തിരുവനന്തപുരം: കേരളത്തെ ഞെട്ടിച്ച ചാല സ്വര്ണ്ണക്കവര്ച്ച കേസില് അന്വേഷണം അതിവേഗം പുരോഗമിക്കുമ്പോള് പുറത്തുവരുന്നത് അമ്പരപ്പിക്കുന്ന വിവരങ്ങള്.
മോഷണം നടന്ന് ദിവസങ്ങള്ക്കുള്ളില് തന്നെ കേസില് നിര്ണ്ണായക വഴിതിരിവുകള് ഉണ്ടാക്കാന് പൊലീസിന് സാധിച്ചിട്ടുണ്ട്. കേസില് തുടക്കത്തില് കേവലം 15 പവന് സ്വര്ണ്ണം മാത്രമേ നഷ്ടപ്പെട്ടിട്ടുള്ളൂ എന്ന് വൈഷ്ണവി ജ്വല്ലറി ഉടമ നന്ദകുമാര് പറഞ്ഞിരുന്നെങ്കിലും, അതിനേക്കാള് എത്രയോ ഇരട്ടി അധികം സ്വതമാണ് ഇപ്പോള് പൊലീസ് കണ്ടെത്തിയിരിക്കുന്നത്. അന്വേഷണ സംഘം നടത്തിയ വ്യാപകമായ റെയ്ഡുകളിലൂടെ ഇതിനോടകം തന്നെ 202-ഓളം പവന് സ്വര്ണ്ണമാണ് വീണ്ടെടുത്തിരിക്കുന്നത്.
കേസിന്റെ തുടക്കത്തില് പരാതിക്കാരന് നല്കിയ മൊഴികളിലെ വൈരുദ്ധ്യങ്ങളും ആശയക്കുഴപ്പങ്ങളും പൊലീസിനെ ആദ്യം വലച്ചിരുന്നു. കവര്ച്ച നടന്നയുടന് വൈഷ്ണവി ജ്വല്ലറി ഉടമ പോലീസിനോട് പറഞ്ഞത് ഏകദേശം 1.800 കിലോഗ്രാം സ്വര്ണം നഷ്ടപ്പെട്ടുവെന്നായിരുന്നു. എന്നാല് എഫ്.ഐ.ആറില് രണ്ടു കിലോഗ്രാം സ്വര്ണം നഷ്ടപ്പെട്ടതായാണ് പോലീസ് രേഖപ്പെടുത്തിയിരുന്നത്. ഇതിനുശേഷമാണ് 15 പവന് സ്വര്ണം മാത്രമേ നഷ്ടപ്പെട്ടുള്ളൂ എന്ന നിലപാടിലേക്ക് ഉടമ മാറിയത്. എന്നാല് ഇതൊന്നും കാര്യമാക്കാതെ പൊലീസ് നടത്തിയ ശാസ്ത്രീയമായ അന്വേഷണമാണ് യഥാര്ത്ഥ പ്രതികളിലേക്കും ഒളിപ്പിച്ചുവെച്ച സ്വരശേഖരത്തിലേക്കും വഴിതുറന്നത്.
പിടിച്ചെടുത്ത 202 പവന് സ്വര്ണ്ണത്തില് 146 പവന് വെള്ളായണിയിലെ ഒരു ആളൊഴിഞ്ഞ പുരയിടത്തില് കുഴിച്ചിട്ട നിലയിലാണ് പൊലീസ് കണ്ടെത്തിയത്. ബാക്കി വന്ന 56 പവന് സ്വര്ണ്ണം പ്രതികള് രക്ഷപ്പെടാന് ഉപയോഗിച്ച വാഹനത്തില് നിന്നും അന്വേഷണ സംഘം പിടിച്ചെടുക്കുകയായിരുന്നു. കൃത്യമായ രഹസ്യാന്വേഷണത്തിന്റെയും പ്രതികളെ ചോദ്യം ചെയ്തതില് നിന്നും ലഭിച്ച വിവരങ്ങളുടെയും അടിസ്ഥാനത്തിലാണ് ഒളിത്താവളങ്ങളില് നിന്നും ഈ സ്വര്ണ്ണം പൂര്ണ്ണമായി കണ്ടെത്താന് സാധിച്ചത്.
