കൊച്ചി: ചേരാനല്ലൂർ അപകടത്തില്‍ എഎസ്‌ഐ സസ്‌പെൻഷനിലായ വാർത്തയറിഞ്ഞ് അദ്ദേഹത്തിന്റെ മാതാവ് കുഴഞ്ഞുവീണ് മരിച്ചു.
ചേരാനല്ലൂർ സ്റ്റേഷനിലെ എഎസ്‌ഐ കെ ടി മനോജിന്റെ മാതാവ് പാതാളം കുരീക്കാട്ടുപറമ്പില്‍ എൻ കെ സരസുവാണ് (71) മരിച്ചത്. ചൊവ്വാഴ്‌ച രാത്രിയോടെയായിരുന്നു മരണം.
ജഡ്‌ജിയുടെ മകനായ 17കാരൻ ഓടിച്ച ബെൻസ് കാറിടിച്ച്‌ ഒരാള്‍ മരിച്ച സംഭവത്തില്‍ നടപടിയെടുക്കുന്നതില്‍ കടുത്ത വീഴ്‌ച സംഭവിച്ചെന്ന പേരിലാണ് മനോജ് ഉള്‍പ്പെടെ നാല് ഉദ്യോഗസ്ഥരെ സസ്‌പെൻഡ് ചെയ്‌തത്.
സസ്‌പെൻഷൻ വാർത്തയറിഞ്ഞ് സരസു അതീവ ദുഃഖിതയായിരുന്നുവെന്നു ബന്ധുക്കള്‍ പറഞ്ഞു. ഹൃദയസംബന്ധമായ അസുഖത്തിന് ചികിത്സയിലായിരുന്നു ഇവർ.
മനോജിനൊപ്പമായിരുന്ന സരസു കുറച്ച്‌ ദിവസങ്ങളായി മകള്‍ മഞ്ജുവിന്റെ പാതാളത്തെ വീട്ടിലാണ് കഴിഞ്ഞിരുന്നത്. സംസ്‌കാരം നടത്തി. ഭർത്താവ് - പരേതനായ തേവൻ. മരുമകള്‍ - സുമ.
