കൊച്ചി: നെടുമ്പാശ്ശേരി അന്താരാഷ്ട്ര വിമാനത്തവത്തിലെ ടെർമിനല്‍ മൂന്നിലെ എയർ ലോഞ്ച് ബാറിന് നല്‍കിയ ലൈസൻസ് സർക്കാർ റദ്ദാക്കി.
സർക്കാർ അനുമതിയില്ലാതെ മുൻ കമ്മീഷണർ സ്വീകരിച്ച നടപടിയാണ് അഡീഷണല്‍ എക്സൈസ് കമ്മീഷണർ ആർ. ജയശങ്കർ റദ്ദാക്കിയത്. FL 7 ലൈസൻസിനുള്ള നടപടിക്രമങ്ങളാണ് റദ്ദാക്കിയത്.
ലൈസൻസിനായി അടച്ചിട്ടുള്ള 200000 രൂപ തിരികെ ലഭിക്കാൻ ഈ ട്രഷറിയില്‍ അപേക്ഷ നല്‍കാം.
അതേസമയം, പുതിയ മദ്യനയം വരുന്നതുവരെ ബാറുകള്‍ക്ക് ലൈസൻസ് നല്‍കരുതെന്ന് കർശന നിർദേശം നല്‍കിയിരിക്കുകയാണ് നികുതി വകുപ്പ്. സർക്കാർ നിർദേശം ലഭിക്കാതെ മദ്യ വ്യാപാരത്തിനുള്ള ലൈസൻസ് നല്‍കരുതെന്ന് അഡീഷണല്‍ ചീഫ് സെക്രട്ടറിയാണ് കർശന നിർദേശം നല്‍കിയിരിക്കുന്നത്.
കൂടാതെ, മുൻ എക്സൈസ് കമ്മീഷണർ സാംബശിവ റാവു ഉന്നയിച്ച കോഴ ആരോപണത്തില്‍ സർക്കാർ ഉടൻ അന്വേഷണം പ്രഖ്യാപിച്ചേക്കും. സംഭവത്തില്‍ വിജിലൻസ് അന്വേഷണം നടത്തണമെന്നാണ് എക്സൈസ് വകുപ്പിന്റെ ശിപാർശ.
പുതിയ എക്സൈസ് കമ്മീഷണറെ നിയമിക്കാനുള്ള നടപടികളും വേഗത്തിലാക്കിയിരിക്കുകയാണ് സർക്കാർ. പദവി ഒഴിയുന്നതിന് മുൻപ് മുൻ എക്സൈസ് കമ്മീഷണർ സാംബശിവ റാവു സർക്കാരിന് സമർപ്പിച്ച റിപ്പോർട്ടിലാണ് ഗുരുതരമായ കോഴ ആരോപണങ്ങളുള്ളത്.
സെൻട്രല്‍ എക്സൈസ് ജോയിന്റ് കമ്മീഷണർ എസ്. വിനോദ്, ആലപ്പുഴ എക്സൈസ് ഡെപ്യൂട്ടി കമ്മീഷണർ കെ.ആർ അജയ് എന്നിവർ ബാറുടമകളില്‍ നിന്ന് കോഴ വാങ്ങിയെന്ന വിവരമാണ് റിപ്പോർട്ടിലുള്ളത്. ആരോപണങ്ങള്‍ ഗൗരവമുള്ളതാണെന്നാണ് എക്സൈസ് വിജിലൻസ് വിഭാഗത്തിന്റെ വിലയിരുത്തല്‍.
