ബീജിംഗ്: ഇലക്ട്രിക് വാഹന മേഖലയ്ക്ക് പുതിയ പ്രതീക്ഷയേകി അതിവേഗ ബാറ്ററി ചാർജിംഗ് സാങ്കേതികവിദ്യ വികസിപ്പിച്ചെടുത്ത് ചൈനീസ് വാഹന നിർമാണ ഭീമന്മാരായ ജീലി ഓട്ടോ ഗ്രൂപ്പ്.
കൃത്രിമബുദ്ധി (AI) പ്രയോജനപ്പെടുത്തി വികസിപ്പിച്ചെടുത്ത ഈ സംവിധാനത്തിലൂടെ വെറും അഞ്ച് മിനിറ്റില് താഴെ സമയം കൊണ്ട് ഇലക്ട്രിക് വാഹനങ്ങള് ചാർജ് ചെയ്യാനാകും. വോള്വോയുടെ ഉടമസ്ഥരായ ജീലി ഗ്രൂപ്പിന്റെ ഈ പുതിയ കണ്ടുപിടുത്തം ഇലക്ട്രിക് വാഹന വിപണിയില് വൻ മുന്നേറ്റത്തിന് വഴിവെക്കുമെന്നാണ് വിലയിരുത്തപ്പെടുന്നത്.
യഥാർത്ഥ റോഡ് സാഹചര്യങ്ങളില് നടത്തിയ പരിശോധനയില് വെറും 4 മിനിറ്റും 30 സെക്കൻഡും കൊണ്ട് വാഹനത്തിന്റെ ബാറ്ററി 10 ശതമാനത്തില് നിന്ന് 70 ശതമാനം വരെ ചാർജ് ചെയ്യാൻ സാധിച്ചതായി കമ്പനി വക്താക്കള് അറിയിച്ചു. എതിരാളികളായ ബി.വൈ.ഡി.യുടെ (BYD) വേഗമേറിയ ബാറ്ററി സംവിധാനം 10 ശതമാനത്തില് നിന്ന് 70 ശതമാനത്തിലെത്താൻ അഞ്ച് മിനിറ്റ് സമയം എടുക്കുമ്പോഴാണ് ജീലി ഈ റെക്കോർഡ് സ്വന്തമാക്കിയത്. കൂടാതെ, 10-ല് നിന്ന് 97 ശതമാനത്തിലേക്ക് എത്താൻ വെറും 8 മിനിറ്റും 40 സെക്കൻഡും മാത്രമാണ് എടുത്തത്.
ജീലിയും സ്റ്റെപ്പ്ഫണ്ണും സംയുക്തമായി വികസിപ്പിച്ചെടുത്ത 'എക്സിങ്റൂയി പവർമൈൻഡ്' (Xingrui PowerMind) എന്ന എ.ഐ. മോഡലാണ് ഈ വിപ്ലവകരമായ മുന്നേറ്റത്തിന് അടിത്തറയിട്ടത്. വാഹനത്തിന്റെ ബാറ്ററി, ചാർജിംഗ് സ്റ്റേഷൻ, ക്ലൗഡ് നെറ്റ്വർക്ക്, പവർ ഗ്രിഡ് എന്നിവയെ തമ്മില് കോർത്തിണക്കിയാണ് ഇത് പ്രവർത്തിക്കുന്നത്. ബാറ്ററിയുടെ താപനില മുൻകൂട്ടി പ്രവചിച്ച് ചാർജിംഗ് വേഗത തനിയെ ക്രമീകരിക്കാൻ എ.ഐ. അല്ഗോരിതത്തിന് കഴിയും. ഇതിനോടൊപ്പം അത്യാധുനിക ലിക്വിഡ് കൂളിംഗ് സംവിധാനം കൂടി ഉള്പ്പെടുത്തിയതിനാല് ബാറ്ററിയുടെ സുരക്ഷിതത്വം പൂർണമായി ഉറപ്പാക്കുന്നു.
കമ്പനിയുടെ പ്രമുഖ ഇലക്ട്രിക് മോഡലുകളായ 'ലിങ്ക് & കോ 10', 'സീക്കർ 001' എന്നിവയിലാണ് ഈ പുതിയ ബാറ്ററി സംവിധാനം വിജയകരമായി പരീക്ഷിച്ചത്. അതിവേഗ ചാർജിംഗ് ലഭ്യമാക്കുന്നതിനൊപ്പം ബാറ്ററികളുടെ ആയുസ്സ് 20 ശതമാനം വരെ വർദ്ധിപ്പിക്കാനും ഈ സാങ്കേതികവിദ്യയ്ക്ക് സാധിക്കുമെന്ന് കമ്പനി അവകാശപ്പെടുന്നു. ആവർത്തിച്ചുള്ള വേഗത്തിലുള്ള ചാർജിംഗ് മൂലം ബാറ്ററികള്ക്കുണ്ടാകുന്ന ക്ഷയം പരിഹരിക്കാൻ സഹായിക്കുന്ന 'ലിഥിയം-അയണ് പള്സ് റെസ്റ്റോറേഷൻ' സംവിധാനവും ഇതില് ഉള്പ്പെടുത്തിയിട്ടുണ്ട്.
മറ്റൊരു ചൈനീസ് ഇവി ഭീമനായ ബി.വൈ.ഡി. ബ്രിട്ടനില് 1.5 മെഗാവാട്ട് (MW) ശേഷിയുള്ള 300 ഫ്ലാഷ് ചാർജറുകള് സ്ഥാപിക്കുമെന്ന് പ്രഖ്യാപിച്ചതിന് തൊട്ടുപിന്നാലെയാണ് ജീലിയുടെ ഈ പുതിയ നേട്ടം പുറത്തുവരുന്നത്. നിലവിലെ ടെസ്ല റൈഡ് ചാർജറുകളേക്കാള് പത്തിരട്ടി ശേഷിയുള്ളവയാണ് ഇത്തരം ഫ്ലാഷ് ചാർജറുകള്. പട്രോള് അടിക്കുന്നതിനേക്കാള് വേഗത്തില് ഇലക്ട്രിക് വാഹനങ്ങള് ചാർജ് ചെയ്യാം എന്ന സാഹചര്യം ഒരുങ്ങുന്നത് ആഗോളതലത്തില് ഇലക്ട്രിക് വാഹനങ്ങളുടെ പ്രചാരം വർദ്ധിപ്പിക്കാൻ സഹായിക്കും.
