കണ്ണൂർ: ആശുപത്രിയില്‍ ചികിത്സയില്‍ കഴിയുന്ന അമ്മയ്ക്ക് രാത്രി കൂട്ടിരുന്ന ശേഷം വീട്ടിലേക്ക് മടങ്ങിയ 19-കാരന് വാഹനാപകടത്തില്‍ ദാരുണാന്ത്യം.
വായാട്ടുപറമ്പ് ജങ്ഷനിലെ സുരേഷ്-സ്മിത ദമ്പതികളുടെ മകൻ അഭിനവ് സുരേഷ് (19) ആണ് മരിച്ചത്. ബുധനാഴ്ച (സെപ്റ്റംബർ 30) രാവിലെ 7.30-ഓടെ പരിയാരം അമ്മാനപ്പാറയിലെ ചുടല-മാതമംഗലം റോഡിലായിരുന്നു നാടിനെ നടുക്കിയ അപകടം നടന്നത്. പരിയാരത്തെ കണ്ണൂർ ഗവ. മെഡിക്കല്‍ കോളേജില്‍ കഴിയുന്ന രോഗിയായ അമ്മയെ കണ്ട് വായാട്ടുപറമ്പിലെ വീട്ടിലേക്ക് ബൈക്കില്‍ മടങ്ങുകയായിരുന്നു അഭിനവ്.
ലോറികള്‍ക്കിടയില്‍ പെട്ട ബൈക്ക്
മുടിക്കാനം ജങ്ഷനില്‍ വെച്ച്‌ അഭിനവ് ഓടിച്ച ബൈക്ക് പെട്ടെന്ന് നിയന്ത്രണംവിട്ട് മുന്നില്‍ പോവുകയായിരുന്ന കെഎല്‍ 59 എഫ് 9727 (KL 59 F 9727) എന്ന നമ്പറിലുള്ള ചെങ്കല്‍ ലോറിയില്‍ ഇടിക്കുകയായിരുന്നു. ഇടിയുടെ ആഘാതത്തില്‍ നിയന്ത്രണംവിട്ട ബൈക്കില്‍ നിന്നും അഭിനവ് എതിരെ മണല്‍കയറ്റി മാതമംഗലം ഭാഗത്തുനിന്ന് വരികയായിരുന്ന ടോറസ് ലോറിക്കടിയിലേക്ക് വീണു.
റോഡില്‍ തെറിച്ചുവീണ അഭിനവിൻ്റെ ശരീരത്തിലൂടെ ടോറസ് ലോറി കയറിയിറങ്ങുകയായിരുന്നു. തല ഉടലില്‍ നിന്ന് വേർപെട്ട നിലയിലായിരുന്നുവെന്ന് ദൃക്സാക്ഷികള്‍ പറയുന്നു.
പോലീസ് കേസെടുത്തു
അപകടത്തെ തുടർന്ന് പരിയാരം പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു. അഭിനവിൻ്റെ മൃതദേഹം നിലവില്‍ കണ്ണൂർ ഗവ. മെഡിക്കല്‍ കോളജ് മോർച്ചറിയില്‍ സൂക്ഷിച്ചിരിക്കുകയാണ്. പോസ്റ്റ്മോർട്ടം നടപടികള്‍ക്ക് ശേഷം മൃതദേഹം ബന്ധുക്കള്‍ക്ക് വിട്ടുനല്‍കി സംസ്കരിക്കും. സംഭവത്തില്‍ പരിയാരം പോലീസ് കേസെടുത്തിട്ടുണ്ട്.
