തിരുവനന്തപുരം: ആയുർവേദ ആശുപത്രികളിലെ ക്രമക്കേടില്‍ വിജിലൻസ് അന്വേഷണത്തിന് ഉത്തരവിട്ട് ആരോഗ്യമന്ത്രി കെ മുരളീധരൻ.
ആയുർവേദ ആശുപത്രികളില്‍ ഫർണിച്ചറുകള്‍ വാങ്ങിയതില്‍ ക്രമക്കേട് നടന്നതായി കണ്ടെത്തിയതിനെത്തുടർന്നാണ് നടപടി.
ധനകാര്യ വകുപ്പിന്റെ അന്വേഷണം മതിയെന്ന പ്രിൻസിപ്പല്‍ സെക്രട്ടറിയുടെ ശുപാർശ തള്ളിക്കൊണ്ടാണ് മന്ത്രിയുടെ ഉത്തരവ്. കണ്ണൂർ പിണറായിയിലെ ഗവ. ആയുർവേദ ആശുപത്രിയുടെ കെട്ടിട നിർമാണം പൂർത്തിയാകുന്നതിന് മുൻപ് ലക്ഷക്കണക്കിന് രൂപയുടെ ഫർണിച്ചറുകള്‍ വാങ്ങിയ സംഭവത്തിലുള്‍പ്പെടെയാണ് അന്വേഷണം നടക്കുക. ഇവിടെ കെട്ടിട നിർമാണം പോലും പൂർത്തിയാകുന്നതിന് മുൻപ് 11.45 ലക്ഷം രൂപയുടെ ഫർണിച്ചറുകളായിരുന്നു വാങ്ങിക്കൂട്ടിയത്. മട്ടന്നൂർ, ചാലക്കുടി, വെങ്ങാനൂർ സർക്കാർ ആയുർവേദ ആശുപത്രികളിലും ചട്ടം ലംഘിച്ച്‌ വൻതോതില്‍ ഫർണിച്ചർ വാങ്ങിയതായി കണ്ടെത്തിയിട്ടുണ്ട്.
