഞ്ഞത്. കാറില്‍ ഉണ്ടായിരുന്നത് ഒരു പുരുഷനും സ്ത്രീയുമാണെന്ന് കുട്ടികള്‍ പറഞ്ഞിരുന്നു. കുട്ടികളുടെ മാതാപിതാക്കളാണ് പൊലീസില്‍ പരാതി നല്‍കിയത്.
ഇതിനുപിന്നാലെയാണ് കൊടുമണ്‍ അങ്ങാടിക്കലില്‍ നിന്നും തട്ടിക്കൊണ്ടുപോകാൻ ശ്രമിച്ചെന്നുള്ള പരാതി ലഭിച്ചത്. ഇവിടെയും പ്രതിസ്ഥാനത്തുള്ളത് വെള്ളനിറത്തിലെ കാറായിരുന്നു. കാറിന്റെ ദൃശ്യങ്ങള്‍ ലഭിച്ചിട്ടുണ്ട്. ഇത് കേന്ദ്രീകരിച്ചാണ് ഇപ്പോള്‍ അന്വേഷണം മുന്നോട്ടുപോകുന്നത്. കൊല്ലത്തും കുട്ടികളെ തട്ടിക്കൊണ്ടുപോകാൻ ശ്രമമുണ്ടായി എന്നതരത്തിലുള്ള വാർത്തകള്‍ വരുന്നുണ്ട്. സിസിടിവി ഉള്‍പ്പെടെയുള്ള ദൃശ്യങ്ങള്‍ കേന്ദ്രീകരിച്ച്‌ വ്യാപകമായ അന്വേഷണത്തിലാണ് പൊലീസ്. രണ്ടുസംഭവങ്ങള്‍ക്ക് പിന്നിലുള്ളതും ഒരു സംഘമാണോ എന്ന സംശയവും പൊലീസിനുണ്ട്.
