കോട്ടയം: യു ഡി എഫ് സർക്കാരിന്റെ തെരഞ്ഞെടുപ്പു വാഗ്ദാനമായ, സ്ത്രീകൾക്ക് കെ എസ് ആർ ടി സി ബസുകളിൽ സൗജന്യ യാത്ര അനുവദിച്ചതിനെ തുടർന്നുണ്ടായ വരുമാന നഷ്ടത്തിൽ സ്വകാര്യ ബസ്സുടമകൾ അതീവ പ്രതിസന്ധിയിൽ .
നാലര മാസക്കാലമായി ഭീമമായ നഷ്ടം ഉണ്ടായ ഉടമകൾക്ക് ശ്വാശതമായ പരിഹാരം ഉണ്ടാക്കേണ്ടതു സർക്കാരിന്റെ കടമയാണെന്നും ഈ പ്രശ്നങ്ങളിൽ സർക്കാർ അടിയന്തിരമായി ഇടപെടണമെന്നും പ്രൈവറ്റ് ബസ് ഓണേഴ്സ് ഓർഗനൈസേഷൻ സംസ്ഥാനകമ്മിറ്റി സർക്കാരിനോട് ആവശ്യപ്പെട്ടു. വിഷയവുമായി ബന്ധപ്പെട്ടു സർക്കാർ നിയമിച്ച കമ്മീഷൻ ഉടമകളുടെ പ്രശ്നങ്ങൾ പഠിച്ച് സർക്കാരിന് റിപ്പോർട്ട് സമർപ്പിച്ചുവെങ്കിലും, റിപ്പോർട്ടിൽ സമർപ്പിച്ച നിർദ്ദേശങ്ങൾ ബസ്സുടമകളുമായി ചർച്ച ചെയ്തിട്ടില്ല.
പൊതു മേഖലയും, സ്വകാര്യ മേഖലയും ഒരേപോലെ സംരക്ഷിക്കേണ്ടത് സർക്കാരിന്റെ കടമയാണെന്നും, അതിനായുള്ള നടപടികൾ സ്വീകരിക്കാൻ യു ഡി എഫ് സർക്കാർ തയ്യാറാകണമെന്നും യോഗം ആവശ്യപ്പെട്ടു.
വിദ്യാർത്ഥികളുടെയും മുതിർന്നവരുടെയും ബസ് ചാർജ്ജുകൾ വർധിപ്പിക്കണമെന്ന് ആവശ്യപ്പെട്ടു സമരക്കാഹളം മുഴക്കുന്ന സംഘടനകൾ ഇക്കഴിഞ്ഞ പത്തു വർഷമായി ഒന്നും ഉടമകൾക്കുവേണ്ടി നേടിയെടുക്കാതെ, കേവലം അഞ്ചു മാസം മാത്രമായ യു ഡി എഫ് സർക്കാരിനെതിരെ സമരാഹ്വാനം നടത്തി മുൾമുനയിൽ നിർത്താതെ, സർക്കാരിനോട് സഹകരിച്ചു ചർച്ച ചെയ്തു പ്രശ്നങ്ങൾ പരിഹരിക്കാൻ തയ്യാറാകണമെന്നും ഇതര സംഘടനാ നേതാക്കളോട് യോഗം ആവശ്യപ്പെട്ടു.
എ സി സത്യൻ അദ്ധ്യക്ഷത വഹിച്ച യോഗം സംസ്ഥാന പ്രസിഡന്റ്‌ ജോയി ചെട്ടിശ്ശേരി ഉദ്ഘാടനം ചെയ്തു. ജനറൽ സെക്രട്ടറി റോണി കണ്ണംപള്ളി മുഖ്യ പ്രഭാഷണം നടത്തി. ആൽവിൻ ജോസ്, സാജു മൈക്കിൾ, റ്റി സി തോമസ് സേവിയർ ജോസഫ്, ചാക്കോച്ചൻ ജോസ്, എബിൻ സി രാജു, രാജശേഖരൻ നായർ, എബി തോമസ് തുടങ്ങിയവർ പ്രസംഗിച്ചു.
