ചങ്ങനാശ്ശേരി : ചങ്ങനാശ്ശേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി എൽപി വാറണ്ട് പുറപ്പെടുവിച്ച പ്രതി പിടിയിൽ. കഴിഞ്ഞ 19 വർഷമായി ഒളിവിൽ കഴിഞ്ഞിരുന്ന ടിസി അജിമോൻ ആണ് വാകത്താനം പോലീസിന്റെ പിടിയിലായത്.
കഴിഞ്ഞ 19 വർഷമായി വിവിധ സ്ഥലങ്ങളിൽ ഒളിവിൽ കഴിഞ്ഞിരുന്ന പ്രതി തമിഴ്നാട്ടിലെ കോയമ്പത്തൂർ, മധുര എന്നിവിടങ്ങളിലും കേരളത്തിലെ എറണാകുളം, തൃശൂർ, കോഴിക്കോട് തുടങ്ങിയ സ്ഥലങ്ങളിലും താമസിച്ചിരുന്നതായി അന്വേഷണത്തിൽ കണ്ടെത്തി. ഒളിവിൽ കഴിയുന്നതിനിടെ അജിമോൻ എന്ന പേരിന് പകരം ആനന്ദ് എന്ന പേര് ഉപയോഗിച്ചിരുന്നതായും പോലീസ് കണ്ടെത്തി.
കോഴിക്കോട് ജില്ലാ ഭരണകൂടത്തിന്റെ “ഉദയം” പദ്ധതിയുമായി ബന്ധപ്പെട്ട് കോഴിക്കോട് ജില്ലാ ഭരണകൂടം കോട്ടയം ജില്ലാ പോലീസ് മേധാവി സാബു മാത്യുവിന് കത്ത് നൽകിയിരുന്നു. തുടർന്ന് അദ്ദേഹത്തിന്റെ നിർദ്ദേശപ്രകാരം ചങ്ങനാശ്ശേരി ഡിവൈഎസ്പിയെ അന്വേഷണത്തിന് ചുമതലപ്പെടുത്തുകയും ചെയ്തു. പിന്നാലെ ഡിവൈഎസ്പിയുടെ നേതൃത്വത്തിൽ ചങ്ങനാശ്ശേരിയിൽ പ്രത്യേക ടീം രൂപീകരിക്കുകയും ചെയ്തു.
ഈ പ്രത്യേക ടീം നടത്തിയ അന്വേഷണത്തിലാണ് കോഴിക്കോട് പ്രവർത്തിക്കുന്ന “ഉദയം” പദ്ധതിയുടെ ഹോമിൽ ആനന്ദ് എന്ന പേരിൽ കഴിഞ്ഞിരുന്ന വ്യക്തിയെക്കുറിച്ചുള്ള വിവരങ്ങൾ ലഭിച്ചത്. ഇയാൾ സ്വന്തം പേര്, മാതാപിതാക്കളുടെ പേരുകൾ എന്നിവയിൽ വ്യത്യാസമുള്ള വിവരങ്ങൾ നൽകിയിരുന്നുവെങ്കിലും മകന്റെ പേര് ശരിയായി നൽകിയിരുന്നു. ഇതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് ഇയാൾ എൽപി വാറണ്ട് നിലവിലുള്ള ടിസി അജിമോൻ തന്നെയാണെന്ന് തിരിച്ചറിഞ്ഞത്.
തുടർന്ന് കോഴിക്കോട് ചേവായൂരിൽ നടത്തിയ അന്വേഷണത്തിൽ പ്രതിയെ കണ്ടെത്തി അറസ്റ്റ് ചെയ്തു. വാകത്താനം സർക്കിൾ ഇൻസ്പെക്ടർ ഡോളി, വാകത്താനം എസ്എച്ഒ എസ്‌ഐ ആദർശ്, സിപിഒ പ്രീതിഷ് പ്രസാദ്, സിപിഒ അൻസാർ മുഹമ്മദ് എന്നിവർ ഉൾപ്പെട്ട പോലീസ് സംഘമാണ് പ്രതിയെ കണ്ടെത്തുന്നതിനും അറസ്റ്റ് ചെയ്യുന്നതിനും നേതൃത്വം നൽകിയത്. പ്രതിയെ ചങ്ങനാശ്ശേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കി.