ഈ കവര്ച്ചാ പരമ്പരയുടെ പിന്നില് വന്തോതിലുള്ള ബിസിനസ്സ് കുടിപ്പകയും ആസൂത്രിതമായ ക്വട്ടേഷനുമാണെന്ന് പൊലീസ് നേരത്തെ തന്നെ കണ്ടെത്തിയിരുന്നു. മോഷണദിവസം രാവിലെ പ്രധാന പ്രതികളിലൊരാളായ അമൂല്, നന്ദകുമാറിന്റെ കടയിലെത്തി 15 ലക്ഷം രൂപയുടെ സ്വര്ണം അവിടെ വിറ്റ് പണം വാങ്ങിയിരുന്നു. എന്നാല് രാത്രിയില് ഇതേ കടയില് നിന്നുള്പ്പെടെ ഏകദേശം രണ്ട് കിലോഗ്രാം സ്വര്ണമാണ് കവര്ച്ചാസംഘം കവര്ന്നത്. ഇതിനുശേഷം താന് വിറ്റ സ്വര്ണം അടക്കം നഷ്ടപ്പെട്ടതില് തന്റെ സ്വര്ണം എങ്ങനെയെങ്കിലും മടക്കി നല്കണമെന്ന് അമൂല് ആവശ്യപ്പെടുകയും ചെയ്തിരുന്നു എന്നത് പ്രതികളുടെ പരിഭ്രാന്തിയാണ് വ്യക്തമാക്കുന്നത്.
നന്ദകുമാറിന്റെ ബിസിനസ്സ് വളര്ച്ചയില് അസൂയാലുക്കളായ സമീപത്തെ ജ്വല്ലറി ഉടമയും പ്രധാന പ്രതിയുമായ മഹാരാഷ്ട്ര സ്വദേശി അമൂലും കൂട്ടുപ്രതി ദിലീപും ചേര്ന്നാണ് ഈ വലിയ പദ്ധതി ആസൂത്രണം ചെയ്തത്. നഗരത്തിലെ ഒരു ബാറില് വെച്ചായിരുന്നു കവര്ച്ചയുടെ ആദ്യഘട്ട ഗൂഢാലോചനകള് നടന്നത്. ക്രിമിനല് പശ്ചാത്തലമുള്ള അനിലിന് ക്വട്ടേഷന് നല്കുകയായിരുന്നു. വലിയ അളവില് സ്വര്ണ്ണം നഷ്ടമായാല് നന്ദകുമാറിന് കനത്ത സാമ്പത്തിക ബാധ്യത ഉണ്ടാകുമെന്നും, കണക്കില്പ്പെടാത്ത സ്വര്ണമായതിനാല് പൊലീസില് പരാതിപ്പെടാന് സാധ്യതയില്ലെന്നുമായിരുന്നു പ്രതികള് കണക്കുകൂട്ടിയിരുന്നത്.
