എറണാകുളം: പെട്രോള്‍ ഉത്പ്പന്നങ്ങളില്‍ നിർദിഷ്ട അളവില്‍ അധികം എഥനോള്‍ കലർത്തി വില്‍ക്കുന്നുണ്ടെന്ന വാർത്തയുടെ അടിസ്ഥാനത്തില്‍ പരിശോധന നടത്താൻ പൊതുവിതരണ- ഉപഭോക്തൃകാര്യ കമ്മീഷണർക്ക് നിർദേശം നല്‍കി മന്ത്രി അനുപ് ജേക്കബ്.
മുഖ്യമന്ത്രിമായി ചർച്ച നടത്തിയശേഷമാണ് നിർദേശം നല്‍കിയത്. കേരളത്തില്‍ നിലവില്‍ പെട്രോള്‍ ഇന്ധനങ്ങളില്‍ അളവിലധികം എഥനോള്‍ കലർത്തുന്നതായി ശ്രദ്ധയില്‍പെട്ടിട്ടില്ല. കർണ്ണാടകയില്‍ ഇത്തരത്തില്‍ തട്ടിപ്പ് കണ്ടെത്തിയ സാഹചര്യത്തിലാണ് കേരളത്തിലും പരിശോധന നടത്താൻ നിർദേശം നല്‍കിയത്.
തിരുവനന്തപുരം, എറണാകുളം, കോഴിക്കോട്, കണ്ണൂർ ജില്ലകളിലെ വിവിധയിടങ്ങളില്‍ നിന്ന് സാമ്പിള്‍ ശേഖരിച്ച്‌ പരിശോധന നടത്തും. 2005 ലെ കേന്ദ്ര മോട്ടോർ സ്പിരിറ്റ് ഹൈ സ്‌പീഡ് ഡീസല്‍ റെഗുലേഷൻസ് ഓഫ് സ്പ്ളൈ ഡിസ്‌ട്രീ ബ്യൂഷൻ & പ്രിവൻഷൻ ഓഫ് മല്‍പ്രാക്റ്റീസസ് നിയമപ്രകാരം സംസ്ഥാനം 2014 ല്‍ പുറത്തിറക്കിയ വിജ്ഞാപനമനുസരിച്ച്‌ പൊതുവിതരണ- ഉപഭോക്തൃകാര്യ കമ്മിഷണർ മുതല്‍ താലൂക്ക് സപ്ളൈ ഓഫീസർ വരെയുള്ളവർക്ക് പരിശോധന നടത്താനും നിയമനടപടി സ്വീകരിക്കാനും അധികാരം നല്‍കിയിട്ടുണ്ട്. മായം കലർത്തിയിട്ടുണ്ട് എന്ന് കണ്ടെത്തിയാല്‍ കർശന നടപടി സ്വീകരിക്കുമെന്നും മന്ത്രി അറിയിച്ചു.
