കോട്ടയം: കഴിഞ്ഞ ഓണപ്പിറ്റേന്നു മുതല് തവണകളായി പണം വാങ്ങി, ഓണത്തിനു കിറ്റ് നല്കുന്ന അയല്ക്കൂട്ടങ്ങളും വ്യാപാരികളും വെട്ടില്.
എണ്ണയുടെയും നിത്യോപയോഗ സാധനങ്ങളുടെയും പച്ചക്കറികളുടെയും വില കുതിച്ചതാണ് കിറ്റ് വിതരണത്തിലെ പ്രതിസന്ധിക്കു കാരണം. പണസമാഹരണം ആരംഭിച്ചതിനേക്കാള് 40 ശതമാനം വരെ പലചരക്ക് ഉത്പ്പന്നങ്ങള്ക്കു വില വര്ധിച്ചു. സമാനമായ വര്ധന പച്ചക്കറി വിലയിലുമുണ്ടായി.
ഓണത്തിനു പിന്നാലെ ആഴ്ചയിലോ, മാസത്തിലോ നിശ്ചിത തുക വീതം ആളുകളില് നിന്നു വാങ്ങി അടുത്ത ഓണക്കാലത്തു കിറ്റ് നല്കുന്നതാണു പദ്ധതി. കിറ്റിലുള്ള സാധനങ്ങളും അളവും നേരത്തെ അറിയിക്കും. പല അയല്ക്കൂട്ടങ്ങളും കുടുംബശ്രീ യൂണിറ്റുകളും വ്യാപാരികളുമൊക്കെ വര്ഷങ്ങളായി ഇത്തരത്തില് കിറ്റ് നല്കാറുണ്ട്. പലരില് നിന്നു നിശ്ചിതതുക ഈടാക്കുമ്പോള് ആകെ തുക ലക്ഷങ്ങള് വരും. വര്ഷം മുഴുവന് ചെലവഴിക്കാമെന്നതും ചെറിയ ലാഭവുമാണു നേട്ടം. ഓണത്തിന് ഒരുമിച്ചു പണം കണ്ടത്താതെ വിഭവ സമൃദ്ധമായ സദ്യയൊരുക്കാമെന്നതാണ് ഉപഭോക്താക്കള്ക്കുള്ള നേട്ടം.
പതിവില് നിന്നു വ്യത്യസ്തമായി ഇത്തവണ അരിയ്ക്കു വരെ വില വര്ധിച്ചു. പഞ്ചസാരയ്ക്കാണ് ഇതിനു പുറമേ അപ്രതീക്ഷിത വിലക്കയറ്റം. മുന് ധാരണയുള്ളതിനാല് വിഭവങ്ങളുടെ എണ്ണമോ, അളവോ കുറയ്ക്കാന് സാധിക്കില്ല. കടമെടുക്കുക മാത്രമാണ് ഇവരുടെ മുന്നിലെ പോംവഴി.ചില സ്ഥലങ്ങളില് ഓണവിഭവങ്ങള് ഒരുക്കാനുള്ള പച്ചക്കറി കിറ്റും നല്കിയിരുന്നു. പച്ചക്കറി വിലയും പിടിച്ചാല് കിട്ടാത്തവിധമായതു പ്രതിസന്ധി ഇരട്ടിയാക്കുകയാണ്.
പലസാധനങ്ങളും ഒരുമാസം മുന്പേ എടുത്തുവച്ചിരുന്നു. അപ്രതീക്ഷിത മഴയും വെള്ളപ്പൊക്കവും പല വ്യാപാരികളുടെയും ഇത്തരം സ്റ്റോക്കിനെയും നശിപ്പിച്ചു. കിറ്റ് തുടങ്ങുന്ന വിലയില് നിന്ന് ഒരു വര്ഷംകൊണ്ട് ഉണ്ടാകുന്ന വ്യത്യാസം വളരെ വലുതാണെന്നതും പ്രതിസന്ധി വര്ധിപ്പിക്കുന്നതായി വ്യാപാരികള് പറയുന്നു. സമാനമായ അവസ്ഥയിലാണ് അയല്ക്കൂട്ടങ്ങളും. ഓണക്കോടി ഉള്പ്പെടെയാണു പല അയല്ക്കൂട്ടങ്ങളും കിറ്റില് നല്കുന്നത്.
സൗജന്യ
ഓണക്കിറ്റുകള്
കോട്ടയം: ജില്ലയിലെ 34,054 എ.എ.വൈ (മഞ്ഞ) റേഷന് കാര്ഡ് ഉടമകള്ക്കുള്ള സൗജന്യ ഓണക്കിറ്റുകള് എല്ലാ റേഷന് കടകളിലും എത്തിച്ചു. എ.എ.വൈ വിഭാഗത്തില്പ്പെട്ട റേഷന് കാര്ഡ് ഉടമകള് 25 നു മുന്പ് ഓണക്കിറ്റ് കൈപ്പറ്റണമെന്ന് ജില്ലാ സപ്ലൈ ഓഫീസര് അറിയിച്ചു.