ക്വട്ടേഷന് ഏറ്റെടുത്ത അനിലിന്റെ സംഘാംഗമായ അനൂപ് രാജിന് അമൂലിന്റെ ബാങ്ക് അക്കൗണ്ട് വഴി നാല് ലക്ഷം രൂപ മുന്കൂര് അഡ്വാന്സായി കൈമാറിയതിന്റെ ഡിജിറ്റല് തെളിവുകളും അന്വേഷണ സംഘത്തിന് ലഭിച്ചിട്ടുണ്ട്. എന്നാല് നന്ദകുമാര് കടയില്നിന്ന് പുറത്തിറങ്ങാന് വൈകിയതിനാല് കവര്ച്ചയ്ക്കുള്ള ആദ്യശ്രമം പരാജയപ്പെടുകയായിരുന്നു. തുടര്ന്ന് കവര്ച്ചയ്ക്ക് തലേദിവസം പ്രതികള് വീണ്ടും സ്ഥലത്തെത്തി കൃത്യമായ റിഹേഴ്സലും നടത്തിയിരുന്നു. 12-ാം തീയതി രാത്രി കടയടച്ചശേഷം സ്വര്ണമടങ്ങിയ ബാഗുമായി വലിയശാലയിലെ വീട്ടിലേക്ക് സ്കൂട്ടറില് മടങ്ങുകയായിരുന്ന നന്ദകുമാറിനെ സഭാവതി കോവില് റോഡില് വെച്ച് ബൈക്കിലെത്തിയ സംഘം ആക്രമിച്ച് സ്വര്ണം തട്ടിയെടുക്കുകയായിരുന്നു
എന്നാല് പ്രതികളുടെ എല്ലാ കണക്കുകൂട്ടലുകളെയും തെറ്റിച്ചുകൊണ്ട്, രാത്രി തന്നെ നന്ദകുമാര് പൊലീസില് വിവരമറിയിക്കുകയായിരുന്നു. തുടര്ന്ന് കേരള പൊലീസ് രൂപീകരിച്ച പ്രത്യേക അന്വേഷണ സംഘം വെറും 48 മണിക്കൂറിനുള്ളില് പ്രതികളെ മുഴുവന് വലയിലാക്കുകയായിരുന്നു. അനില്, അനൂപ്, വിനോദ് എന്നിവരെ വയനാട്ടില് നിന്നുമാണ് പിടികൂടിയത്. ഗൂഢാലോചന നടത്തിയ അമൂലും ദിലീപും തിരുവനന്തപുരത്തുനിന്നുമാണ് പിടിയിലായത്. പിന്നീട് വയനാട് വെച്ച് രക്ഷപ്പെടാന് ശ്രമിച്ച മറ്റൊരു പ്രതിയായ ശ്രാവണിനെയും പൊലീസ് പിടികൂടി.
ഇതിനിടയില് ചാലയിലെ മാളവിക ജൂവലറി ഉടമ ജയറാമിന്റെ അറസ്റ്റും പൊലീസ് രേഖപ്പെടുത്തിയിട്ടുണ്ട്. മറ്റ് ചില സാമ്പത്തിക തട്ടിപ്പ് കേസുകളിലാണ് നിലവില് ഇയാളുടെ അറസ്റ്റ് രേഖപ്പെടുത്തിയിട്ടുള്ളതെങ്കിലും, സ്വര്ണ്ണക്കവര്ച്ച കേസില് ജയ്രാമിനുള്ള പങ്കിനെക്കുറിച്ച് പൊലീസ് ആഴത്തിലുള്ള അന്വേഷണം നടത്തിവരികയാണ്. കവര്ച്ചാ കേസില് ഉള്പ്പെട്ട മറ്റ് പ്രതികളുമായി ജയ്രാമിനുള്ള സാമ്പത്തിക ഇടപാടുകളെക്കുറിച്ചും പൊലീസ് പരിശോധിക്കുന്നുണ്ട്.
പൊലീസ് കസ്റ്റഡിയിലുള്ള ജയറാം ഉള്പ്പെടെയുള്ള ഏഴ് പ്രതികളെയും ഒന്നിച്ചിരുത്തി വിശദമായ ചോദ്യം ചെയ്യലാണ് ഇപ്പോള് നടക്കുന്നത്. നഷ്ടപ്പെട്ട മുഴുവന് സ്വര്ണ്ണവും തിരിച്ചുപിടിക്കുന്നതിനും ഗൂഢാലോചനയില് പങ്കാളികളായ മറ്റാരെങ്കിലും ഉണ്ടോയെന്ന് കണ്ടെത്താനുമുള്ള ഊര്ജ്ജിതമായ ശ്രമത്തിലാണ് അന്വേഷണ സംഘം. നിയമവിരുദ്ധ പ്രവര്ത്തനങ്ങളിലൂടെ കോടികള് തട്ടിയെടുത്ത പ്രതികള്ക്കെതിരെ ശക്തമായ കുറ്റപത്രം സമര്പ്പിക്കുമെന്നും പൊലീസ് വ്യക്തമാക്കിയിട്ടുണ്ട്.






